‘ஆர்.சி.பி வெற்றி கொண்டாட்டத்தை நடத்த யார் முடிவெடுத்தது?’- கர்நாடக அரசிடம் உயர் நீதிமன்றம் சரமாரி கேள்வி

பெங்களூரு எம். சின்னசாமி மைதானத்தில் நடந்த கூட்ட நெரிசல் சம்பவம் தொடர்பாக கர்நாடக உயர் நீதிமன்றம், மாநில அரசுக்கு ஒன்பது கேள்விகளை எழுப்பியுள்ளது. ஐ.பி.எல். கோப்பையை வென்ற ராயல் சேலஞ்சர்ஸ் பெங்களூரு (ஆர்.சி.பி) அணிக்கு பாராட்டு விழா நடைபெற்றபோது ஏற்பட்ட கூட்ட நெரிசலில் 11 பேர் உயிரிழந்தனர். இந்த சம்பவம் தொடர்பாக ஓய்வுபெற்ற உயர் நீதிமன்ற நீதிபதி ஜான் மைக்கேல் குன்ஹா தலைமையில் விசாரணைக்கு கர்நாடக அரசு உத்தரவிட்டுள்ளது.

இந்தச் செய்தியை ஆங்கிலத்தில் படிக்க கிளிக் செய்யவும்

தலைமை நீதிபதி வி. காமேஸ்வர் ராவ் மற்றும் நீதிபதி சி.எம். ஜோஷி ஆகியோர் அடங்கிய அமர்வு, சில கேள்விகளை எழுப்பியது. ஜூன் 10-ஆம் தேதிக்குள் இவற்றுக்கு பதிலளிக்க உத்தரவிடப்பட்டுள்ளது.

வெற்றி கொண்டாட்டத்தை நடத்த யார் முடிவெடுத்தது?

எந்த முறையில், எப்போது இது நடத்தப்பட்டது?

நிகழ்வை ஏற்பாடு செய்ய ஏதேனும் அனுமதி கோரப்பட்டதா?

ஏதேனும் விளையாட்டு நிகழ்வு அல்லது இதுபோன்ற கொண்டாட்டங்களில் 50,000 மற்றும் அதற்கு மேற்பட்ட கூட்டத்தை நிர்வகிக்க நிலையான இயக்க நடைமுறை (SOP) வகுக்கப்பட்டுள்ளதா?

போக்குவரத்தை ஒழுங்குபடுத்த என்ன நடவடிக்கைகள் எடுக்கப்பட்டன?

பொதுமக்கள்/கூட்டத்தை ஒழுங்குபடுத்த என்ன நடவடிக்கைகள் எடுக்கப்பட்டன?

நிகழ்வு நடைபெறும் இடத்தில் என்ன மருத்துவ மற்றும் பிற வசதிகள் ஏற்பாடு செய்யப்பட்டிருந்தன?

கொண்டாட்டத்தின் போது எவ்வளவு பேர் இருப்பார்கள் என்பது குறித்து முன்கூட்டியே ஏதேனும் மதிப்பீடு செய்யப்பட்டதா?

காயமடைந்தவர்களுக்கு நிகழ்வு நடைபெற்ற இடத்தில் மருத்துவ நிபுணர்களால் உடனடியாக மருத்துவ உதவி வழங்கப்பட்டதா? இல்லையென்றால் ஏன்?

காயமடைந்தவர்களை மருத்துவமனைக்கு கொண்டு செல்ல எவ்வளவு நேரம் ஆனது?

உயர் நீதிமன்றத்தின் இந்த கேள்விகள், கர்நாடக முதலமைச்சர் சித்தராமையா தனது சட்ட ஆலோசகர் ஏ.எஸ். பொன்னண்ணா மற்றும் மாநில அட்வகேட் ஜெனரல் கே.எம். சஷிகிரண் ஷெட்டி ஆகியோருடன் ஆலோசனை நடத்தியதைத் தொடர்ந்து, பெங்களூரு போலீஸ் கமிஷனர் உட்பட ஐந்து போலீஸ் அதிகாரிகள் ஜூன் 6 அன்று இடைநீக்கம் செய்யப்படுவதற்கு வழிவகுத்தது என்று தகவல்கள் தெரிவிக்கின்றன.

கர்நாடக மாநில கிரிக்கெட் சங்கம் (KSCA) மற்றும் அரசுக்கு இடையேயான தகவல்தொடர்புகள், ஆர்.சி.பி-யின் சமூக ஊடக பதிவுகள் மற்றும் பெங்களூரு போக்குவரத்து காவல்துறை, அத்துடன் போலீஸ் எஃப்.ஐ.ஆர்-களில் உள்ள அறிக்கைகள் ஆகியவற்றிலிருந்து பகுப்பாய்வு செய்யப்பட்ட நிகழ்வுகள் சில தகவல்கள் கிடைக்கப்பெற்றுள்ளன. அதன்படி, ஐ.பி.எல் இறுதிப் போட்டியில் பஞ்சாப் சூப்பர் கிங்ஸை, ஆர்.சி.பி  வென்றால், ஜூன் 4 அன்று அரசாங்கத் தலைமையகமான விதான சவுதாவில் முதல்வர் மற்றும் துணை முதல்வரால் ஆர்.சி.பி அணிக்கு பாராட்டு விழா நடத்த ஜூன் 3 அன்று கிரிக்கெட் சங்கம் அனுமதி கோரியுள்ளது.

கே.எஸ்.சி.ஏ தலைமை நிர்வாக அதிகாரி சுபெந்து கோஷ், நிகழ்வு மேலாண்மை நிறுவனமான டி.என்.ஏ நெட்வொர்க் சார்பாக விதான சவுதாவில் ஆர்.சி.பி வீரர்களுக்கு பாராட்டு விழா நடத்த அனுமதி கோரி ஜூன் 3 அன்று அரசு பணியாளர் மற்றும் நிர்வாகத் துறைக்கு (DPAR) கோரிக்கை விடுத்தார்.

டி.பி.ஏ.ஆர் ஜூன் 4 அன்று, இதற்கு பதிலளித்தது. அதன்படி, விதான சவுதாவின் நுழைவாயில்களைப் பாதுகாக்க 16 நிபந்தனைகளுடன் நிகழ்வுக்கு அனுமதி அளித்தது. சித்தராமையா மற்றும் துணை முதல்வர் டி.கே. சிவகுமார் கலந்து கொள்ளும் இந்த நிகழ்வு ஜூன் 4 அன்று மாலை நடத்தப்பட இருந்தது.

சித்தராமையாவின் அரசியல் செயலாளர் கே. கோவிந்தராஜு, விதான சவுதா நிகழ்வை நடத்த அரசாங்கத்தின் உயர் மட்டங்களில் முடிவெடுப்பதில் செல்வாக்கு செலுத்தியதாக கூறப்படுகிறது.

மாலை 4 மணிக்கு விதான சவுதா நிகழ்வுக்கு அரசு அனுமதி அளித்த போதிலும், பெங்களூரு காவல்துறை - அனுமதி வழங்கும் அதிகாரம் - கூட்டம் கட்டுப்பாடு குறித்த அச்சங்கள் காரணமாக விதான சவுதாவிலிருந்து சின்னசாமி மைதானத்திற்கு ஆர்.சி.பி ரசிகர்களுக்கான வெற்றி அணிவகுப்பிற்கு அனுமதி வழங்கவில்லை.

காவல்துறையால் அதிகாரப்பூர்வ அனுமதி வழங்கப்படாவிட்டாலும், ஆர்.சி.பி நிர்வாகம் ஜூன் 4 ஆம் தேதி காலை 7.01 மணிக்கு ஒரு வெற்றி அணிவகுப்பை ஒருதலைப்பட்சமாக அறிவித்தது. இது ரசிகர்களிடையே பெரும் எதிர்பார்ப்பை தூண்டியது.

ஆர்.சி.பி/கே.எஸ்.சி.ஏ ஜூன் 4 ஆம் தேதி காலை 10.30 மணியளவில் ஒரு பத்திரிகை செய்தியை வெளியிட்டது. அதில் மாலை 4 மணிக்கு விதான சவுதாவில் சித்தராமையாவால் பாராட்டு விழா, மாலை 5 மணியளவில் வெற்றி அணிவகுப்பு மற்றும் மாலை 6 மணிக்கு எம். சின்னசாமி மைதானத்தில் பாராட்டு விழா நடைபெறும் என்று குறிப்பிடப்பட்டது.

எக்ஸ் தளத்தில் உள்ள பெங்களூரு போக்குவரத்து காவல்துறையின் தகவலின் படி, மாலை 2.45 மற்றும் 3.30 மணியளவில் சின்னசாமி மைதானத்தில் மாலை 5 மணிக்கு நடைபெறும் பாராட்டு விழா குறித்து இரண்டு போக்குவரத்து ஆலோசனைகள் வெளியிடப்பட்டதாகவும், வெற்றி அணிவகுப்பு பற்றி குறிப்பிடப்படவில்லை என்றும் காட்டுகிறது.

கர்நாடக அரசு, ஐந்து போலீஸ் அதிகாரிகளை இடைநீக்கம் செய்தபோது, ஆர்.சி.பி தலைமை நிர்வாக அதிகாரி ஜூன் 3 அன்று பெங்களூரு போலீஸ் கமிஷனரிடம் ஜூன் 4 அன்று வெற்றி அணிவகுப்பு மற்றும் கொண்டாட்டங்களை நடத்துவது குறித்து தெரிவித்திருந்தாலும், "அனுமதியை நிராகரித்து" அமைப்பாளர்களுக்கு காவல்துறை எழுத்துப்பூர்வ பதில் அளிக்கத் தவறிவிட்டது என்று கூறியது.

இப்போது இடைநீக்கம் செய்யப்பட்டுள்ள போலீஸ் இன்ஸ்பெக்டர் ஏ.கே. கிரிஷ், கப்பன் பார்க் காவல் நிலையத்தில் உயிரிழப்புகள் குறித்து தாக்கல் செய்த ஒரு எஃப்.ஐ.ஆர்-இல், ஆர்.சி.பி சார்பாக எம். சின்னசாமி மைதானத்தில் ஒரு நிகழ்விற்காக ஜூன் 3 அன்று கோஷ் காவல்துறையை அணுகினார் என்று கூறப்படுகிறது.

ஆர்.சி.பி, கே.எஸ்.சி.ஏ மற்றும் டி.என்.ஏ நெட்வொர்க் ஆகியவற்றுக்கு எதிராக ஜூன் 5 அன்று பல பிரிவுகளின் கீழ் எஃப்.ஐ.ஆர் பதிவு செய்த பெங்களூரு காவல்துறை, வெள்ளிக்கிழமை ஆர்.சி.பி மார்கெட்டிங் தலைவர் ஒருவரையும், ஒரு மூத்த டி.என்.ஏ அதிகாரியையும் கைது செய்தது.

இதற்கிடையில், வெள்ளிக்கிழமை, கர்நாடக உயர் நீதிமன்றம், இந்த வழக்கில் முன்னாள் கிரிக்கெட் வீரர் ரகுராம் பட் உட்பட மூன்று கே.எஸ்.சி.ஏ அதிகாரிகளுக்கு கைது செய்வதிலிருந்து நிபந்தனைக்குட்பட்ட இடைக்கால பாதுகாப்பை வழங்கியது.

கே.எஸ்.சி.ஏ அதிகாரிகள் தங்கள் உயர் நீதிமன்ற மனுவில், ஆர்.சி.பி வென்றால் கொண்டாட்ட நிகழ்வை நடத்துவது குறித்து டி.என்.ஏ அதிகாரிகள் ஜூன் 3 அன்று பெங்களூரு காவல்துறையுடன் ஒரு சந்திப்பை நடத்தினர் என்று கூறினர். கே.எஸ்.சி.ஏ மற்றும் டி.என்.ஏ அதிகாரிகள் சித்தராமையா மற்றும் மாநில தலைமை செயலாளரை விதான சவுதாவில் நடத்தப்படும் நிகழ்வுக்கு அரசாங்க ஆதரவுக்காக சந்தித்தனர் என்றும் மனு கூறுகிறது.

"வெற்றியை கொண்டாடுவது உண்மையில் அரசாங்கத்தின் அழைப்பாகும். ஏனெனில் முதல்வர், துணை முதல்வர் மற்றும் பல அமைச்சர்கள் முன்னிலையில் விதான சவுதாவில் வீரர்களை பாராட்டிய போது, அனைத்து செயலக மற்றும் காவல் துறை உயர் அதிகாரிகளும் உடனிருந்தனர்," என்று கே.எஸ்.சி.ஏ மனு கூறுகிறது.

கர்நாடக அரசு, இந்த விவகாரம் தொடர்பாக ஓய்வுபெற்ற உயர் நீதிமன்ற நீதிபதி ஜான் மைக்கேல் குன்ஹா தலைமையில் விசாரணை நடத்த உத்தரவிட்டது. பெங்களூரு பிராந்திய துணை ஆணையரால் ஒரு மாஜிஸ்திரேட் விசாரணைக்கும் அரசு உத்தரவிட்டுள்ளது.