போலீசை 15 வினாடிகள் அகற்றுங்கள்… பா.ஜ.க தலைவர் சர்ச்சை பேச்சு; ஓவைசி கண்டனம்

ஐதராபாத் லோக்சபா வேட்பாளர் மாதவி லதாவுக்காக, ஐதராபாத்தில், பா.ஜ.க, தலைவர் நவநீத் ராணா புதன்கிழமை பிரசாரம் செய்தபோது, பேசியது சர்ச்சையை ஏற்படுத்தியுள்ளது. 2012 ஆம் ஆண்டு தெலுங்கானாவின் நிர்மலில் ஏ.ஐ.எம்.ஐ.எம் (AIMIM) தலைவர் அக்பருதீன் ஓவைசி ஆற்றிய உரையில், 15 நிமிடங்களுக்கு காவல்துறையை அகற்றினால், 100 கோடி இந்துக்களுக்கு என்ன செய்ய முடியும் என்பதை அவரது சமூகம் காண்பிக்கும் என்று கூறியதைக் குறிப்பிட்டு நவநீத் ராணா, “காவல்துறையை 15 நிமிடங்களுக்கு அகற்றுங்கள், அதனால் அவர்கள் என்ன செய்ய முடியும் என்பதை அவர்கள் காட்ட முடியும் என்று அக்பருதீன் கூறினார்... நான் சொல்கிறேன், இதற்கு உங்களுக்கு 15 நிமிடங்கள் ஆகலாம் ஆனால் அதற்கு எங்களுக்கு 15 வினாடிகள் மட்டுமே ஆகும்," என்று கூறினார்.

ஆங்கிலத்தில் படிக்க: ‘Remove police for 15 seconds…’: BJP leader’s comments in Hyderabad prompt Owaisi backlash, he says ‘give her one hour’

மே 8 ஆம் தேதி நவநீத் ராணா பல பா.ஜ.க தலைவர்களுடன் பிரச்சாரத்தில் ஈடுபட்டபோது இந்த கருத்துக்களைக் கூறினார். அவரது கருத்துக்களுக்கு பதிலளித்த ஏ.ஐ.எம்.ஐ.எம் தலைவர் அசாதுதீன் ஒவைசி, “நான் மோடியிடம் சொல்கிறேன், அவருக்கு (நவநீத் ராணா) 15 வினாடிகள் கொடுங்கள். உங்களால் என்ன செய்ய முடியும்? அவருக்கு 15 வினாடிகள் கொடுங்கள், அவருக்கு ஒரு மணி நேரம் கொடுங்கள். உங்களிடம் மனிதாபிமானம் இருக்கிறதா என்றும் பார்க்க விரும்புகிறோம். யாருக்கு பயம்? நாங்கள் அனைவரும் தயாராக இருக்கிறோம். யாராவது இப்படி பொது வெளியில் பேசினால், அது அப்படியே இருக்கட்டும். பிரதமர் உங்களுடையவர், ஆர்.எஸ்.எஸ் (RSS) உங்களுடையது, எல்லாம் உங்களுடையது. முடிந்தால் செய்யுங்கள். உங்களை யார் தடுப்பது? நாங்கள் எங்கு வர வேண்டும் என்று சொல்லுங்கள், நாங்கள் அங்கு வருகிறோம், அதைச் செய்யுங்கள்,” என்று கூறினார்.

லதா வெற்றி பெற்று ஹைதராபாத் பாகிஸ்தானாக மாறாமல் தடுப்பார் என்றும் நவநீத் ராணா தனது உரையில் கூறியுள்ளார். “நீங்கள் ஏ.ஐ.எம்.ஐ.எம் அல்லது காங்கிரஸுக்கு வாக்களித்தால், அது பாகிஸ்தானுக்குச் செல்லும். பாகிஸ்தான் ஏ.ஐ.எம்.ஐ.எம் மற்றும் ராகுல் மீது அன்பு காட்டுகிறது. பாகிஸ்தானின் வழிகாட்டுதலின்படி இந்த நாட்டை காங்கிரஸ் ஆட்சி செய்துள்ளது,” என்று நவநீத் ராணா கூறினார்.

விரிஞ்சி மருத்துவமனையின் தலைவரான லதா, நான்கு முறை எம்.பி.யாக இருந்த ஓவைசியை எதிர்கொள்கிறார், இது ஒரு கசப்பான மற்றும் மிகவும் கடுமையான பிரச்சாரமாக உருவெடுத்துள்ளது. பா.ஜ.க.வுக்கு இது ஒரு மலையேறும் பணி. 2019 தேர்தலில், ஒவைசி 2,82,186 வாக்குகள் வித்தியாசத்தில் பா.ஜ.க.,வின் பகவந்த் ராவ் பவாரை தோற்கடித்தார். ஓவைசி 5,17,471 வாக்குகள் பெற்றிருந்தார்.

கடந்த மாதம், ஸ்ரீராம நவமி பேரணியின் போது, மசூதியைப் பார்த்து அம்பு எய்வது போல் சைகை செய்ததாகக் கூறப்படும் வீடியோ வைரலானதை அடுத்து, லதா மன்னிப்பு கேட்டார். இந்த வீடியோ சமூக வலைதளங்களில் வைரலானதால், லதா கூறுகையில், “எனது வீடியோ ஒன்று எதிர்மறையை உருவாக்கும் வகையில் ஊடகங்களில் பரப்பப்படுவது எனது கவனத்திற்கு வந்தது. இது முழுமையற்ற பார்வை என்பதை நான் தெளிவுபடுத்த விரும்புகிறேன். ஆனால், யாருடைய மனதையாவது புண்படுத்தியிருந்தால், எல்லாத் தனிமனிதர்களையும் மதிப்பதால், மன்னிப்புக் கேட்க விரும்புகிறேன்,” என்று கூறினார். அதேநேரம் அவரது செயல் மோசமானது மற்றும் ஆத்திரமூட்டும் செயல் என்று ஓவைசி கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“