தெலங்கானா முதல்வராகும் ரேவந்த் ரெட்டி; தீவிர விசுவாசி, திறமையான பேச்சாளர்; முழு பின்னணி

Sreenivas Janyala

தெலங்கானா மாநில காங்கிரஸ் கமிட்டி தலைவரும், விரைவில் முதல்வராகப் போகும் அனுமுலா ரேவந்த் ரெட்டி மற்றும் பாரதிய ஜனதா கட்சியின் முன்னணித் தலைவரும், சமீப காலம் வரை மாநிலத்தின் மிகப்பெரிய நம்பிக்கையாக இருப்பவருமான பாண்டி சஞ்சய் குமார் ஆகியோருக்கு இடையே இணையை உருவாக்குவது எளிது.

ஆங்கிலத்தில் படிக்க: Revanth Reddy: Fiercely loyal and loyally fierce, the Telangana CM-elect’s trial by fire

இருவருமே தேர்தலுக்கு முந்தைய ஆண்டு முழுவதும் வெளிச்சத்திற்கு வந்த தலைவர்கள், மாநிலத்தில் ஆளும் மற்றும் பரவலாக உள்ள பாரத ராஷ்டிர சமிதிக்கு (BRS) எதிராக ஆக்ரோஷமான குற்றச்சாட்டுகளை முன்வைத்தவர்கள். இருவரும் முறையே 56 மற்றும் 52 வயதுடன் அரசியல் தரத்தின்படி இளைஞர்கள். மேலும் இருவரும் திறமையான பேச்சாளர்கள்.

ஆனால் இங்கே ஒப்பீடு முடிகிறது. பாண்டி சஞ்சய் குமார் தனது இந்துத்துவா வாய்வீச்சால் தனது முத்திரையைப் பதித்து, பா.ஜ.க முன்னிலையில் இல்லாத மாநிலத்தில், மாநிலத் தலைவர் பதவியிலிருந்து திடீரென நீக்கப்படும் வரை, பா.ஜ.க.,வை கடுமையாக முன்னேறச் செய்தவர் என்றால், ரேவந்த் பெரும்பாலும் பழைய அரசியல்வாதிகளின் பாணியில் பேசுபவர், அதாவது பார்வையாளர்களுடன் இணைவதற்கு உணர்ச்சிகள் மற்றும் நேரடி தாக்குதல்களுடன் பேச்சுத்திறன் கலந்து பேசுபவர்.

கட்சியில் நீண்ட காலம் இருந்து வருபவர்கள் மற்றும் அதிக அனுபவம் கொண்ட தலைவர்களின் கோரிக்கைகளை ஒதுக்கி வைத்துவிட்டு, ரேவந்த் ரெட்டியை முதல்வராக தேர்வு செய்ய வேண்டும் என்ற காங்கிரஸின் முடிவு, பலருக்கு அவரது சபதத்தை நினைவுக்கு கொண்டு வந்தது, செர்லப்பள்ளி மத்திய சிறையில் சில காலம் இருந்த பின் ஜாமீனில் வெளிவந்த ரேவந்த் ரெட்டி, ஒரு நாள், பி.ஆர்.எஸ் தலைவர் கே.சந்திரசேகர் ராவ்க்கு தெலங்கானாவில் எந்த அரசியல் தளமும் இல்லாமல் இருப்பதை உறுதி செய்வேன் என்று சபதம் எடுத்தார்.

முரண்பாடாக, ரேவந்த் ரெட்டியின் விரைவான வளர்ச்சிக்கு BRS அரசாங்கத்தின் இடைவிடாத நாட்டம் ஒரு பெரிய காரணியாக இருந்தது என்று வாதிடலாம். ஏ.பி.வி.பி தலைவராகத் தொடங்கி, 2017-ல் காங்கிரஸில் சேருவதற்கு முன்பு, அதாவது ஆறு ஆண்டுகளுக்கு முன்பு வரை ரேவந்த் ரெட்டி தெலுங்கு தேசம் கட்சியில் நீண்ட காலம் இருந்தார். ஜூன் 2021 இல் காங்கிரஸ் கட்சி அவரை தெலங்கானா தலைவராகத் தேர்ந்தெடுத்தபோது, அவர் பிரபலமான தலைவர் இல்லை, காங்கிரஸில் சிலருக்கு மட்டுமே அவரைப் பற்றி நன்றாகத் தெரியும் நிலை இருந்தது.

ரேவந்த் ரெட்டிக்கு எதிரான நடவடிக்கைகளில் முதன்மையானது, 2018 டிசம்பரில் கோசி பகுதிக்கு கே.சி.ஆரின் வருகைக்கு எதிரான போராட்டங்களுக்கு அழைப்பு விடுத்ததன் பேரில், பூர்வீக கோடங்கலில் உள்ள அவரது வீட்டில் வீட்டுக் காவலில் ரேவந்த் ரெட்டி வைக்கப்பட்டார். மார்ச் 2020 இல், கே.சி.ஆரின் மகனும் பி.ஆர்.எஸ் செயல் தலைவருமான கே.டி.ராமராவ் சட்டவிரோதமாக கட்டியதாகக் கூறப்படும் பண்ணை வீட்டின் மீது ஆளில்லா விமானத்தை பறக்கவிட்டு தனித்துவமான போராட்டத்தை நடத்தியதற்காக 14 நாட்கள் நீதிமன்ற காவலில் இருந்தார்.

டிசம்பர் 2020 மற்றும் மார்ச் 2023 க்கு இடையில், ரேவந்த் ரெட்டியின் பிரபலம் தொடர்ந்து அதிகரித்து வந்தாலும், ஏழு முறை அவர் வீட்டுக் காவலில் வைக்கப்பட்டார் அல்லது போராட்டத்திற்குச் செல்லும்போது வீட்டை விட்டு வெளியேற விடாமல் போலீஸாரால் தடுக்கப்பட்டார்.

ஜூலை 2021 இல், அரசு நிலங்களை மின்னணு ஏலத்தில் எடுத்ததில் ரூ. 1,000 கோடி ஊழல் நடந்ததாகக் கூறப்படும் குற்றச்சாட்டை எதிர்த்து நடைபெறவிருந்த போராட்டத்திற்கு முன்னதாக, ஹைதராபாத்தில் உள்ள ஜூப்லி ஹில்ஸில் உள்ள அவரது இல்லத்தில் தடுத்து வைக்கப்பட்டார். 2021 டிசம்பரில், நெல் கொள்முதலுக்காக பூபாலப்பள்ளியில் நடந்த விவசாயிகள் போராட்டத்தில் கலந்து கொள்ளச் சென்றபோது, ​​போலீசார் அவரை மீண்டும் வீட்டுக் காவலில் வைத்தனர்.

BRS அரசாங்கம் அதன் கொள்கைகளின் ஒரு பகுதியாக பயிர்களை நடவு செய்ய விவசாயிகளை ஊக்குவித்த பின்னர், போதிய நெல் கொள்முதல் இல்லாததால் பரவலான கோபத்தை எதிர்கொண்டது.

தெலுங்கானா மாநில அரசுப் பணியாளர் தேர்வாணையம் (TSPSC) நடத்திய தொடர்ச்சியான தேர்வுகளில் வினாத் தாள்கள் கசிந்த விவகாரத்தைக் கையில் எடுத்தப்போது, கவனிக்க வேண்டிய முகமாக ரேவந்த் ரெட்டி இந்த ஆண்டு முழுவதும் வெளிச்சத்தில் இருந்தார். மார்ச் 22 அன்று, போலீசார் அவரது வீட்டை சோதனையிட்டனர் மற்றும் ரேவந்த் ரெட்டியை உஸ்மானியா பல்கலைக்கழகத்தில் போராட்டம் நடத்தி வரும் மாணவர்களுக்கு ஆதரவு தெரிவிக்கச் செல்ல விடாமல் தடுத்தனர். அதைத் தொடர்ந்து வன்முறையான போராட்டங்கள் நடந்தன, ரேவந்த் ரெட்டி அதற்கு ஆதரவாக நின்றார்.

கிராம பஞ்சாயத்துகளுக்கு 15 வது நிதி கமிஷன் வழங்கிய நிதியை வழங்காததற்காக பி.ஆர்.எஸ் அரசாங்கத்தின் மீது கோபமடைந்த சர்பஞ்ச்களுக்கு (பஞ்சாயத்து தலைவர்கள்) ஆதரவாக காங்கிரஸ் நடத்திய ஒரு பெரிய போராட்டத்திற்கு தலைமை தாங்கியதற்காக ரேவந்த் ரெட்டி கைது செய்யப்பட்டார்.

ஒருபக்கம் பி.ஆர்.எஸ் அரசாங்கம் அவரை குறிவைத்தாலும், மாநில காங்கிரஸில் கசப்பான பிளவு ஏற்பட்டதால், ரேவந்த் ரெட்டி கட்சியில் பல்வேறு எதிர்ப்புகளை எதிர்கொண்டார். உள்ளூர் தலைவர்கள் ரேவந்த் ரெட்டி "எதேச்சதிகாரமாக" செயல்படுவதாகவும் மற்றும் "சொந்த ஆதரவாளர்களை ஊக்குவிப்பதாகவும்" உயர் தலைமையிடம் புகார் அளித்ததாக கூறப்படுகிறது. கோமதிரெட்டி ராஜ் கோபால் ரெட்டி போன்ற சில தலைவர்கள் காங்கிரஸில் இருந்து விலகினர், ஆனால் அவர் தற்போதைய தேர்தலுக்கு முன்பு மீண்டும் இணைந்தார்.

கோமதிரெட்டி சகோதரர்களுக்கும் ரேவந்த் ரெட்டிக்கும் இடையே கடும் போட்டி நிலவியதால், முனுகோடிலோ அல்லது நல்கொண்டாவிலோ காலடி எடுத்து வைக்க வேண்டாம் என்று அவர்கள் ரேவந்த் ரெட்டியை எச்சரித்தனர். அகில இந்திய காங்கிரஸ் தலைவர்களின் அறிவுறுத்தல்களுக்குப் பிறகு, ரேவந்த் ரெட்டி தனது வழிகளை சரிசெய்வதாக உறுதியளித்தார், மேலும் கட்சி சகாக்களுடன் தனது உறவில் கனிந்தார், அதே நேரத்தில் கே.சி.ஆர் மற்றும் பி.ஆர்.எஸ் மீதான தனது தாக்குதல்களை கூர்மைப்படுத்தினார், குறிப்பாக பல்வேறு திட்டங்களில் ஊழல் தொடர்பாக கடுமையாக விமர்சித்தார்.

"அவரது தாக்குதல்கள் சரியான நேரத்தில் இருந்தது மற்றும் கூர்மையானவை, மேலும் அவர் பயன்படுத்திய வலிமையான மொழி தாக்கத்தை ஏற்படுத்தியது. BRS அமைச்சர்களும் தலைவர்களும் அதீத நம்பிக்கை கொண்டிருந்தார்களா, அல்லது அவர்கள் வெல்லமுடியாது என்ற மனநிறைவுடன் இருந்தார்களா என்று எனக்குத் தெரியவில்லை, ஆனால், அவர்கள் ரேவந்த் ரெட்டியை திறம்பட எதிர்க்கவில்லை. இது அவர் கே.சி.ஆர் அரசாங்கத்தை அகற்றப் போகிறார் என்ற உறுதியான தோற்றத்தை உருவாக்க முடிந்தது,'' என்று ஒரு தலைவர் கூறினார்.

I wholeheartedly express my gratitude to honourable AICC president

Shri @kharge ji, Mother of Telangana our beloved #Soniamma , ever inspiring leader @RahulGandhi ji, charismatic @priyankagandhi ji, AICC General Secretary (Org) @kcvenugopalmp ji, deputy CM of Karnataka… pic.twitter.com/Kl50cQHxih

— Revanth Reddy (@revanth_anumula) December 5, 2023

ஆக்ரோஷமான ரேவந்த் ரெட்டி போன்ற தலைமை, புதிய காற்றின் சுவாசம் போல் காங்கிரஸுக்கு, கட்சி எதிர்ப்புகள் மற்றும் நிகழ்ச்சிகளுக்கு ஒரு வீரியத்தை அளித்தது. திடீரென்று எங்கு பார்த்தாலும் காங்கிரசுதான் என்று தோன்றியது.

அண்டை மாநிலமான கர்நாடகாவில் காங்கிரஸின் பெரிய வெற்றியுடன் இரண்டாவது ஊக்கம் வந்தது, காங்கிரஸ் கட்சிக்கான நேரம் வந்துவிட்டது என்ற ரேவந்த் ரெட்டியின் செய்தி, இனி வெறும் ஆசையாகத் தெரியவில்லை.

பி.ஆர்.எஸ் மீது மென்மையான அணுகுமுறை கொண்ட ஒரு தலைவரான ஜி கிஷன் ரெட்டியை ஜூலை மாதம் பா.ஜ.க கட்சி பாண்டி சஞ்சய் குமாருக்குப் பதிலாக நியமித்தபோது மூன்றாவது ஊக்கம் ஏற்பட்டது. 2024 லோக்சபா தேர்தல் ஒப்பந்தத்திற்காக BRSக்கு பா.ஜ.க கதவுகளைத் திறந்து வைத்திருப்பதாகத் தெரிகிறது. அதேநேரம், பி.ஆர்.எஸ், பா.ஜ.க மற்றும் ஏ.ஐ.எம்.ஐ.எம் ஆகியவை இரகசிய உறவில் உள்ளன என்ற கோட்பாட்டை வலுப்படுத்த காங்கிரஸ் இதைப் பயன்படுத்தியது, இது தலைவர்கள் விலகலோடு அல்லாமல் முஸ்லீம் வாக்குகளையும் BRS கட்சியிடமிருந்து விலக்கியது.

தெலங்கானாவுடன் தேர்தல் நடந்த மற்ற மாநிலங்களிலும், கட்சி பிரச்சாரத்தை வழிநடத்த ஆற்றல் மிக்க தலைவர்களுக்கு காங்கிரஸில் குறைவில்லை (சமீபத்தில் அக்கட்சிக்கு இல்லாத ஒன்று) தான். ஆனால் ரேவந்த் ரெட்டி வெற்றி பெற்றதற்கு காரணம், காங்கிரஸூக்கு சாதகமான சூழ்நிலையை இழக்காமல், அரசியல் சாமர்த்தியத்தையும் முதிர்ச்சியையும் வெளிப்படுத்தி, பிளவுபட்ட கட்சியை ஒரே போர் இயந்திரமாக மாற்றியது தான். இது அவருக்கு போட்டியாக இருந்த கட்சியான பி.ஆர்.எஸ் கட்சி, பா.ஜ.க.,வைப் போல வலிமையான ஒரு ஒழுங்கமைக்கப்பட்ட பிரச்சாரகர் அல்ல என்று வெளிப்படுத்துவதற்கு உதவியது, மேலும் உயர் தலைமை, குறிப்பாக ராகுல் காந்தி, உள்ளிட்டோர் ரேவந்த் ரெட்டியை உறுதியாக ஆதரித்தனர்.

பிரச்சாரத்திலும், 56 வயதான ரேவந்த் ரெட்டி சளைக்காமல், தினமும் குறைந்தது நான்கு பேரணிகளில் உரையாற்றினார், காங்கிரஸின் செய்தியை அனைத்து வீடுகளுக்கும் கொண்டு சேர்த்தார், பி.ஆர்.எஸ் எம்.எல்.ஏ.,க்களை தாக்கி பேசினார், ஊழல் குற்றச்சாட்டுகளை எழுப்பினார், மேலும் காங்கிரஸின் "ஆறு உத்தரவாதங்கள்" மற்றும் திட்டங்கள் பற்றி மக்களை திறம்பட நம்பவைத்தார்.

Congress President Shri @kharge has decided to go with Revanth Reddy as the new CLP of the Telangana Legislative Party. 



The Congress will deliver a clean and able government that will provide maximum governance. 



: Shri @kcvenugopalmp, General Secretary (Organisation) pic.twitter.com/njFUduUFsb

— Congress (@INCIndia) December 5, 2023

நவம்பர் 30 தேர்தலுக்கு ஒரு பதினைந்து நாட்களுக்கு முன்பு, இந்த நிருபர் எங்கு சென்றாலும், நகரங்கள் மற்றும் கிராமங்களில் உள்ளவர்கள் ரேவந்த் ரெட்டியைப் பற்றி பேசவோ அல்லது கேட்கவோ அவரை நிறுத்துவார்கள்.

பி.ஆர்.எஸ் தலைவரும், முன்னாள் அமைச்சருமான தலசானி ஸ்ரீனிவாஸ் யாதவ் தனது மனமார்ந்த பாராட்டுக்களை தெரிவித்துள்ளார். “தெலுங்கு தேசம் கட்சியில் நாங்கள் ஒன்றாக இருந்தோம். அந்த நேரத்தில் ரேவந்த் ரெட்டி இன்னும் போராடிக் கொண்டிருந்தார், ஆனால் அதன் பிறகு அவர் மிகவும் முதிர்ச்சியடைந்துள்ளார்,” என்று அவர் கூறுகிறார்.

தெலுங்கு தேசம் கட்சியின் (ஆந்திரப் பிரதேசம்) தலைவர் கே.பட்டாபி ராமிடம் தனது முன்னாள் சக ஊழியரான ரேவந்த் ரெட்டியைப் பற்றிச் சொல்ல நல்ல வார்த்தைகள் மட்டுமே உள்ளன, ரேவந்த் ரெட்டி மிகவும் தாழ்மையான பின்னணியில் இருந்து வளர்ந்தவர் என்று அவர் சுட்டிக்காட்டினார். “ரேவந்த் ரெட்டி மிகவும் கண்ணியமான அரசியல்வாதி. அவர் ஒரு அரசியல் எதிரியைத் தாக்க கடுமையான வார்த்தைகளைப் பயன்படுத்தலாம், ஆனால் அவர் மிகவும் குரல் கொடுப்பவர், மிகவும் ஆக்ரோஷமானவர் என்பதால் அது எதிர்பார்க்கப்படுகிறது. அவரது முக்கிய பலம் அவரது விசுவாசம்... அவர் தெலுங்கு தேசம் கட்சிக்கும் சந்திரபாபு நாயுடுவுக்கும் மிகவும் விசுவாசமாக இருந்தார். துரதிர்ஷ்டவசமான சூழ்நிலையில் அவர் வெளியேறினாலும், அவர் ஒருபோதும் தெலுங்கு தேசம் கட்சியை மோசமாகப் பேசவில்லை... இப்போதும் கூட அவர் தெலுங்கு தேசம் கட்சியில் தான் பணியாற்றிய தலைவர்களுடன் நல்ல உறவைப் பேணி வருகிறார்,” என்று பட்டாபி ராம் கூறினார்.

ரேவந்த் எப்போதும் சிறந்த பேச்சாளராக இருந்தார் மற்றும் மறைந்த காங்கிரஸ் முதல்வர் ஒய்.எஸ் ராஜசேகர ரெட்டியை எதிர்கொள்வதில் சந்திரபாபு நாயுடுவுக்கு அடுத்தபடியாக இரண்டாம் இடத்தில் இருந்தார் என்று பட்டாபி ராம் கூறுகிறார். "அவரால் ஒரு கூட்டத்தை உருவாக்க முடியும்... ஆனால் அவர் மிகவும் உன்னிப்பாகவும் இருக்கிறார். சட்டமன்ற கூட்டங்கள் அல்லது அரசியல் கூட்டங்கள் அல்லது கூட்டங்கள் என எதுவாக இருந்தாலும் அவர் கடினமாக தயார் செய்துக் கொள்கிறார்,” என்று பட்டாபி ராம் கூறினார்.

కాంగ్రెస్ పార్టీ ఆరు గ్యారెంటీలకు తోడు… ఏడో గ్యారెంటీగా ప్రజాస్వామ్యబద్దమైన పాలన అందిస్తామని హామీ ఇచ్చింది.



ఆ మాటకు కట్టుబడి ప్రజాస్వామ్య విలువల పరిరక్షణలో రాజీ పడబోమని ప్రజలకు మరోసారి మాట ఇస్తున్నాం.



ప్రతిపక్ష పార్టీలను కూడా సమన్వయం చేసుకుని అభివృద్ధిలో రాష్ట్రాన్ని… pic.twitter.com/dPal9EFbXM

— Revanth Reddy (@revanth_anumula) December 3, 2023

ரேவந்த் ரெட்டியின் நண்பர்கள், அவர் இந்த ஆண்டு 24x7 அரசியலில் வாழ்ந்ததாகத் தோன்றினாலும், அவர் ஒரு "குடும்ப மனிதன்" என்று கூறுகிறார்கள். அவரது மனைவி கீதா ரெட்டி மறைந்த ஜனதா கட்சி தலைவரும் மத்திய அமைச்சருமான ஜெய்பால் ரெட்டியின் மருமகள் ஆவார். ரேவந்த் ரெட்டி இளைஞர் காங்கிரஸில் மாணவராக இருந்தபோது இருவரையும் அடுத்தடுத்து சந்தித்ததாக கூறப்படுகிறது, முதலில் ஜெய்பால் ரெட்டி அறிமுகம் மூலம், கீதாவுடன் அறிமுகமாகியுள்ளார். "ஆரம்பத்தில், அவர்களின் திருமணத்திற்கு சில எதிர்ப்புகள் இருந்தன, ஆனால் அவர்கள் அனைவரும் பின்னர் ஏற்றுக் கொண்டனர்," என்று ஒரு நண்பர் கூறினார். இவர்களது மகள் திருமணமாகி ஆந்திராவில் செட்டிலாகி உள்ளார்.

அரசியலுக்கு வந்தபோது, ​​ரேவந்த் ரெட்டியின் முறையான நுழைவு ஏ.பி.வி.பி வழியாக இருந்தது. அவரது சொந்த மாவட்டமான மஹ்பூப்நகரில் கிராம மற்றும் மண்டல அளவிலான அரசியலில் தொடர்ந்து ஈடுபட்டாலும், RSS மாணவர் பிரிவில் அவரது பணி குறுகியதாகவும், சீரற்றதாகவும் இருந்தது என்று முன்னாள் TDP சகாக்கள் கூறுகிறார்கள். 2007 இல், அவர் இறுதியாக உள்ளூர் நகராட்சிகளின் உறுப்பினர்களின் ஆதரவுடன் ஒரு சுயேட்சையாக சட்டமன்ற கவுன்சிலுக்கு தேர்ந்தெடுக்கப்பட்டார்.

2007 முதல் 2009 வரை எம்.எல்.சி.யாக இருந்த காலத்தில் தான் அப்போது எதிர்க்கட்சித் தலைவராக இருந்த சந்திரபாபு நாயுடுவை சந்தித்தார். தெலுங்கு தேசம் கட்சித் தலைவர் சந்திரபாபு நாயுடு அவரை தனது பிரிவின் கீழ் அழைத்துச் சென்று, அங்குள்ள ரெட்டி சமூகத்தின் செல்வாக்கு மிக்க விவசாயிகள் மத்தியில், கோடங்கலில் அரசியல் தளத்தை வளர்க்க ஊக்குவித்தார். 2009 இல், தெலுங்கு தேசம் கட்சி அவரை கோடங்கல் சட்டமன்றத் தொகுதியில் நிறுத்தியது, ரேவந்த் ரெட்டி வெற்றி பெற்றார்.

சட்டசபையில், சந்திரபாபு நாயுடுவை தனது தலையீடுகளாலும், பேசும் திறமையாலும் ரேவந்த் ரெட்டி கவர்ந்தார்.

2014 இல், ரேவந்த் ரெட்டி மீண்டும் 14,600 வாக்குகள் வித்தியாசத்தில் டி.ஆர்.எஸ் (இப்போது பி.ஆர்.எஸ் என்று அழைக்கப்படும்) சேர்ந்த குருநாத்தை தோற்கடித்தார். தெலங்கானா உருவாக்கம் டி.ஆர்.எஸ் கட்சியை தனது அரசியல் தளத்தில் பிரதான கட்சியாக மாற்றியபோது, ​​ரேவந்த் ரெட்டி, சந்திரபாபு நாயுடுவுக்கு விசுவாசமாக இருந்து, தெலங்கானா தெலுங்கு தேசம் கட்சியின் தலைவராக நியமிக்கப்பட்டார்.

அவர் மீதான மோசமான அம்சமாக, ஜூன் 3, 2015 அன்று, தெலங்கானா சி.ஐ.டி போலீசார், சட்டப் பேரவையில் தெலுங்கு தேசம் கட்சி வேட்பாளருக்கு வாக்களிக்க நியமன எம்.எல்.ஏ.,வுக்கு லஞ்சம் கொடுக்க முயன்றதாகக் கூறப்படும் குற்றச்சாட்டில் ரேவந்த் ரெட்டியை கையும் களவுமாகப் பிடித்தனர். ரேவந்த் ரெட்டி "சந்திரபாபு நாயுடுவை மகிழ்விப்பதற்காக" அதிக தூரம் சென்று ஸ்டிங் ஆபரேஷனில் சிக்கியிருக்கலாம் என்று அவருக்கு நெருக்கமானவர்கள் கூறுகிறார்கள்.

இந்த சம்பவத்திற்குப் பிறகு ரேவந்த் ரெட்டி சிறையில் சில காலத்தைக் கழித்தார், இடையில் சில மணிநேர ஜாமீன் கிடைத்த பிறகு தனது மகளின் திருமணத்தில் கலந்து கொள்ள முடிந்தது. இந்த சிறைவாசத்தின் முடிவில், கே.சி.ஆரை ஆட்சியில் இருந்து வெளியேற்றுவது குறித்த தனது உரையை ரேவந்த் ரெட்டி நிகழ்த்தினார்.

விரைவில், அக்டோபர் 2017 இல், ரேவந்த் ரெட்டி தெலுங்கு தேசம் கட்சியில் இருந்து ராஜினாமா செய்தார், சில நாட்களுக்குப் பிறகு, காங்கிரஸில் சேர்ந்தார்.

டிசம்பர் 2018 தேர்தலில், டி.ஆர்.எஸ், கே.சி.ஆர் மீதான அவரது தாக்குதலால் கசந்து, கோடங்கலில் ரேவந்த் ரெட்டியின் தோல்வியை உறுதி செய்ய தனது முழு பலத்தையும் கொடுத்தது. காங்கிரஸே இதற்கு ஓரளவு பொறுப்பு என்று ஒரு தலைவர் கூறினார். “அந்த நேரத்தில் மூத்த காங்கிரஸ் தலைவர்களுடன் ரேவந்த் ரெட்டியின் நல்லுறவு நன்றாக இல்லை, ஏனெனில் அவர் லஞ்சக் கறையுடன் மாற்றுக் கட்சிக்காரராகப் பார்க்கப்பட்டார். இருப்பினும், அவர் மத்திய காங்கிரஸ் தலைவர்களுடன் நல்ல உறவை வளர்த்துக் கொண்டார், அவரின் உற்சாகமான, உணர்ச்சிகரமான பேச்சுகளை ஆற்றும் திறனை மத்திய தலைமை கண்டறிந்துக் கொண்டது,” என்று ஒரு தலைவர் கூறினார்.

ஜூன் 2021 இல் அவர் காங்கிரஸ் மாநிலத் தலைவராக நியமிக்கப்பட்டபோது, ​​மூத்த தலைவர்கள் தங்கள் கோபத்தை மறைக்கவே முடியவில்லை. மேலும் அவர்களிடையே இன்னும் அதிகமான நண்பர்களை ரேவந்த் ரெட்டியால் உருவாக்க முடியவில்லை. என் உத்தம் குமார் ரெட்டி, மல்லு பாட்டி விகாரமாரக, டி ஜெயபிரகாஷ் ரெட்டி, வி ஹனுமந்த ராவ், மது யக்ஷி கவுட் போன்ற மூத்த தலைவர்கள், ரேவந்த் ரெட்டிக்கு பரிசுப் பதவி கிடைத்துள்ளதால், தங்களுக்கு முக்கிய பொறுப்பைக் கோருவார்கள்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“