தேர்தலுக்கு முன் அ.தி.மு.க-வை ஒன்றிணைக்க சசிகலா வலியுறுத்தல்; அசைந்து கொடுக்காத இ.பி.எஸ்

Arun Janardhanan

அ.தி.மு.க.வின் முன்னாள் இடைக்காலப் பொதுச்செயலாளரும், ஜெயலலிதாவின் நம்பிக்கைக்குரியவருமான வி.கே. சசிகலா, திங்கள்கிழமை கட்சியின் பல்வேறு பிரிவுகளையும் இணைப்பதற்காக ஒரு புதிய வேண்டுகோளை விடுத்தார். அது முன்னாள் முதலமைச்சர் அறிஞர் அண்ணாவின் பிறந்தநாள். போயஸ் கார்டனில் உள்ள தனது இல்லத்திலிருந்து அவர் தெரிவித்த கருத்துகள், பா.ஜ.க. மாநிலத் தலைவர் நயினார் நாகேந்திரன் மற்றும் அ.தி.மு.க. மூத்த தலைவரான கே.ஏ. செங்கோட்டையன் போன்ற பிற தலைவர்களின் சமரச அழைப்புகளுடன் எதிரொலித்தன. ஆனால், இந்தப் பிரச்னையின் மையத்தில் இருக்கும் எடப்பாடி பழனிசாமி எதற்கும் அசைந்துகொடுக்கவில்லை.

ஆங்கிலத்தில் படிக்க:

“2026 சட்டமன்றத் தேர்தலுக்கு முன் அ.தி.மு.க.வின் பல்வேறு பிரிவுகளும் ஒன்றிணைய வேண்டும் என்று அ.தி.மு.க.வில் உள்ள அனைவரும் விரும்புகின்றனர். நானும் அதை விரும்புகிறேன்” என்று சசிகலா கூறினார். மேலும், தேர்தலுக்குப் பின்னல்லாமல், அதற்கு முன்னதாகவே இணைப்பு ஏற்பட வேண்டும் என்றும் அவர் வலியுறுத்தினார். “கடந்த காலத்தில் நடந்தது எல்லாம் போகட்டும். இனிமேல் நடப்பவை நல்ல முறையில் இருக்கட்டும்” என்று கூறிய அவர், தி.மு.க-வை வீழ்த்துவதற்கு ஒன்றிணைப்பவராகத் தன்னைக் காட்டிக்கொண்டார். அவரது அணுகுமுறை எந்தவிதத்திலும் கட்டாயப்படுத்துவதாகவோ அல்லது மோதல் போக்கைக் கொண்டதாகவோ இல்லை. “மறுப்பது மிக எளிது. ஆனால் ஒருவரைச் சேர்த்துக்கொள்வது மிகவும் கடினம்” என்று அவர் கூறினார். ஆனால், அவர் வலியுறுத்திய அடிப்படை செய்தி பா.ஜ.க சொல்வதைப் போலத்தான் இருந்தது – தேர்தலில் வெற்றியடைய பிரிவுகளை ஒன்றாக இணைக்க வேண்டும் என்பதுதான் அது.

முந்தைய ஞாயிற்றுக்கிழமை, பா.ஜ.க. மாநிலத் தலைவர் நயினார் நாகேந்திரன், “அ.தி.மு.க.வின் அணிகள் இணைவது தமிழகத்திற்கு நன்மை பயக்கும்” என்று கூறினார். அத்துடன், தி.மு.க. அரசுக்கு எதிராக வலுவான ‘ஆட்சிக்கு எதிரான அலை’ இருப்பதாகவும் அவர் குறிப்பிட்டார். “அனைவரும் இணைந்தால், அது நல்லது” என்றும் அவர் கூறினார். சிறிய கூட்டணிக் கட்சிகள் பிரிந்து செல்வதால், தமிழகத்தில் தேசிய ஜனநாயகக் கூட்டணிக்கு (என்.டி.ஏ.) தற்போது பா.ஜ.க. மற்றும் அ.தி.மு.க. ஆகிய இரண்டு பெரிய கூட்டணிக் கட்சிகள் மட்டுமே உள்ளன. பா.ம.க-வில் தந்தைக்கும் மகனுக்கும் இடையே பிளவு நீடிக்கிறது. புதிய தமிழகம் கட்சித் தலைவர் கிருஷ்ணசாமி, நடிகர் விஜய்யின் தமிழக வெற்றிக் கழகத்தின் பக்கம் சாய்ந்துள்ளார். விஜயகாந்தின் தே.மு.தி.க. கூட்டணி மீது வெளிப்படையாக அதிருப்தி கொண்டுள்ளதுடன், நிறைவேற்றப்படாத வாக்குறுதிகள் குறித்துப் புகார் அளித்து வருகிறது. “குறைந்தது மூன்று பெரிய கூட்டணிக் கட்சிகள் தற்போது தேசிய ஜனநாயகக் கூட்டணியில் இல்லை என்பதை ஒப்புக்கொள்வதைவிட, பிளவுபட்ட அ.தி.மு.க.வைக் காண்பிப்பது பா.ஜ.க.விற்கு மிகவும் வசதியானது” என்று இணைப்புக்கு ஆதரவான, ஆனால், பா.ஜ.க.வின் இணைப்புக்கான அழைப்புடன் முரண்படும் அ.தி.மு.க.வின் மூத்த தலைவர் ஒருவர் தெரிவித்தார்.

எனினும், அ.தி.மு.க.வுக்குள் இதற்கு எச்சரிக்கையான எதிர்வினைகள் மட்டுமே கிடைத்தன. மூத்த தலைவரும் செய்தித் தொடர்பாளருமான டி. ஜெயகுமார், “நடந்ததை மறந்து மன்னிக்கும்” கொள்கையைப் பின்பற்றி, நீக்கப்பட்ட தலைவர்களை மீண்டும் சேர்த்துக்கொள்வது குறித்து கட்சியின் பொதுச் செயலாளர் எடப்பாடி பழனிசாமி மட்டுமே முடிவெடுக்க முடியும் என்று செங்கோட்டையனின் கோரிக்கை குறித்துக் கூறினார். செங்கோட்டையனை “அண்ணன்” என்று அழைத்த ஜெயகுமார், அவரது கருத்தை ஏற்றுக்கொண்ட போதிலும், அதை ஆதரிப்பதைத் தவிர்த்து, விலகிச் சென்றார்.

அ.தி.மு.க.வில் அனைவருமே, எடப்பாடி பழனிசாமி ஒருவர் மட்டுமே முடிவெடுக்கிறார் என்பதை நன்கு உணர்ந்துள்ளனர். சசிகலாவின் வெளிப்படையான முயற்சிகளும், பா.ஜ.க-வின் இணைப்புக்கான அழைப்பும் கூட சமநிலையை மாற்றவில்லை.

கோபிசெட்டிப்பாளையத்தைச் சேர்ந்த ஒன்பது முறை சட்டமன்ற உறுப்பினரான செங்கோட்டையன், செப்டம்பர் 5-ம் தேதி கட்சி முடிவெட்டுப்பதற்கு பத்து நாள் காலக்கெடு விதித்ததிலிருந்து இணைப்புக்கான கோரிக்கை வலுப்பெற்று வருகிறது. ஓ. பன்னீர்செல்வம், டி.டி.வி. தினகரன் போன்ற முன்னாள் தலைவர்களை மீண்டும் சேர்க்காமல், அ.தி.மு.க-வால் அதன் கடந்தகாலப் பெருமையைத் திரும்பப் பெற முடியாது என்று அவர் வாதிட்டார். “ஒத்த கருத்துடைய தலைவர்கள் ஒன்றிணைந்து அதைச் செய்வார்கள்” என்று அவர் அப்போது எச்சரித்தார்.

அந்தக் காலக்கெடு செப்டம்பர் 15-ம் தேதி எந்தவித விளைவுகளும் இல்லாமல் முடிவடைந்தது. இந்த எச்சரிக்கை விடுக்கப்பட்ட ஒரு நாளுக்குள், பழனிசாமி செங்கோட்டையனின் அனைத்து கட்சிப் பதவிகளையும் நீக்கினார். அதன் பின்னர், எந்தவொரு மூத்த தலைவரும் அந்த மூத்த தலைவருக்கு ஆதரவளிக்கவில்லை. அவரது செல்வாக்கு, ஈரோடு மாவட்டத்தின் ஒரு சில பகுதிகளுக்கு மட்டுமே இருந்தது. ஆர்.எஸ்.எஸ். சித்தாந்தவாதி எஸ். குருமூர்த்தி மற்றும் மத்திய நிதி அமைச்சர் நிர்மலா சீதாராமன் ஆகிய இரு தலைவர்களும் செங்கோட்டையனுடன் பேச்சுவார்த்தை நடத்தியிருந்தனர். ஆனால், அவர்கள் எதிர்பார்த்த தாக்கத்தை செங்கோட்டையனால் ஏற்படுத்த முடியவில்லை.

அ.தி.மு.க. உள்விவகாரங்கள் அறிந்தவர்கள், “டெல்லியின் சோதனைக்கு செங்கோட்டையன் ஒரு தவறான தேர்வு” என்று கூறுகின்றனர். “பா.ஜ.க.வின் உதவியுடன் முதலமைச்சர் வேட்பாளராக ஆகலாம் என்று அவர் நினைத்தார்” என்று அ.தி.மு.க.வின் முன்னாள் அமைச்சர் ஒருவர் செப்டம்பர் 6-ம் தேதி இந்தியன் எக்ஸ்பிரஸ் நாளிதழிடம் தெரிவித்தார். “ஆனால், மற்ற அனைவருக்கும் எடப்பாடி பழனிசாமிக்கு எதிராகக் கிளர்ச்சி செய்வது அரசியல் தற்கொலைக்குச் சமம் என்பது தெரியும். செங்கோட்டையனுக்கு எந்தவிதமான ஆதரவுத் தளமும் இல்லை” என்று அவர் கூறினார்.