ஒரு துப்புரவு பணியாளர் இரண்டு 4 வயது பள்ளிக் குழந்தைகள் பாலியல் வன்கொடுமை செய்ததாகக் கூறப்படும் சம்பவத்தில், போலீஸ் நடவடிக்கை எடுக்க தாமதம் செய்ததற்கு எதிராக போராட்டம் நடந்து வருகிறது. இந்த போராட்டத்தின் ஒரு பகுதியாக, பத்லாபூர் ரயில் நிலையத்தில் மக்கள் ஏராளமானோர் திரண்டு ரயில்களை நிறுத்தியதை அடுத்து சென்ட்ரல் லைனில் மும்பை உள்ளூர் ரயில் சேவைகள் செவ்வாய்க்கிழமை காலை பாதிக்கப்பட்டன.
ஆங்கிலத்தில் படிக்க: Sexual assault of 4-year-old girls in school triggers massive outrage, protesters storm Badlapur railway station
பத்லாபூர் ரயில் நிலையத்தில் உள்ளூர் ரயில்கள் நிறுத்தப்பட்டதாக சென்ட்ரல் ரயில்வே தெரிவித்துள்ளது. “ரயில்வே அல்லாத பிரச்சனைகள் மீதான போராட்டம் காரணமாக பத்லாபூர் ரயில் நிலையத்தில் காலை 10.10 மணி முதல் ரயில் இயக்கம் நிறுத்தப்படுகிறது” என்று சென்ட்ரல் ரயில்வே அதிகாரிகள் தெரிவித்தனர்.
இரு மார்க்கத்திலும் ரயில் செயல்பாடுகள் முற்றிலுமாக நிறுத்தப்பட்டதாகவும், 5 எக்ஸ்பிரஸ் ரயில்கள் கர்ஜத் - பன்வெல் வழியாக சத்ரபதி சிவாஜி மகாராஜ் டெர்மினஸ் (CSMT) நோக்கி திருப்பி விடப்பட்டுள்ளதாகவும் சென்ட்ரல் ரயில்வே அதிகாரிகள் தெரிவித்தனர்.
இந்த விவகாரத்தில் காவல்துறை நடவடிக்கை எடுக்க காலதாமதம் செய்வதாகவும், குற்றவாளிகள் மீது கடுமையான நடவடிக்கை எடுக்க வேண்டும் என்றும் பொதுமக்கள் மற்றும் பள்ளி மாணவர்களின் பெற்றோர்கள் குற்றம்சாட்டி வருகின்றனர்.
ஆகஸ்ட் 12 மற்றும் 13-ம் தேதிகளில் ஒரு பள்ளியின் கழிவறையில் துப்புரவு பணியாளர் ஒருவரால் இரண்டு சிறுமிகள் பாலியல் வன்கொடுமை செய்யப்பட்டதாகக் கூறப்படுகிறது. இறுதியாக ஆகஸ்ட் 16-ம் தேதி எஃப்.ஐ.ஆர் பதிவு செய்து, குற்றம் சாட்டப்பட்டவர்களைக் கைது செய்வதற்கு முன்பு, காவல்துறை தரப்பில் இருந்து குற்றத்திற்கு பதிலளிப்பதில் தாமதம் ஏற்பட்டதாக கூறப்படுகிறது. அந்த பள்ளி அவரை ஒப்பந்த அடிப்படையில் வேலைக்கு அமர்த்தியுள்ளது.
இந்த சம்பவம் மாணவர்களின் பாதுகாப்பு மற்றும் பள்ளி நிர்வாகத்தின் செயல்பாடு குறித்து தீவிர கவலைகளை எழுப்பியுள்ளது. எதிர்காலத்தில் இதுபோன்ற சம்பவங்கள் நடைபெறாமல் இருக்க கடுமையான பாதுகாப்பு நடவடிக்கைகள் மற்றும் சிறந்த கண்காணிப்பு ஆகியவற்றை பெற்றோர்கள் கோருகின்றனர்.
இந்த போராட்டத்தின் ஒரு பகுதியாக, பத்லாபூர் பகுதியில் உள்ள கடைகள் மற்றும் பிற நிறுவனங்கள் செவ்வாய்க்கிழமை மூடப்பட்டிருந்தன. இந்த சம்பவம் நடந்ததாக கூறப்படும் பள்ளியும் மூடப்படும் நிலைக்கு தள்ளப்பட்டது. உள்ளூர் அரசியல் தலைவர்களும் போராட்டத்தில் கலந்துகொண்டதுடன், அவர்களது ஆதரவாளர்களும் போராட்டத்தில் ஈடுபட்டனர்.
இதுகுறித்து மூத்த போலீஸ் அதிகாரி ஒருவர் கூறுகையில், “கடுமையான குற்ற வழக்கு பதிவு செய்யப்பட்டுள்ளது. 4 மணி நேரத்திற்குள் (வழக்கு பதிவு), குற்றவாளி கைது செய்யப்பட்டார். குற்றவாளிகளை போலீஸ் காவலில் எடுத்து விசாரிக்க நீதிமன்றம் அனுமதி அளித்துள்ளது. இந்த குற்றம் குறித்து தீவிர விசாரணை நடத்தப்பட்டு வருகிறது. சம்பந்தப்பட்ட காவல் நிலையத்தின் மூத்த ஆய்வாளர் ஒருவர் இந்த விஷயத்தை விசாரித்து வருகிறார். அவருக்கு உதவியாக அனுபவம் வாய்ந்த இரண்டு பெண் காவலர்கள் உள்ளனர். இந்த வழக்கில் அதிகபட்ச ஆதாரங்களுடன் விசாரணை நடைபெறுவதை உறுதி செய்வதற்காக மூத்த அதிகாரிகளும் விசாரணையை மேற்பார்வையிட்டு வருகின்றனர்.” என்று கூறினார்.
முறையான விசாரணையை நடத்துவதற்கான காவல்துறை முயற்சிகளுக்கு இடையூறு விளைவிக்கும் என்பதால், எந்தவொரு போராட்டங்களையும் நடத்த வேண்டாம் என்று மூத்த போலீச் அதிகாரி பொதுமக்களுக்கும் போராட்டக்காரர்களுக்கும் வேண்டுகோள் விடுத்தார். தானே போலீஸ் கமிஷனர் ஏற்கனவே இதுபோன்ற கூட்டங்கள் அல்லது போராட்டங்களுக்கு கட்டுப்பாடுகளை விதித்திருந்தார்.
இதற்கிடையில், வழக்குப்பதிவு செய்வதில் தாமதம் ஏற்பட்டதாக எழுந்த புகாரின் பேரில், சம்பந்தப்பட்ட காவல் நிலையத்தின் மூத்த ஆய்வாளர் இடமாற்றம் செய்யப்பட்டதாக கூறப்படுகிறது.
இந்த வழக்கில் விரைவில் விசாரணை நடத்தப்படும் என மகாராஷ்டிரா முதல்வர் ஏக்நாத் ஷிண்டே உறுதியளித்துள்ளார்.
மகாராஷ்டிர முதல்வர் ஏக்நாத் ஷிண்டே செவ்வாய்கிழமை செய்தியாளர்களிடம் பேசுகையில், குற்றம் சாட்டப்பட்டவர்கள் ஏற்கனவே கைது செய்யப்பட்டதை உறுதி செய்த தானே போலீஸ் கமிஷனருடன் பேசியதாக கூறினார். ஊழியர்களை பணியமர்த்தும்போது நிறுவனங்கள் முழுமையான பின்னணி சோதனைகளை மேற்கொள்ள வேண்டியதன் அவசியத்தை வலியுறுத்தி, விசாரணை விரைவாகத் தொடரப்படும் என்று ஷிண்டே உறுதியளித்தார். எதிர்காலத்தில் இதுபோன்ற குற்றங்களைத் தடுக்க நிலையான செயல்பாட்டு நடைமுறையை அறிமுகப்படுத்தும் திட்டங்களையும் அவர் அறிவித்தார். குற்றவாளிகள் கடுமையான தண்டனையை எதிர்கொள்வதை உறுதி செய்வதில் தனது அரசாங்கத்தின் உறுதிப்பாட்டை மீண்டும் உறுதிப்படுத்தினார்.
ராஜ் தாக்கரே தலைமையிலான மகாராஷ்டிர நவநிர்மாண் சேனா (எம்.என்.எஸ்) கட்சியின் முக்கியத் தலைவரான அவினாஷ் ஜாதவ், இந்த சம்பவம் குறித்து தனது கோபத்தை வெளிப்படுத்தினார். பாலியல் துஷ்பிரயோகத்திற்கு எதிராக வலுவான செய்தியை அனுப்புவதற்கு விரைவான விசாரணை மற்றும் ஒரு வருடத்திற்குள் வழக்கை விசாரித்து முடிக்க வேண்டும் என்று அவர் கோரினார். எம்.என்.எஸ் கட்சியின் பெண் தலைவர்கள் முதலில் இந்தப் பிரச்னையை எழுப்பினர் என்று ஜாதவ் குறிப்பிட்டார். ஆகஸ்ட் 12-ம் தேதி நடந்த குற்றத்திற்குப் பிறகு ஒரு மௌனப் போராட்டத்தை ஏற்பாடு செய்தார். மேலும், போலீஸ் நடவடிக்கையில் தாமதம் என்று அவர் குற்றம் சாட்டினார்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
/indian-express-tamil/media/agency_attachments/33Ho9XHwZawzDekwDLnu.png)
Follow Us/indian-express-tamil/media/media_files/y0yLyhNZXmoYASqHoYRw.jpg)