மோடி அரசை புகழ்ந்ததால் சொந்த கட்சியிலேயே எதிர்ப்பு: சர்ச்சைக்கு முற்றுப்புள்ளி வைத்த சசி தரூர்

அண்மையில் சர்வதேச அளவில் நடைபெற்ற ஒரு நிகழ்ச்சியில், தற்போதைய அரசாங்கத்தின் பயங்கரவாதத்திற்கு எதிரான நடவடிக்கைகளைப் பாராட்டி காங்கிரஸ் எம்.பி. சசி தரூர் பேசிய கருத்துக்கள், பெரும் அரசியல் புயலைக் கிளப்பின. இச்சம்பவம் குறித்து வியாழக்கிழமை அன்று அவர் விளக்கமளித்தார். தனது கருத்துக்களை "திரித்துக் கூற" "விமர்சகர்களும் ட்ரோல்களும் வரவேற்கப்படுகிறார்கள்", தனக்கு இதை விட முக்கியமான வேலைகள் இருப்பதாக அவர் தெரிவித்தார்.

தனது பேச்சு, கடந்த சில ஆண்டுகளில் பயங்கரவாதத் தாக்குதல்களுக்கு இந்தியா அளித்த பதிலடி நடவடிக்கைகளைப் பற்றியது என்றும், முந்தைய போர்களைப் பற்றியது அல்ல என்றும் அவர் சுட்டிக்காட்டினார்.

சசி தரூர் ‘எக்ஸ்’ பக்கத்தில்: “பனாமாவில் ஒரு நீண்ட மற்றும் வெற்றிகரமான நாளுக்குப் பிறகு, ஆறு மணி நேரத்தில் பொகோட்டா, கொலம்பியா புறப்பட இருப்பதால், நள்ளிரவில் இதை முடிக்க வேண்டியுள்ளது. எனவே எனக்கு இதற்கு நேரம் இல்லை –எப்படியிருந்தாலும்: இந்திய வீரத்தைப் பற்றி எனக்குத் தெரியாது என்றுகொதிப்படைபவர்களுக்காக: 1. நான் பயங்கரவாதத் தாக்குதல்களுக்கான பதிலடி நடவடிக்கைகளைப் பற்றி மட்டுமே தெளிவாகவும் வெளிப்படையாகவும் பேசினேன், முந்தைய போர்களைப் பற்றி அல்ல; & 2. எனது கருத்துக்களுக்கு முன்னதாக, அண்மைய ஆண்டுகளில் மட்டும் நடந்த பல தாக்குதல்கள் பற்றிய குறிப்பு இருந்தது. அப்போது முந்தைய இந்திய பதில்கள் நமது பொறுப்புணர்ச்சியுடன் கூடிய எல்லைக் கோட்டிற்கு (LoC) மற்றும் சர்வதேச எல்லைக்கு (IB) மதிப்பளித்து கட்டுப்படுத்தப்பட்டும், வரையறுக்கப்பட்டும் இருந்தன.

இந்த விளக்கங்கள் அனைத்தையும் கொடுத்த பிறகு, "விமர்சகர்களும் ட்ரோல்களும் எனது கருத்துக்களையும் வார்த்தைகளையும் அவர்கள் விரும்பியபடி திரித்துக் கொள்ளலாம். எனக்கு இதை விட முக்கியமான வேலைகள் உள்ளன. குட் நைட்" என்று அவர் பதிவிட்டார்.
கடந்த சில ஆண்டுகளில் பயங்கரவாதத்திற்கு இந்தியாவின் பதிலடி நடவடிக்கைகளை சசி தரூர் பாராட்டியதால், அவர் தனது சொந்த கட்சியினரிடமிருந்து விமர்சனங்களை எதிர்கொண்டுள்ளார்.

 “நமது பிரதமர் தெளிவுபடுத்தினார், பயங்கரவாதிகள் வந்து 26 பெண்களின் நெற்றியில் இருந்து ‘சிந்தூரை’ துடைத்தெறிந்ததால் ‘ஆபரேஷன் சிந்தூர்’ அவசியமானது… ஆனால் இந்தியா ‘சிந்தூரின்’ குங்கும நிறம் கொலையாளிகளின் ரத்த நிறத்துடன் பொருந்தும் என்று முடிவு செய்தது” என்று தரூர் ஒரு சர்வதேச நிகழ்ச்சியில் பேசும்போது கூறினார்.

புதன்கிழமை அன்று, காங்கிரஸ் எம்.பி. மேலும் கூறுகையில், பாகிஸ்தானில் உள்ள ஒரு பயங்கரவாதத் தளத்தைத் தாக்க இந்தியா முதன்முதலில் எல்லைக் கோட்டை (LoC) தாண்டிச் சென்றது உரி சர்ஜிகல் ஸ்டிரைக்ஸ் (Uri surgical strikes) போதுதான் என்றார். ‘ஆபரேஷன் சிந்தூர்’ போது இந்திய இராணுவம் எல்லைக் கோட்டிற்கு அப்பால் ஒரு படி சென்று, ஒன்பது இடங்களில் உள்ள பயங்கரவாதத் தளங்கள், பயிற்சி மையங்கள், பயங்கரவாதத் தலைமையகங்களைத் தாக்கியது.
இந்த கருத்துக்கள் அவரது சொந்த கட்சித் தலைவரான உதித் ராஜிடம் இருந்து பெரும் கண்டனத்தைப் பெற்றன.

உதித் ராஜ் ‘எக்ஸ்’ பக்கத்தில் வெளியிட்ட பதிவில், “நீங்கள் இந்தியாவில் தரை இறங்குவதற்கு முன்பே உங்களை பாஜகவின் சூப்பர் செய்தித் தொடர்பாளராக, வெளியுறவுத்துறை அமைச்சராகவும் அறிவிக்க பிரதமர் மோடியை நான் வற்புறுத்த முடியும். பிரதமர் மோடிக்கு முன் இந்தியா எல்லைக் கோட்டை மற்றும் சர்வதேச எல்லையை ஒருபோதும் தாண்டவில்லை என்று கூறி காங்கிரஸ் கட்சியின் பொற்கால வரலாற்றை நீங்கள் எப்படி இழிவுபடுத்த முடியும்?” என்று கேட்டார்.

மறுபுறம், பாஜக தலைவர் கிரண் ரிஜிஜு தரூருக்கு ஆதரவாக வந்து, காங்கிரஸை கடுமையாக சாடினார்.

இந்திய எம்.பி.க்கள் ஏன் வெளிநாட்டு மண்ணில் நாட்டிற்கோ அல்லது பிரதமருக்கு எதிராகவோ பேச வேண்டும் என்று ரிஜிஜு கேள்வி எழுப்பினார். “காங்கிரஸ் கட்சி என்ன விரும்புகிறது & நாட்டிற்காக அவர்கள் எவ்வளவு கவலைப்படுகிறார்கள்? இந்திய எம்.பி.க்கள் வெளிநாட்டுக்குச் சென்று இந்தியாவுக்கும் அதன் பிரதமருக்கும் எதிராகப் பேச வேண்டுமா? அரசியல் விரக்திக்கு ஒரு எல்லை உண்டு” என்று அவர் X இல் எழுதினார்.

Read in English: ‘Critics and trolls are welcome’: Shashi Tharoor amid Congress’s ‘super spokesperson’ jibe