மைசூரு தசரா விழாவை தொடங்கி வைக்க பானு முஷ்டாக்கிற்கு அழைப்பு; கர்நாடக அரசுக்கு எதிரான மனு தள்ளுபடி

நீதிபதிகள் விக்ரம் நாத் மற்றும் சந்தீப் மேத்தா அடங்கிய அமர்வு, மனுவை விசாரித்தபோது, இந்தியாவின் அரசியலமைப்புச் சட்டத்தின் முகவுரை மதச்சார்பின்மையைப் பற்றிக் கூறுவதாக சுட்டிக்காட்டியது. மனுதாரர் சார்பாக ஆஜரான மூத்த வழக்கறிஞர் பி.எஸ். சுரேஷிடம், “இந்த நாட்டின் அரசியலமைப்புச் சட்டத்தின் முகவுரை என்ன கூறுகிறது?” என்று நீதிபதி விக்ரம் நாத் கேட்டார்.

ஆங்கிலத்தில் படிக்க:

அதற்கு வழக்கறிஞர் சுரேஷ், மதச்சார்பின்மையைக் காரணம் காட்டி, இந்துக்களின் மத நடவடிக்கைகளில் தலையிடுவது ஏற்றுக்கொள்ள முடியாதது என்று வாதிட்டார். மனு ஏன் தாக்கல் செய்யப்பட்டது என்று நீதிமன்றம் கேட்டபோது, “இது அரசியலமைப்புச் சட்டத்தின் 25-வது பிரிவின் கீழ் எனது உரிமைகளைப் பாதிக்கிறது” என்று சுரேஷ் பதிலளித்தார்.

இதற்குப் பதிலளித்த நீதிமன்றம், 2017-ம் ஆண்டு இதே தசரா விழாவுக்கு கவிஞர் நிசார் அகமது தலைமை விருந்தினராக அழைக்கப்பட்டார் என்றும், அப்போது மனுதாரரின் உரிமைகள் பாதிக்கப்படவில்லையா என்றும் கேள்வி எழுப்பியது.

வழக்கறிஞர் சுரேஷ், தசரா விழாவில் இரண்டு அம்சங்கள் உள்ளன என்றும், ஒன்று மதச்சார்பற்ற நிகழ்வான தொடக்க விழா என்றும், மற்றொன்று கோவிலுக்குள் நடைபெறும் பூஜை என்றும் கூறினார். மேலும், “அந்தப் பூஜை, மதச்சார்பற்ற செயல் அல்ல. அது முற்றிலும் ஆன்மிக அல்லது மதச் செயல்” என்றும் அவர் கூறினார்.

தொடர்ந்து பேசிய அவர், “தொடக்க விழாவில் பானு முஷ்டாக் பங்கேற்பது குறித்து மனுதாரருக்கு எந்த ஆட்சேபணையும் இல்லை. ஆனால், கோவிலுக்குள் நடைபெறும் பூஜையில் அவர் கலந்துகொள்வது மத உரிமைகளைப் பாதிக்கும்” என்று தெரிவித்தார்.

அதற்கு நீதிபதி விக்ரம் நாத், மைசூரு தசரா ஒரு மாநில அரசு நிகழ்வு, தனிப்பட்ட நபர்களின் நிகழ்ச்சி அல்ல என்றும், இதில் பாகுபாடு காட்டுவது ஏன் என்றும் கேள்வி எழுப்பினார்.

அதற்கு சுரேஷ், “இது ஒரு மாநில அரசு நிகழ்வு என்பதால், எந்தவொரு பிரிவினரின் மத உரிமைகளையும் அது மீறக்கூடாது” என்று வாதிட்டார். மேலும், அரசின் இந்த முயற்சி முற்றிலும் அரசியல் உள்நோக்கம் கொண்டது என்றும் அவர் கூறினார்.

இருப்பினும், இந்த மனுவை உச்ச நீதிமன்ற அமர்வு தள்ளுபடி செய்தது.

கடந்த செப்டம்பர் 15-ம் தேதி, கர்நாடக உயர் நீதிமன்றமும் இதேபோன்ற மனுக்களைத் தள்ளுபடி செய்தது. “ஒரு குறிப்பிட்ட மதத்தைச் சேர்ந்த நபர், மற்ற மதங்களின் விழாக்களில் பங்கேற்பது, இந்திய அரசியலமைப்புச் சட்டத்தின் கீழ் உள்ள உரிமைகளை மீறாது” என்று அப்போது உயர் நீதிமன்றம் குறிப்பிட்டிருந்தது.