ஓ.டி.டி தளங்களில் அதிக வன்முறை, ஆபாச காட்சிகள்: சுப்ரீம் கோர்ட் நோட்டீஸ்

ஓ.டி.டி தளங்கள் மற்றும் சமூக ஊடகங்களில் உள்ள ஆபாசம் குறித்து திங்கள்கிழமை உச்ச நீதிமன்றம் கவலை தெரிவித்தது. மேலும், இந்த பிரச்னையைச் சட்டத்திற்குட்பட்டு தீர்க்க மத்திய அரசு நடவடிக்கை எடுக்க வேண்டும் என்றும் கூறியது.

ஆங்கிலத்தில் படிக்க:

பத்திரிகையாளர் மற்றும் முன்னாள் தகவல் ஆணையர் உதய் மஹுர்கர் மற்றும் பலர் தாக்கல் செய்த பொதுநல மனுவை விசாரித்த நீதிபதிகள் பி.ஆர். கவாய் மற்றும் ஏ.ஜி.மசி ஆகியோர் அடங்கிய அமர்வு, மத்திய அரசு மற்றும் நெட்ஃபிலிக்ஸ், அமேசான் பிரைம், ஆல்ட் பாலாஜி, உல்லு டிஜிட்டல் மற்றும் முபி போன்ற ஓடிடி தளங்களுக்கும், எக்ஸ் கார்ப், கூகுள், மெட்டா இன்க் மற்றும் ஆப்பிள் போன்ற சமூக ஊடக தளங்களுக்கும் நோட்டீஸ் அனுப்பியது.

மனுதாரர்கள் சார்பில் ஆஜரான வழக்கறிஞர் விஷ்ணு சங்கர் ஜெயின், இந்த வழக்கு எதிர்தரப்புக்கானது அல்ல என்றும், இது ஒரு உண்மையான கவலையை எழுப்புகிறது என்றும் கூறினார். எந்தவித கட்டுப்பாடும் இல்லாமல் சமூக ஊடக தளங்களில் உள்ளடக்கங்கள் பரவி வருவதாகவும் ஜெயின் தெரிவித்தார்.

அப்போது மத்திய அரசு சார்பில் ஆஜரான சொலிசிட்டர் ஜெனரல் துஷார் மேத்தாவிடம் நீதிபதி கவாய், “ஏதாவது செய்யுங்கள்... சட்டரீதியாக ஏதாவது செய்யுங்கள்” என்று கூறினார்.

சில வழக்கமான நிகழ்ச்சிகளிலும் ஆட்சேபனைக்குரிய உள்ளடக்கம் தோன்றுவதை சுட்டிக்காட்டிய மேத்தா, சில மிகவும் தவறானவை என்றும், இரண்டு மரியாதைக்குரிய நபர்கள் கூட ஒன்றாக அமர்ந்து பார்க்க முடியாதவை என்றும் கூறினார். தணிக்கை இருக்கக்கூடாது என்றும் அவர் கூறினார். மேலும்,  “சில ஒழுங்குமுறைகள் நடைமுறையில் உள்ளன, சில பரிசீலனையில் உள்ளன” என்றும் தெரிவித்தார்.

நோட்டீஸ் அனுப்பிய நீதிபதிகள் அமர்வு பிறப்பித்த உத்தரவில்,  “இந்த மனு ஓடிடி தளங்கள் மற்றும் சமூக ஊடகங்களில் பல்வேறு ஆட்சேபனைக்குரிய, ஆபாசமான மற்றும் ஆபாச உள்ளடக்கங்கள் காட்சிப்படுத்தப்படுவது தொடர்பான ஒரு முக்கியமான கவலையை எழுப்புகிறது. கற்றறிந்த சொலிசிட்டர் ஜெனரல் நியாயமாக கூறுகையில், உள்ளடக்கங்கள் தவறான எல்லைக்கு செல்கின்றன. மேலும், சில ஒழுங்குமுறைகள் பரிசீலனையில் உள்ளன என்றும் அவர் சமர்ப்பிக்கிறார்” என்று கூறியது.

இந்த ஆண்டு மார்ச் மாதம் தாக்கல் செய்யப்பட்ட இந்த மனுவில்,  “வருங்கால சந்ததியினரின் ஒழுக்க நெறியை சீர்குலைக்கும் ஒரு அவசரமான மற்றும் வளர்ந்து வரும் சமூக கவலை சுட்டிக்காட்டப்பட்டது. அதாவது, இணையத்தில் ஆபாசமான உள்ளடக்கம், பாலியல் ரீதியாக தவறான உள்ளடக்கம், குழந்தை பாலியல் துஷ்பிரயோகம், ரத்தக் கலப்பு, மிருக புணர்ச்சி மற்றும் பிற வகையான ஆபாச உள்ளடக்கங்களுக்கு கட்டுப்பாடற்ற அணுகல்” உள்ளதாக தெரிவிக்கப்பட்டுள்ளது.

“ஒரு காலத்தில் தனிப்பட்ட ஒழுக்கக்கேடாக இருந்தது இப்போது ஒரு பரவலான பிரச்னையாக மாறி, சமூக ஊடகங்கள் முதல் ஓவர்-தி-டாப் (ஓ.டிடி.) ஸ்ட்ரீமிங் சேவைகள் வரை டிஜிட்டல் தளங்களின் ஒவ்வொரு மூலையிலும் ஊடுருவியுள்ளது. கட்டுப்படுத்தப்படாவிட்டால், ஆபாசமான பொருட்களின் இந்த கட்டுப்பாடற்ற பரவல் சமூக விழுமியங்கள், மனநலம் மற்றும் பொது பாதுகாப்பு ஆகியவற்றில் கடுமையான விளைவுகளை ஏற்படுத்தக்கூடும்” என்று அந்த மனுவில் கூறப்பட்டுள்ளது.

“குழந்தை குறித்த ஆபாசம் மற்றும் மென்மையான வயதுவந்தோர் உள்ளடக்கம் உட்பட இதுபோன்ற பொருட்களின் கட்டுப்பாடற்ற சுழற்சி, பெண்கள் மற்றும் குழந்தைகளுக்கு எதிரான குற்றங்களின் அதிகரிப்புக்கு வழிவகுத்துள்ளது. அதே நேரத்தில் இளம் மனங்களின் உளவியல் வளர்ச்சியை எதிர்மறையாக பாதிக்கிறது.” என்று கூறப்பட்டுள்ளது.

மனுதாரர்கள் கூறுகையில், “அவர்கள் தகுதியான அதிகாரிகள், நிறுவனங்கள் போன்றவற்றில் முறையீடுகள்/புகார்கள் அளித்துள்ளனர். இருப்பினும், அவை எந்த பயனுள்ள விளைவையும் தரவில்லை. இந்த சூழ்நிலையின் தீவிரத்தை நன்கு அறிந்திருந்தும், இந்த அச்சுறுத்தலை கட்டுப்படுத்த அரசாங்கம் எந்தவொரு குறிப்பிடத்தக்க நடவடிக்கையும் எடுக்கத் தவறிவிட்டது.” என்று குறிபிட்டனர்.

“எக்ஸ் (முன்னர் ட்விட்டர்), இன்ஸ்டாகிராம் மற்றும் மெட்டா (முன்னர் பேஸ்புக்) போன்ற சமூக ஊடக ஜாம்பவான் நிறுவனங்கள் உட்பட வளர்ந்து வரும் ஆன்லைன் இடங்கள், போதுமான கட்டுப்பாடுகள்/தணிக்கை இல்லாமல் வெளிப்படையான உள்ளடக்கத்தைப் பரப்புவதை எளிதாக்குகின்றன. அதே நேரத்தில், நெட்ஃபிலிக்ஸ், அமேசான் பிரைம், உல்லு, ஆல்ட் (முன்னர், ஆல்ட் பாலாஜி) போன்ற ஓ.டி.டி தளங்கள் மிகவும் வெளிப்படையான உள்ளடக்கத்தை தொடர்ந்து ஸ்ட்ரீம் செய்கின்றன. அவற்றில் சில பாலியல் பிறழ்வுள்ள பொருட்கள் காரணமாக குழந்தை உரிமைகள் மற்றும் பாதுகாப்பை மீறுகின்றன” என்று அந்த மனுவில் கூறப்பட்டுள்ளது.

“பயனுள்ள கண்காணிப்பு இல்லாததால், இந்த தளங்கள் ஆரோக்கியமற்ற மற்றும் தவறான போக்குகளை, குறிப்பாக பாதிக்கப்படக்கூடிய இளைஞர்களிடையே வளர்க்கும் உள்ளடக்கத்தை ஊக்குவிக்க அனுமதித்துள்ளது. வெளிப்படையான பொருட்களுக்கு இந்த கட்டுப்பாடற்ற வெளிப்பாடு கடுமையான விளைவுகளை ஏற்படுத்துகிறது. இதுபோன்ற உள்ளடக்கத்தை தொடர்ந்து உட்கொள்வது பாலியல் பற்றிய பார்வைகளை மாற்றுகிறது, தவறான நடத்தைகளுக்கு ஊக்கத்தை அளிக்கிறது மற்றும் பெண்கள் மற்றும் குழந்தைகளுக்கு எதிரான பாலியல் குற்றங்களின் அதிகரிப்புக்கு பங்களிக்கிறது” என்றும் அந்த மனுவில் கூறியுள்ளனர்.