வாக்காளர் அட்டை கொடுத்தால் 'கூலி டிக்கெட்'; புதுச்சேரியில் நடக்கும் புதிய திட்டம்: தி.மு.க எம்.எல்.ஏ புகார்

புதுச்சேரியில் வாக்காளர் அடையாள அட்டை காண்பித்து கூலி திரைப்படத்தின் டிக்கெட்டை வாங்கிக் கொள்ளலாம் என ஒரு தரப்பினர் கூறி வருகின்றனர். அதை உடனடியாக தடை செய்ய வேண்டும் என தி.மு.க எம்.எல்.ஏ சம்பத் கலெக்டருக்கு கோரிக்கை வைத்துள்ளார்

இது குறித்து அவர் கலெக்ட்டருக்கு கொடுத்த மனுவில், புதுச்சேரியில் நாளை பிரபல திரைப்பட நடிகர் ரஜினிகாந்த் நடித்துள்ள கூலி திரைப்படம் வெளியாக உள்ளது. இந்த திரைப்படத்தினை அனைத்து திரையரங்குகளும் திரையரங்குகளும் ஒரே நேரத்தில் வெளியிடுகின்றனர். ஆனால் டிக்கெட் அனைத்தும் ஒரு குறிப்பிட்ட இயக்கத்தினரால் வாங்கப்பட்டதாக கூறப்படுகிறது.

அந்த இயக்கத்தினர் பொதுமக்களின் வாக்காளர் அடையாள அட்டையை பெற்றுக்கொண்டு இலவசமாக டிக்கெட் கொடுப்பதாக விளம்பரம் செய்து வருகின்றனர். இது மிகவும் கண்டிக்கத்தக்க செயல், வாக்காளர் அடையாள அட்டை என்பது தனி மனிதனின் முக்கியமான ஒரு ஆவணம். குறிப்பாக இளைஞர்களின் வாக்காளர் அடையாள அட்டையை வைத்துக்கொண்டு டிக்கெட் கொடுத்து அவர்களையும் அவர் குடும்பத்தினரையும் வாக்காளர்களுக்கு பணம் கொடுத்ததாகவே இதை கருத முடியும். 

வாக்காளர்களுக்கு, வாக்களிக்க பணம் கொடுப்பது இந்திய அரசியல் அமைப்பு சட்டப்படி தண்டனைக்குரிய குற்றமாகும். எனவே வாக்காளர் அடையாள அட்டையை பெற்றுக் கொண்டு திரைப்பட டிக்கெட்டை கொடுப்பதை உடனடியாக அனைத்து திரையரங்களிலும் தடை செய்ய மாவட்ட ஆட்சியர் அவர்கள் நடவடிக்கை எடுக்க வேண்டும். என்று கேட்டுக்கொள்கிறேன் என்று கூறியுள்ளார்.

பாபு ராஜேந்திரன் புதுச்சேரி