‘அரசியல் அழுத்தத்தில் திகார் அதிகாரிகள் பொய் சொல்கிறார்கள்’: இன்சுலின் விவகாரத்தில் கெஜ்ரிவால் புகார்

டெல்லி முதல்வர் அரவிந்த் கெஜ்ரிவால் திகார் சிறை அதிகாரிகளுக்கு திங்கட்கிழமை கடிதம் எழுதி, தனக்கு சர்க்கரை அளவு உச்சத்தில் இருந்த போதிலும், இன்சுலின் வழங்கப்படவில்லை என்று குற்றம்சாட்டியுள்ளதாக ஆம் ஆத்மி வட்டாரங்கள் தெரிவித்தன. "அரசியல் அழுத்தத்தின் கீழ்" சிறை அதிகாரிகள் இந்த விவகாரத்தில் பொய் சொல்கிறார்கள் என்று கெஜ்ரிவால் குற்றம் சாட்டியுள்ளார்.

ஆங்கிலத்தில் படிக்க: ‘Tihar authorities lying under political pressure’: Delhi CM Kejriwal reacts to ‘false’ statements on insulin issue

நீரிழிவு நோயால் பாதிக்கப்பட்டுள்ள ஆம் ஆத்மி கட்சியின் தலைவர் கெஜ்ரிவால், தற்போது ரத்து செய்யப்பட்ட டெல்லி மதுபானக் கொள்கையில் பணமோசடி செய்தது தொடர்பாக அமலாக்க துறையால் கைது செய்யப்பட்டு ஏப்ரல் 1 முதல் திகார் சிறையில் உள்ளார்.

செய்தித்தாள் அறிக்கைகளைக் குறிப்பிட்டு, ஆம் ஆத்மியின் தேசிய ஒருங்கிணைப்பாளரான கெஜ்ரிவால், சிறை அதிகாரிகள் அவரது உடல்நிலை குறித்து "தவறான மற்றும் முறைகேடான அறிக்கைகளை" வெளியிட்டதாக கேள்விப்பட்டு "வேதனை" அடைந்தேன் என்று கடிதம் எழுதியுள்ளார். இன்சுலின் பயன்பாடு குறித்த தனது கவலையை வெளிப்படுத்தியதாகவும், எய்ம்ஸ் மருத்துவர்கள் அவரது உடல்நிலை குறித்து "தீவிரமான கவலை இல்லை" என்று உறுதியளித்ததாகவும் கெஜ்ரிவால் குற்றம் சாட்டினார்.

"அறிக்கை எண். 1: 'இன்சுலின் பிரச்சினையை கெஜ்ரிவால் ஒருபோதும் எழுப்பவில்லை'... இது தவறானது. நான் 10 நாட்களுக்கு, ஒவ்வொரு நாளும், பலமுறை இன்சுலின் பிரச்சினையை எழுப்பினேன். என்னைப் பார்க்க வந்த ஒவ்வொரு டாக்டரிடமும் என்னுடைய உயர் சர்க்கரை அளவைக் காட்டினேன். ஒவ்வொரு நாளும் சர்க்கரை அளவு 3 உச்சங்கள், அதாவது 250-320க்கு இடையே இருப்பதை நான் அவர்களுக்குக் காட்டினேன்" என்று கெஜ்ரிவால் கடிதத்தில் குறிப்பிட்டுள்ளார்.

“எனது சாப்பாட்டிற்கு முன் எடுக்கப்படும் சர்க்கரை அளவு ஒவ்வொரு நாளும் 160-200 வரம்பில் இருப்பதையும் நான் அவர்களுக்குக் காட்டினேன். கிட்டத்தட்ட ஒவ்வொரு நாளும், நான் இன்சுலின் கோரினேன். நான் இன்சுலின் பிரச்சினையை எழுப்பவே இல்லை என்று நீங்கள் எப்படி இப்படி ஒரு அறிக்கையை வெளியிடுகிறீர்கள்? என்று கெஜ்ரிவால் கேள்வி எழுப்பினார்.

எய்ம்ஸ் மருத்துவர்கள் தன்னுடன் 40 நிமிட தொலைப்பேசி ஆலோசனையின் போது, “தீவிர கவலை இல்லை” என்று உறுதியளித்ததாக சிறை அதிகாரிகளின் அறிக்கையை சவால் செய்த கெஜ்ரிவால், டாக்டர்கள் அப்படி எதுவும் உறுதியளிக்கவில்லை என்று கூறினார். “அவர்கள் எல்லா தரவையும் பார்த்துவிட்டு தங்கள் ஆலோசனையை வழங்குவார்கள் என்று சொன்னார்கள். அரசியல் அழுத்தத்தின் கீழ் நீங்கள் பொய்யான அறிக்கைகளை வெளியிட்டது எனக்கு வேதனையளிக்கிறது. நீங்கள் சட்டத்தையும் அரசியலமைப்பையும் பின்பற்றுவீர்கள் என்று நம்புகிறேன்,” என்று கெஜ்ரிவால் கூறினார்.

ஞாயிற்றுக்கிழமை, 40 நிமிட "விரிவான ஆலோசனையில்" முதல்வர் கெஜ்ரிவாலுக்கு தீவிர கவலை இல்லை என்று உறுதியளித்ததாகவும், பரிந்துரைக்கப்பட்ட மருந்துகளைத் தொடர அறிவுறுத்தப்பட்டதாகவும் சிறை வட்டாரங்கள் தெரிவித்தன, அவை தொடர்ந்து மதிப்பீடு செய்யப்பட்டு மதிப்பாய்வு செய்யப்படும்.

இன்சுலின் பிரச்சினையை கெஜ்ரிவால் எழுப்பவில்லை அல்லது ஆலோசனையின் ஒரு பகுதியாக இருந்த மருத்துவர்களால் பரிந்துரைக்கப்படவில்லை என்று அதிகாரிகள் கூறியுள்ளனர்.

லெப்டினன்ட் கவர்னர் வி.கே.சக்சேனாவிடம் சிறை நிர்வாகம் வெள்ளிக்கிழமை அறிக்கை சமர்ப்பித்தது, கெஜ்ரிவாலின் உடல்நிலையை மருத்துவ நிபுணர் ஒருவர் ஏப்ரல் 10 மற்றும் ஏப்ரல் 15 ஆகிய தேதிகளில் பரிசோதித்தார். கெஜ்ரிவாலுக்கு இன்சுலின் மறுக்கப்படவில்லை என்று அறிக்கையில் குறிப்பிடப்பட்டு இருந்தது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“