Karpoori Thakur: சோசலிச அடையாளமாக திகழ்ந்தர் கர்பூரி தாக்கூர். இவர் கடந்த 1988ல் மறைந்த நிலையில், அவருக்கு பாரத ரத்னா விருது வழங்கப்படும் என்று இந்திய ஜனாதிபதி திரௌபதி முர்மு நேற்று செவ்வாய்க்கிழமை அறிவித்தார். பீகார் மாநிலத்தின் இரண்டு முறை முதல்வராகவும் கர்பூரி தாக்கூர் இருந்த நிலையில், அவரின் பிறந்த நூற்றாண்டு விழாவை முன்னிட்டு பீகாரில் மூன்று நாள் கொண்டாட்டங்கள் நடைபெற்று வரும் நேரத்தில் அவருக்கு பாரத ரத்னா விருது வழங்கப்படும் என்கிற அறிவிப்பு வந்துள்ளது.
கர்பூரி தாக்கூருக்கு பாரத ரத்னா வழங்க வேண்டும் என்ற கோரிக்கை பல ஆண்டுகளாக இருந்து வருகிறது. கடந்த ஆண்டு ஜூலை 12ஆம் தேதி, பீகார் சட்டமன்றக் கட்டிடத்தின் நூற்றாண்டு விழா நிகழ்வில் பேசிய ராஷ்ட்ரிய ஜனதா தளம் (ஆர்.ஜே.டி) தலைவரும், துணை முதல்வருமான தேஜஸ்வி பிரசாத் யாதவ், மாநில அரசியல் தலைவர்களால் அடிக்கடி நினைவுகூரப்படும் உயர்ந்த சோசலிச அடையாளமாகவும், இரண்டு முறை மாநில முதல்வராகவும் இருந்த தாக்கூருக்கு "பாரத ரத்னா" வழங்க வேண்டும் என்கிற கோரிக்கையை முன்வைத்தார்.
இந்த நிகழ்ச்சியில் கலந்து கொண்ட பிரதமர் நரேந்திர மோடி, கோரிக்கை குறித்து எந்த கருத்தும் தெரிவிக்காத நிலையில், பீகார் இயக்கத்தின் முன்னோடியான ஜெயப்பிரகாஷ் நாராயண் மற்றும் மாநிலத்தின் முதல் முதல்வர் ஸ்ரீகிருஷ்ணா சின்ஹா போன்ற மாநிலத்தைச் சேர்ந்த மற்ற தலைவர்களுடன் கர்பூரியையும் சேர்த்து குறிப்பிட்டார்.
துணை முதல்வர் தேஜஸ்வியின் கோரிக்கை, 'ஜனநாயக அல்லது மக்கள் தலைவர்' என்று பிரபலமாக அறியப்படும் கர்பூரி தாக்கூருக்கு சமகால பீகார் தலைவர் ஒருவர் மிக உயர்ந்த குடிமகனுக்கு வழங்கப்படும் பாரத ரத்னா விருதை கோருவது இது முதல் முறை அல்ல. உண்மையில், ஆர்.ஜே.டி மற்றும் ஜே.டி (யு) கிட்டத்தட்ட ஒவ்வொரு ஆண்டும் கர்பூரி தாக்கூரின் பிறந்த மற்றும் மறைந்த நினைவு நாளின் போதும் முறையீடு செய்து வந்தனர்.
முதல்வர் நிதிஷ் குமார் செயல்படுத்திய சில திட்டங்கள் கர்பூரி தாக்கூரின் சோசலிச அரசியலின் அடையாளமாக உள்ளன. அது பெண்களின் முதுகலைப் பட்டப்படிப்பு வரை பள்ளிக் கட்டணத்தைத் தள்ளுபடி செய்வது மற்றும் பஞ்சாயத்துகளில் பெண்களுக்கு 50 சதவீத இடஒதுக்கீடு வழங்குவது போன்ற குறிப்பிடத்தக்கவையாகும்.
ஆனால், அரசியல் கட்சிகள் அவரை தங்களுக்கு சொந்தமானவராக உரிமைகோருவதற்கு வரிசையில் நிற்க வைக்கும் கர்பூரி தாக்கூரின் அரசியல் பாரம்பரியம் தான் என்ன?
கர்பூரி தாக்கூரின் வாழ்க்கையை மூன்று கட்டங்களாகப் பிரித்துக் கொள்ளலாம். அவர் சுதந்திரப் போராட்ட வீரராகவும், உறுதியான சோசலிஸ்டாகவும் இருந்தபோது, அவர் ஜெயபிரகாஷ் நாராயண், டாக்டர் ராம்மனோகர் லோஹியா மற்றும் ராம்நந்தன் மிஸ்ரா (1942 முதல் 1967 வரை) போன்ற தலைசிறந்தவர்களின் வழிகாட்டுதலின் கீழ் பணியாற்றினார். மாநில முதல்வர் மற்றும் மிக உயர்ந்த சோசலிஸ்ட் தலைவராக 1970 முதல் 1979 வரையான ஆண்டுகளில் திகழ்ந்தார். மற்றும் அவர் தனது அரசியல் அடையாளத்தை மீண்டும் நிலைநிறுத்த முயற்சித்து 1980-1988 ஆண்டுகளில் செயலாற்றினார்.
தாக்கூர், மாநிலத்தில் உள்ள பிற பிற்படுத்தப்பட்ட வகுப்பினரில் (ஓ.பி.சி -OBC) மிகவும் பிற்படுத்தப்பட்ட வகுப்பினராக (ஈ.பி.சி -EBC) பட்டியலிடப்பட்டுள்ள நை (முடிதிருத்தும்) சமூகத்தைச் சேர்ந்தவர் மற்றும் ராஜ்புத் ஆதிக்கம் செலுத்தும் சம்ஸ்திபூர் மாவட்டத்தில் உள்ள கிராமமான பிடவுஞ்சியா (தற்போது கர்பூரி கிராமம்) -யைச் சேர்ந்தவர். அவர் 1952 தேர்தல்களில் வெற்றி பெற்று சட்டமன்ற உறுப்பினராக அறிமுகமானார். 1985 ஆம் ஆண்டு தனது கடைசி சட்டமன்ற தேர்தல் வரை ஒருவராக இருந்தார். இருப்பினும், அவர் 1984 ஆம் ஆண்டு மக்களவைத் தேர்தலில் சமஸ்திபூரில் போட்டியிட்டபோது தேர்தல் தோல்வியைச் சந்தித்தார். இந்திரா காந்தியின் படுகொலைக்குப் பின் ஏற்பட்ட அனுதாப அலையின் காரணமாக முன்னணி தலைவர்களும் தங்கள் தேர்தல்களில் தோல்வியடைந்தனர்.
தாகூர் 5 மார்ச் 1967 முதல் 28 ஜனவரி 1968 வரை மகாமாயா பிரசாத் சின்ஹா அமைச்சரவையில் துணை முதல்வராகவும் கல்வி அமைச்சராகவும் இருந்தார். 1970 டிசம்பரில், அவர் கருத்தியல் ரீதியாக ஒத்த அமைப்புகளின் கூட்டணியான சம்யுக்தா சோசலிஸ்ட் கட்சியுடன் கூட்டணி அமைத்து முதல் முறையாக மாநிலத்தின் முதல்வராக ஆனார். இருப்பினும், அரசியல் ஸ்திரமின்மை 1967-72 இலிருந்து மாநிலத்தை உலுக்கியது. மேலும் அவரது ஆட்சி ஜூன் 1971 வரை வெறும் 6 மாதங்கள் மட்டுமே நீடித்தது.
பின்னர் அவர் ஜூன் 1977 இல் ஜனதா கட்சியின் முதல்வராக ஆனார் மற்றும் அதன் முக்கிய கூட்டணியான பாரதிய ஜன் சங்கத்துடன் கருத்து வேறுபாடுகள் மற்றும் பிற காரணங்களுடன் அரசாங்கத்தின் வீழ்ச்சிக்கு வழிவகுக்கும் வரை, இரண்டு ஆண்டுகளுக்கு ஆட்சிக் கட்டிலில் இருந்தார்.
முதல்வர் மற்றும் துணை முதல்வராக, அவரது கொள்கைகள் பரந்த அளவில் இருந்தன. அரசு அலுவலகங்களில் இந்தி மொழியை ஊக்குவிப்பது, பீகாரில் உருதுவை இரண்டாவது அலுவல் மொழியாக அறிவிப்பது, பள்ளிக் கட்டணத்தைத் தள்ளுபடி செய்தல், வழக்கமான தேர்தல்களை நடத்தி பஞ்சாயத்து ராஜ் அமைப்பை வலுப்படுத்துவது போன்றவையைக் கொண்டு வந்தார். ஆனால் அவரது மிக முக்கியமான பங்களிப்பு இடஒதுக்கீடு துறையில் இருந்தது. இது மாநிலத்தின் அனைத்து வேலைகளுக்கும் இன்றளவும் பின்பற்றப்படுகிறது.
அவர் 1978 இல் முதல்வராக இருந்தபோது, அந்த நேரத்தில் ஆட்சியில் இருந்த ஜனதா கட்சி அரசாங்கத்தின் முக்கிய அங்கமான பாரதிய ஜனசங்கத்தின் எதிர்ப்பையும் மீறி, தாக்கூர் அடுக்கு இட ஒதுக்கீடு முறையை அமல்படுத்தினார்.
இந்த அமைப்பு, இணையற்ற ஒன்றாக, 26 சதவீத இடஒதுக்கீடு மாதிரியை வழங்கியது. இதில் ஓ.பி.சி சமூகங்கள் 12 சதவீத பங்கைப் பெற்றன; ஓ.பி.சி-களில் இருந்து பொருளாதாரத்தில் பின்தங்கிய வகுப்பினர் 8 சதவீதம் பெற்றனர். பெண்களுக்கு 3 சதவீதம் கிடைத்தது. மேலும் உயர் சாதியினரிடையே பொருளாதாரத்தில் பின்தங்கிய வகுப்பினரும் 3 சதவீதம் பெற்றனர்.
நரேந்திர மோடி அரசாங்கம் பொருளாதாரத்தில் பின்தங்கிய பிரிவினருக்கு 10 சதவீத ஒதுக்கீட்டை அறிமுகப்படுத்துவதற்கு முன்பே கர்பூரி தாக்கூர் அறிமுகப்படுத்தி இருந்தார்.
தி இந்தியன் எக்ஸ்பிரஸ்ஸிடம் பேசிய மாநிலத்தின் முன்னாள் துணை முதல்வர் சுஷில் குமார் மோடி, “ஈ.பி.சி இடஒதுக்கீட்டிற்கான தனி ஏற்பாடு கொண்ட ஓ.பி.சி-க்களுக்கான இடஒதுக்கீடு என்பது கர்பூரி தாக்கூரின் மாஸ்டர் ஸ்ட்ரோக் மற்றும் அவரது நீடித்த மரபு." என்று கூறினார்.
முன்னாள் ஜே.டி(யு) எம்.பி கே.சி தியாகி, தாக்கூரின் நீடித்த அரசியல் பாரம்பரியத்தை அவரது "ஒருங்கிணைக்கும் மற்றும் உள்ளடக்கிய அரசியலுக்கு" காரணம் என்று கூறுகிறார்.
ஆதிக்க ஓ.பி.சி மற்றும் தலித் தலைவர்கள் தங்கள் நிலைப்பாட்டை நிலைநிறுத்திக் கொண்டு, அன்றைய பீகாரின் சூழலில், இடஒதுக்கீடு முக்கியத்துவம் பெறுகிறது. 1977 லோக்சபா தேர்தலில் லாலு பிரசாத் யாதவ் எம்.பி.யாகி கடும் போட்டியை ஏற்படுத்தினார். தலித் தலைவர் ராம் விலாஸ் பாஸ்வான் 1977 இல் எம்.பி.யாக தேர்ந்தெடுக்கப்பட்டார் மற்றும் பீகாரில் சோசலிஸ்ட் தலைவராக கர்பூரியின் நீண்டகால பதவிக்கு ஏற்கனவே சவால் விடுத்தார். ஓரிரு ஆண்டுகளுக்கு முன்பு, ராம் லக்கன் சிங் யாதவ் போன்ற யாதவ் தலைவர்கள் கர்பூரி தாக்கூர் ஓ.பி.சி-களின் உயரமான தலைவராக உருவெடுக்க உதவியதிலிருந்து மாற்றப்பட்டதாக இது பார்க்கப்பட்டது.
1980 க்குப் பிறகு, கர்பூரி ஒரு ஈ.பி.சி தலைவர் என்று அழைக்கப்பட்டார். இதை அவரது வாழ்க்கையின் இறுதி வரை அவரால் கைவிட முடியவில்லை. உயர்சாதியினர், ஓ.பி.சி-க்கள் மற்றும் தலித்துகளின் ஆதரவைத் திரட்டி வெகுஜனத் தலைவராக அவர் தொடங்கியதில் இருந்து இது சற்று முரண்பாடாக இருந்தது. இருப்பினும், இந்த கட்டத்தில் இருந்து 1988 இல் அவர் மறையும் வரை, அவர் மாநிலத்தில் அரசியல் பொருத்தத்தைத் தேட வேண்டியிருந்தது.
அவரது அரசியல் வாழ்க்கையின் பிற்பகுதியில், தாக்கூரின் இடஒதுக்கீடு கொள்கை பொதுமக்களிடமிருந்து நிறைய விமர்சனங்களை ஈர்த்தது. 1988 ஆம் ஆண்டில், தலேல்சக் பகோடா கிராமத்தில் 42 உயர்சாதி மக்கள் நக்சலைட்களால் கொல்லப்பட்டனர் மற்றும் கிராமத்தைப் பார்வையிடச் சென்ற தாக்கூர், அந்த இடத்திலிருந்து கோபமான கும்பலால் கிட்டத்தட்ட விரட்டப்பட்டார். பாட்னாவைச் சேர்ந்த புகைப்படக் கலைஞர் ஒருவர் அவரை மீட்க வேண்டியிருந்தது.
தாகூருடன் பணிபுரிந்த முதியவர்கள் அவரது "எளிமை மற்றும் நன்னடத்தை" பற்றி பேசுகின்றனர். ஜனதா கட்சியின் தலைவர் சந்திரசேகர், அடிக்கடி தேய்ந்து போன குர்தாக்களை அணிந்து வரும் தாக்கூருக்கு புதிய குர்தாவை வாங்குவதற்காக கட்சித் தலைவர்களிடம் நிதி வசூலித்ததாகக் கூறப்படும் சம்பவத்தையும் அவர்கள் விவரிக்கிறார்கள். அதில் மகிழ்ந்த கர்பூரி, "அதிக நிதி இருந்தால், அதை கட்சிக்கு நன்கொடையாக வழங்குவேன்" என்று கூறியதாகவும் கூறப்படுகிறது.
ஜனதா கட்சியின் சோசலிச இலட்சியங்களில் தாக்கூரின் அர்ப்பணிப்பு கடைசி வரை நீடித்ததாக அவருக்கு நெருக்கமானவர்கள் கூறுகின்றனர். உத்தரபிரதேச முன்னாள் முதல்வர் ஹேம்வதி நந்தன் பகுகானா இறந்த பிறகு அவரது கிராமத்தில் உள்ள தாக்கூர் வீட்டிற்குச் சென்று, அது ஒரு இடிந்து விழுந்த குடிசையை விட சற்று அதிகமாக இருப்பதைப் பார்த்ததும் உடைந்த சம்பவம் பலருக்கு நினைவிருக்கிறது.
அவர் சோசலிச அடையாளமாகவும், வாரிசு அரசியலுக்கு எதிராக உறுதியாக இருந்ததாகவும் அறியப்படுகிறார். அவரது மகன் ராம்நாத் தாக்கூர், இப்போது இரண்டாவது முறையாக ஜே.டி(யு) ராஜ்யசபா எம்.பி., -யாக உள்ளார். அவரது தந்தையின் மரணத்திற்குப் பிறகுதான் அவர் அரசியலில் சேர்ந்தார் என்பது குறிப்பிடத்தக்கது.
ஆங்கிலத்தில் படிக்கவும்: Bharat Ratna for Karpoori Thakur, two-time Bihar CM and socialist icon
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
/indian-express-tamil/media/agency_attachments/33Ho9XHwZawzDekwDLnu.png)
Follow Us/indian-express-tamil/media/media_files/MVsd6h1j7VWd5AuUXyqX.jpg)