உ.பி., தேர்தல்; வளர்ச்சி, இந்துத்துவாவை முன்னிறுத்தி மீண்டும் முதல்வராக திட்டமிடும் யோகி ஆதித்யநாத்

Lalmani Verma

UP Assembly Elections Primer: With plank of development, Hindutva, Yogi eyeing second term as CM: நாட்டின் அரசியல் ரீதியாக மிகவும் முக்கியத்துவம் வாய்ந்த மாநிலமான உத்தரபிரதேசத்தில் நடக்கவிருக்கும் தேர்தல், பாரதிய ஜனதா கட்சியின் (பாஜக) பிராண்டான யோகி ஆதித்யநாத் முதல்வராக சந்திக்கும் முதல் சட்டமன்றத் தேர்தலாகும். இந்த தேர்தல் யோகி ஆதித்யநாத் மற்றும் சமாஜ்வாதி கட்சி (எஸ்பி) தலைவர் அகிலேஷ் யாதவ் மற்றும் பகுஜன் சமாஜ் கட்சி (பிஎஸ்பி) தலைவர் மாயாவதி உள்ளிட்ட அவரது முக்கிய போட்டியாளர்களுக்கு சவாலானதாக இருக்கும்.

கடந்த 2017ஆம் ஆண்டு நடைபெற்ற உ.பி.சட்டசபை தேர்தலில், அகிலேஷ் தலைமையிலான SP ஆட்சியில் இருந்தபோது, ​​அப்போதைய பிரதான எதிர்க்கட்சியான BSP போன்ற போட்டி கட்சிகள், சட்டம் ஒழுங்கு மற்றும் ஊழல் போன்ற பிரச்சனைகளில் அகிலேஷ் அரசுக்கு எதிராக பிரச்சாரம் செய்தன. முசாபர்நகர் கலவரம் மற்றும் கைரானாவில் இருந்து ஹிந்துக்கள் வெளியேறியதாகக் கூறப்படுவதன் மூலம் பாஜக அதன் "முஸ்லீம்களை திருப்திப்படுத்துதல்" என்ற திட்டத்தில் கவனம் செலுத்தியது.

பிப்ரவரி-மார்ச் 2022 உ.பி. தேர்தலுக்கு முன்னதாக, முக்கிய எதிர்க்கட்சியான எஸ்பி, பிஎஸ்பி மற்றும் காங்கிரஸ் உள்ளிட்ட பாஜகவுக்கு எதிராக முக்கிய போட்டியாளர்கள் ஆதித்யநாத் அரசாங்கத்தை விவசாயிகள் பிரச்சனைகள், சட்டம் மற்றும் ஒழுங்கு, விலைவாசி உயர்வு மற்றும் கொரோனா தொற்றுநோயை பாஜக அரசாங்கம் தவறாகக் கையாண்டதாகக் கூறப்படுவது போன்ற பல்வேறு பிரச்சினைகளில் குறிவைக்க முயல்கின்றனர்.

பாஜகவின் பிரச்சாரத் திட்டம் இரண்டு முக்கியப் பிரச்சினைகளை அடிப்படையாகக் கொண்டது. அவை ஆதித்யநாத் அரசாங்கத்தால் மேற்கொள்ளப்பட்ட வளர்ச்சிப் பணிகள் மற்றும் இந்துத்துவா.

அயோத்தியில் ஏற்கனவே தொடங்கப்பட்ட ராமர் கோவில் கட்டுவதை காவி கட்சி தனது "பெரிய சாதனையாக" காட்டி வருகிறது. அதே நேரத்தில், மத்திய உள்துறை அமைச்சர் அமித் ஷா, கட்சியின் தேசியத் தலைவர் ஜேபி நட்டா, முதல்வர் ஆதித்யநாத் உள்ளிட்ட பாஜகவின் உயர்மட்டத் தலைவர்கள், 1990ஆம் ஆண்டு அயோத்தியில் கரசேவகர்கள் மீது அப்போதைய முலாயம் சிங் யாதவ் ஆட்சியின் போது துப்பாக்கிச் சூடு நடத்தியதற்கு எஸ்பி கட்சி மன்னிப்பு கேட்க வேண்டும் என்று கோரி வருகின்றனர்.

முகமது அலி ஜின்னாவைப் புகழ்ந்து பேசியதற்காக SP தலைவர் அகிலேஷ் யாதவையும் அவர்கள் குறிவைத்து வருகின்றனர்.

உ.பி.யின் பல்வேறு பகுதிகளில் சமீபத்திய பேரணிகளில், முன்னணி பாஜக பிரச்சாரகர்கள் வாக்குகளை ஒருங்கிணைக்கும் பிரச்சினைகளை எழுப்புவதற்கான முயற்சிகளை முடுக்கிவிட்டுள்ளனர். அமித் ஷா தனது பேரணிகளில், சிறையில் அடைக்கப்பட்ட SP தலைவர் அசம் கான், சிறையில் அடைக்கப்பட்ட BSP MLA முக்தார் அன்சாரி மற்றும் காங்கிரஸ் தலைவர்களான இம்ரான் மசூத் மற்றும் நசிமுதீன் சித்திக் போன்ற முஸ்லிம் எதிர்க்கட்சித் தலைவர்களின் பெயர்களை குறிப்பிட்டு, அவர்களின் கட்சிகளை குறிவைத்து தாக்கியுள்ளார்.

அமேதியில் நடந்த பொதுக்கூட்டத்தில், முதல்வர் ஆதித்யநாத், “கர்வ் சே கஹோ ஹம் ஹிந்து ஹைன்” (நான் ஒரு இந்து என்று பெருமையுடன் சொல்லுங்கள்) என்று சொல்வதில் தனக்கு எந்தத் தயக்கமும் இல்லை என்றார்.

பாஜக மற்றும் சமாஜ்வாதி கட்சிகளுக்கு இடையே தேர்தலை இருமுனையாக மாற்றும் முயற்சியில், ஆளும் கட்சி தலைவர்கள் பிஎஸ்பி மற்றும் காங்கிரஸ் தலைவர்களை விட அகிலேஷை குறிவைக்கின்றனர், முஸ்லீம் வாக்குகள் தலித் ஆதரவு அடிப்படை கட்சியான பகுஜன் சமாஜ் கட்சிக்கு ஈர்க்கப்பட்டால், காவி கட்சிக்கு பெரிய சவாலாக இருக்கலாம்.

சட்டசபை தேர்தல் அட்டவணையை தேர்தல் கமிஷன் சனிக்கிழமை அறிவிப்பதற்கு ஓரிரு நாட்களுக்கு முன்னதாக, யோகி ஆதித்யநாத் அரசு கிராமப்புற மற்றும் நகர்ப்புறங்களில் உள்ள தனியார் குழாய் கிணறுகளுக்கான மின் கட்டணத்தை குறைப்பதாக அறிவித்தது. விவசாயிகளுக்கு இலவச மின்சாரம் மற்றும் வீடுகளுக்கு மாதம் 300 யூனிட் இலவச மின்சாரம் வழங்கப்படும் என எஸ்பி மற்றும் ஆம் ஆத்மி கட்சி வாக்குறுதி அளித்ததை அடுத்து இந்த அறிவிப்பு வெளியாகியுள்ளது.

கொரோனா இரண்டாம் அலையை தவறாக கையாண்டது என்று கூறப்படும் பாஜக மீதான எதிர்க்கட்சிகளின் தாக்குதலைக் கருத்தில் கொண்டு, யோகி ஆதித்யநாத் அரசாங்கம் தனது ஆட்சிக் காலத்தில் புதிய மருத்துவக் கல்லூரிகள் மற்றும் எய்ம்ஸ் மையங்கள் மற்றும் விரைவுச் சாலைகளை அமைப்பதற்கான அதன் நகர்வுகளை, கடந்த எஸ்பி ஆட்சியின் மந்தமான செயல்பாடுகளுடன் ஒப்பிட்டு முன்னிலைப்படுத்துகிறது.

உ.பி.யில் மிகப் பெரிய பாஜக தலைவராக யோகி ஆதித்யநாத் உருவெடுத்துள்ளார், மேலும் அவரது அரசாங்கம் கடந்த ஐந்து ஆண்டுகளாக ஒரு விளம்பரப் பிரச்சாரத்தை கட்டவிழ்த்து விட்டது. அவர் ஒவ்வொரு மாவட்டத்திலும் சுற்றுப்பயணம் செய்துள்ளார் மற்றும் ஐந்து ஆண்டுகளில் மாநிலத்தில் உள்ள பெரும்பாலான சட்டமன்ற தொகுதிகளை பார்வையிட்டார். கடந்த இரண்டு மாதங்களாக, 2017 தேர்தலில் பாஜக தோல்வியடைந்த தொகுதிகளில் கவனம் செலுத்தினார். சட்டசபை தேர்தலில் போட்டியிடப் போவதாகவும் அறிவித்துள்ளார். 2017 தேர்தலில் பாஜக 312 இடங்களை வென்றது, மேலும் 2022 தேர்தலில் அப்னா தளம் (சோனிலால்) மற்றும் நிஷாத் கட்சியுடன் கூட்டணி வைத்து மீண்டும் 300 இடங்களைக் கடக்க இலக்கு நிர்ணயித்துள்ளது.

SP தலைவர் அகிலேஷ், 2017 இல் BJP கூட்டணியில் இருந்த மகான் தளம், ஜன்வாடி சோசலிஸ்ட் கட்சி மற்றும் சுஹேல்தேவ் பாரதிய சமாஜ் கட்சி (SBSP) போன்ற சிறிய கட்சிகளுடன் கூட்டணி அமைத்து, யாதவ் அல்லாத OBC களை கவர்ந்திழுப்பதன் மூலம் வெற்றியை தேடுகிறார்.

SP கட்சி, ராஷ்ட்ரிய லோக் தளம் (RLD) உடன் இணைந்துள்ளது, இது மேற்கு உ.பி.யின் விவசாயப் பகுதியில் வாக்குகளைப் பெறுவதற்கு அவர்களுக்கு உதவக்கூடும். பிஎஸ்பி மற்றும் பிஜேபியில் இருந்து பத்துக்கும் மேற்பட்ட சிட்டிங் எம்எல்ஏக்கள் மற்றும் பிஎஸ்பியில் இருந்து பல முக்கிய ஓபிசி தலைவர்கள் சமீபத்திய மாதங்களில் எஸ்பியில் இணைந்துள்ளனர். 2012ல் தனித்துப் போட்டியிட்ட SP பெரும்பான்மை பலத்துடன் இருந்தது. 2017ல் காங்கிரஸுடன் கூட்டணி அமைத்தபோது, ​​403 உறுப்பினர்களைக் கொண்ட உ.பி. சட்டசபையில் அதன் எண்ணிக்கை 47 ஆக சரிந்தது.

இது மாயாவதிக்கு பெரும் சவாலான தேர்தலாகவும் அமையும். 2012 மற்றும் 2017 ஆம் ஆண்டுகளில் தொடர்ந்து இரண்டு சட்டமன்றத் தேர்தல்களில் தோல்வியடைந்த பின்னர், BSP இப்போது "தலித்துகள் மற்றும் பிராமணர்களுக்கு இடையே பைச்சாரா (சகோதரத்துவத்தை) உருவாக்கும்" வியூகத்திற்கு திரும்பியுள்ளது.

2007ல், பகுஜன் சமாஜ் கட்சி பெரும்பான்மை பெற்று, நான்காவது முறையாக உ.பி முதல்வராக மாயாவதி பதவியேற்றபோது, ​​அக்கட்சி இந்த "பைச்சாரா" உத்தியை வெற்றிகரமாக செயல்படுத்தியது.

2022 தேர்தலுக்கு சில மாதங்களுக்கு முன்பு, அந்த சமூக கலவையை மீண்டும் உருவாக்க பிராமணர்கள் மற்றும் தலித்துகளை அணுகுவதற்காக கட்சியின் தேசிய பொதுச் செயலாளர் எஸ்.சி.மிஸ்ராவை மாயாவதி அனுப்பினார். ஜாட்கள், முஸ்லிம்கள் மற்றும் ஓபிசிக்களுடன் தலித்துகளின் "பைச்சாரா"வை நீட்டிக்கவும் மாயாவதி முயற்சிக்கிறார்.

BSP 2007 இல் 206 இடங்களை வென்றது, ஆனால் 2012 இல் 80 இடங்களாகக் குறைந்துவிட்டது. 2017 தேர்தலில் அக்கட்சி 19 இடங்களை வெல்ல போராடியது.

உ.பி.யில் முப்பது ஆண்டுகளுக்கும் மேலாக ஆட்சியில் இல்லாத நிலையில் காங்கிரஸ் கட்சி தொடர்ந்து அரசியல் வனாந்தரத்தில் உள்ளது. AICC பொதுச் செயலாளர் பிரியங்கா காந்தி வதேரா தலைமையில், கட்சி உ.பி.,யில் அதன் மறுமலர்ச்சியை எதிர்பார்க்கிறது. எந்தவொரு சாதிக் குழுக்கள் அல்லது சமூகங்களுக்கிடையில் அடிப்படை ஆதரவுத் தளம் இல்லாத கட்சி, பெண் வாக்காளர்களைச் சுற்றி தனது பிரச்சாரத்தை மையப்படுத்த முயல்கிறது. 2017ல் சமாஜ்வாதி கட்சியுடன் கூட்டணி வைத்த போது வெறும் 7 இடங்களை மட்டுமே பெற்றிருந்த காங்கிரஸுடன் கைகோர்க்க எந்த கட்சியும் ஆர்வம் காட்டவில்லை. முந்தைய தேர்தல்களைப் போலல்லாமல், அமேதியின் முன்னாள் எம்.பி., ராகுல் காந்தி, மாநிலத்தில் தேர்தல் பிரச்சாரத்தில் இருந்து, குறைந்தபட்சம் இதுவரையிலும் காணவில்லை.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil