'டெல்லியில் மட்டும் ஏன் பட்டாசு தடை?' இந்தியா முழுவதும் ஒரே கொள்கை தேவை: சுப்ரீம் கோர்ட்

டெல்லி என்.சி.ஆர் பகுதியில் பட்டாசுகளுக்கு விதிக்கப்பட்டுள்ள தடை குறித்து உச்சநீதிமன்றத் தலைமை நீதிபதி பி.ஆர். கவாய், "டெல்லி மக்கள் 'இந்நாட்டின் உயரடுக்கு குடிமக்களா? அவர்களுக்கு மட்டும் ஏன் மாசு இல்லாத காற்று கிடைக்க வேண்டும்?'" என்று கேள்வி எழுப்பி உள்ளார். காற்று மாசு ஒரு தேசியப் பிரச்னையாக மாறியிருந்தால், அதற்கான கொள்கை இந்தியா முழுவதும் ஒரே மாதிரியாக இருக்க வேண்டும் என்றும் அவர் கூறினார். "பட்டாசுகளுக்குத் தடை விதிக்கப்பட வேண்டும் என்றால், அது நாடு முழுவதும் விதிக்கப்படட்டும்," என்று நீதிபதி கூறினார்.

ஹரியானா பட்டாசு உற்பத்தியாளர்கள் குழு தாக்கல் செய்த மனுவை விசாரித்தபோது, நீதிபதி வினோத் சந்திரன் உடன் அமர்ந்திருந்த தலைமை நீதிபதி கவாய், இந்தக் கருத்துகளைத் தெரிவித்தார். மனுதாரர்கள், டெல்லி-என்.சி.ஆர். பகுதியில் பட்டாசு உற்பத்தி, சேமிப்பு, விற்பனை மற்றும் பயன்பாடு ஆகியவற்றை முழுமையாகத் தடை செய்த உச்ச நீதிமன்றத்தின் ஏப்ரல் 3, 2025 உத்தரவைத் திருத்தக் கோரியிருந்தனர்.

இந்த செய்தியை ஆங்கிலத்தில் படிக்க

"டெல்லி என்.சி.ஆர். குடிமக்களுக்கு மாசு இல்லாத காற்றுக்கு உரிமை இருந்தால், நாட்டின் மற்ற குடிமக்களுக்கு அந்த உரிமை ஏன் இல்லை? இந்த பகுதி தலைநகராக இருப்பதாலோ அல்லது உச்ச நீதிமன்றம் இங்கு இருப்பதாலோ, இங்கு மட்டும் மாசு இல்லாத காற்று இருக்க வேண்டும் என்று அர்த்தம் இல்லை," என்று நீதிபதி கவாய் கூறினார்.

மாசுபாடும், கொள்கையும்

இந்தத் தடையின் பின்னணியை விளக்கிய நீதிமன்றத்திற்கு உதவும் வழக்கறிஞரான அபராஜிதா சிங், குளிர்காலங்களில் டெல்லியில் மக்கள் மூச்சுத் திணறல் ஏற்படும் அளவுக்கு நிலைமை மோசமாக இருக்கும் என்றார். அப்போது தலைமை நீதிபதி, "கடந்த குளிர்காலத்தில் நான் அமிர்தசரஸில் இருந்தபோது, அங்குள்ள மாசு டெல்லியை விட அதிகமாக இருந்தது என்று கூறினார்கள்," என்று குறிப்பிட்டார்.

இதற்குப் பதிலளித்த சிங், இது தேசியப் பிரச்னை என்றார். தலைமை நீதிபதி, "அது தேசியப் பிரச்சனை என்றால், அதற்கான தீர்வும் தேசிய அளவில் இருக்க வேண்டும். எனவே, எந்தக் கொள்கை வகுக்கப்பட்டாலும் அது இந்தியா முழுவதும் ஒரே மாதிரியாக இருக்க வேண்டும். டெல்லி மக்களுக்கு மட்டும் தனிச்சலுகை அளிக்க முடியாது, அவர்கள் இந்த நாட்டின் உயரடுக்குக் குடிமக்கள் என்பதால் அல்ல," என்று கூறினார்.

ஏழைகளின் வாழ்வாதாரம்

"காற்று மாசுபாடு உயரடுக்கு மக்களை மட்டும் பாதிக்கிறது என்பது தவறான புரிதல். உயரடுக்கு மக்கள் தங்களைப் பாதுகாத்து கொள்வார்கள். தீபாவளியன்று, டெல்லியில் பாதி பேர் வெளியூர் சென்றுவிடுகிறார்கள். அவர்களிடம் காற்று சுத்திகரிப்பான்கள் (Air Purifiers) உள்ளன. ஆனால், தெருவில் இருக்கும் ஏழைகள், தொழிலாளர்களுக்கு அந்த வாய்ப்பு இல்லை," என்று சிங் விளக்கினார்.

அதற்கு நீதிபதி, "அதனால்தான், நாடு முழுவதும் ஒரே கொள்கை இருக்க வேண்டும் என்று நாங்கள் சொல்கிறோம். டெல்லிக்கு மட்டும் தனிக் கொள்கை இருக்கக்கூடாது. பட்டாசுக்குத் தடை விதிக்கப்பட்டால், அது நாடு முழுவதும் விதிக்கப்படட்டும். பட்டாசுத் தொழிலை நம்பியுள்ள ஏழைகளையும் நாம் கவனத்தில் கொள்ள வேண்டும்," என்றார். காற்று மாசுபாட்டைக் கட்டுப்படுத்த நீதிமன்றம் கட்டுமான நடவடிக்கைகளுக்கு தடை விதிக்கும்போது, தொழிலாளர்கள்தான் பாதிக்கப்படுகிறார்கள் என்றும் நீதிபதி குறிப்பிட்டார். இருப்பினும், அவர்களுக்கு அரசு இழப்பீடு வழங்குகிறது என்று சிங் பதிலளித்தார்.

பசுமைப் பட்டாசு குறித்து அறிக்கை

மத்திய அரசின் சார்பில் ஆஜரான கூடுதல் சொலிசிட்டர் ஜெனரல் ஐஸ்வர்யா பாட்டி, தேசிய சுற்றுச்சூழல் பொறியியல் ஆராய்ச்சி நிறுவனம் (NEERI) பசுமைப் பட்டாசுகள் குறித்து ஆய்வு செய்து வருவதாகக் கூறினார். காற்று தர மேலாண்மை ஆணையம் (CAQM), NEERI உடன் கலந்தாலோசித்து ஒரு அறிக்கையை சமர்ப்பிக்கும் என்றும் அவர் தெரிவித்தார். இந்த அறிக்கைக்குக் காத்திருப்பதாகக் கூறிய நீதிபதிகள், "அறிக்கை வரட்டும், நாங்கள் ஆய்வு செய்கிறோம்," என்றனர்.

பட்டாசு உற்பத்தியாளர்கள் சார்பில் ஆஜரான மூத்த வழக்கறிஞர் கே. பரமேஸ்வர், முழுமையான தடையால் அதிகாரிகள் அனைத்து உரிமங்களையும் ரத்து செய்யத் தொடங்கிவிட்டதாகத் தெரிவித்தார். "2028, 2030 வரை உரிமங்கள் இருந்தன. வெடிபொருள் உரிமம் பெறுவது ஒரு கடினமான செயல். அனைத்து உரிமங்களையும் ரத்து செய்யத் தொடங்கினால் எப்படி?" என்று அவர் கேள்வி எழுப்பினார். அதற்கு நீதிபதிகள், "இப்போது உள்ள நிலையை நீடிக்க வேண்டும்" என்று அதிகாரிகளுக்கு உத்தரவிட்டனர்.