அத்வானி, கர்பூரி தாக்கூருக்கு பாரத ரத்னா; இந்துத்துவா, சமூக நீதியை தேர்தல் செய்தியாக தெளிவுபடுத்திய பா.ஜ.க

Vikas Pathak

பா.ஜ.க மூத்த தலைவரும், முன்னாள் துணைப் பிரதமருமான எல்.கே.அத்வானிக்கு, நாட்டின் உயரிய விருதான பாரத ரத்னா விருதை அரசு வழங்குவதாக பிரதமர் நரேந்திர மோடி சனிக்கிழமை அறிவித்தார்.

ஆங்கிலத்தில் படிக்க: With Bharat Ratna for Advani after Karpoori, BJP message for polls clear: social justice, Hindutva

“ஸ்ரீ எல்.கே அத்வானி ஜிக்கு பாரத ரத்னா விருது வழங்கப்படுவதை பகிர்ந்து கொள்வதில் நான் மிகவும் மகிழ்ச்சியடைகிறேன். நானும் அவரிடம் பேசி, இந்த கவுரவம் பெற்றதற்கு வாழ்த்து தெரிவித்தேன். நமது காலத்தின் மிகவும் மதிக்கப்படும் அரசியல்வாதிகளில் ஒருவரான அத்வானி, இந்தியாவின் வளர்ச்சிக்கு ஆற்றிய பங்களிப்பு மகத்தானது, ”என்று சமூக ஊடக தளமான X தளத்தில் மோடி பதிவிட்டுள்ளார்.

“அடிமட்டத்தில் பணியாற்றியதில் இருந்து நமது துணைப் பிரதமராக நாட்டுக்கு சேவை செய்வது வரையிலான வாழ்க்கை அவருடையது. அத்வானி தன்னை நமது உள்துறை அமைச்சராகவும், I&B அமைச்சராகவும் சிறப்பித்துக் கொண்டார். அவரது நாடாளுமன்ற விவாதங்கள் எப்பொழுதும் முன்னுதாரணமாகவும், செழுமையான நுண்ணறிவுகள் நிறைந்ததாகவும் இருந்தன” என்று பிரதமர் கூறினார்.

சோசலிஸ்ட் தலைவரும் பீகார் முன்னாள் முதலமைச்சருமான மறைந்த கர்பூரி தாக்கூருக்கு பாரத ரத்னா விருது வழங்கப்பட்டு, ஜனவரி 22ஆம் தேதி அயோத்தியில் ராமர் கோயில் கும்பாபிஷேகம் செய்யப்பட்ட சில நாட்களுக்குப் பிறகு இந்த முடிவு எடுக்கப்பட்டுள்ளது.

பாரத ரத்னா விருது பெற்ற கர்பூரி தாக்கூர் மற்றும் எல்.கே. அத்வானி ஆகிய இருவரின் பயணம், இந்த நாட்களில் பா.ஜ.க.,வின் அரசியல் சொற்பொழிவின் இரண்டு தூண்களான சமூக நீதி மற்றும் இந்துத்துவத்தை எடுத்துக்காட்டுகிறது.

1989 ஆம் ஆண்டு பாலம்பூர் தீர்மானத்தில் ராம ஜென்மபூமி இயக்கத்தை பா.ஜ.க அங்கீகரித்தபோது கட்சி தலைவராக அத்வானி இருந்தார், மேலும் செப்டம்பர் 1990 இல் சோம்நாத்திலிருந்து அயோத்தி வரை ராமர் கோயில் ரத யாத்திரையை ஆரம்பித்த தலைவராகவும் இருந்தார்.

1978 ஆம் ஆண்டில் ஓ.பி.சி மற்றும் மிகவும் பிற்படுத்தப்பட்ட வகுப்பினருக்கு இடஒதுக்கீடு வழங்கிய வட இந்தியாவின் முதல் தலைவர் கர்பூரி தாக்கூர் ஆவார். பா.ஜ.க.,வின் முன்னோடியான ஜனசங்கத்தின் ஆதரவுடன் கர்பூரி தாக்கூர் பீகாரின் துணை முதல்வராகவும் முதல்வராகவும் ஆனார்.

இரண்டு விருதுகளும் ஒன்றன் பின் ஒன்றாக அறிவிக்கப்பட்டது குறிப்பிடத்தக்கது. ​​சமூக நீதி, எதிர்க்கட்சிகளின் தேர்தல் களமாக இருந்தபோது, கர்பூரி தாக்கூருக்கு பாரத ரத்னா அறிவிக்கப்பட்டது, ​​ தொடர்ந்து ஒரு சில நாட்களுக்குள் பீகாரில் ஜாதிவாரி கணக்கெடுப்பின் சிற்பியான ஜக்கிய ஜனதா தளம் தலைவரும், பீகார் முதல்வருமான நிதிஷ் குமார், தேசிய ஜனநாயகக் கூட்டணியில் இணைந்தார். இந்திய அரசியலில் இந்துத்துவத்தை மையமாக கொண்டு வந்த அரசியல்வாதி அத்வானிக்கு பாரத ரத்னா விருது வழங்குவது, இந்துத்துவா மற்றும் ராமர் கோவில் இயக்கத்தின் மையத்தை அரசே அங்கீகரிப்பதற்கு சமம்.

அத்வானிக்கான பாரத ரத்னா விருது மூத்த தலைவருக்கு விடை கொடுக்கும் தருணத்தையும் குறிக்கிறது. பிரதமர் மோடி தனது வழிகாட்டிக்கு கவுரவத்தை அறிவிப்பதாகக் கருதப்படுவதால், அரசியல் வாழ்வின் அந்தியில் இருக்கும் மூத்த தலைவர்களை அங்கீகரித்து, கட்சி ஒரு அலகாகச் செயல்படுகிறது என்பது வாக்காளர்களுக்கு தெரிவிக்கப்பட்ட செய்தி.

எல்.கே. அத்வானியின் அலுவலகம் அத்வானி மூலம் ஒரு அறிக்கையை அனுப்பியது, ஜனாதிபதி திரௌபதி முர்மு மற்றும் பிரதமர் மோடிக்கு அவருக்கு மரியாதை அளித்ததற்கு நன்றி தெரிவித்தது. “இன்று எனக்கு வழங்கப்பட்டுள்ள பாரத ரத்னா விருதை மிகுந்த பணிவுடனும் நன்றியுடனும் ஏற்றுக்கொள்கிறேன். இது ஒரு நபராக எனக்கு கிடைத்த மரியாதை மட்டுமல்ல, எனது வாழ்நாள் முழுவதும் என்னால் முடிந்தவரை சேவை செய்ய நான் பாடுபட்ட இலட்சியங்கள் மற்றும் கொள்கைகளுக்கும் கூட கிடைத்த மரியாதை” என்று அறிக்கையில் தெரிவிக்கப்பட்டுள்ளது.

14 வயதில் ராஷ்டிரிய ஸ்வயம்சேவக் சங்கத்தில் சேர்ந்ததை நினைவு கூர்ந்த அத்வானி, தனது நாட்டுக்கு அர்ப்பணிப்புடன் சேவை செய்வதையே எப்போதும் நினைப்பதாகவும், தனது வாழ்க்கையை தனக்காக அல்ல, தேசத்திற்கு சொந்தமானதாக கருதுவதாகவும் கூறினார். தீன் தயாள் உபாத்யாயா, அடல் பிஹாரி வாஜ்பாய் மற்றும் அவரது மறைந்த மனைவி கமலா ஆகியோரையும் நினைவு கூர்ந்தார்.

ஒரு அமைப்பாளராக இருந்து, காங்கிரஸுக்கு எதிரான எதிர்க்கட்சி ஒற்றுமையால் பிறந்த ஜனதா கட்சி அரசாங்கத்தில் 1977 இல் தகவல் மற்றும் ஒளிபரப்புத் துறை அமைச்சராக உயர்ந்தார். 1984 இல் காங்கிரஸிடம் இருந்து பா.ஜ.க தோல்வியடைந்த பிறகு, கட்சியின் தலைவராக அத்வானி முதலில் 1989 ஆம் ஆண்டு கட்சியின் பாலம்பூர் தீர்மானத்தின் மூலமாகவும், பின்னர் 1990 ஆம் ஆண்டு ரத யாத்திரை மூலமாகவும் ராமர் கோவில் இயக்கத்துடன் பா.ஜ.க.,வை இணைத்தார். 1970 முதல் ராஜ்யசபாவில் இருந்த புதிய இந்துத்துவா சின்னமான அத்வானி, இப்போது வெகுஜனத் தலைவராகி, 1989 முதல் டெல்லி மற்றும் காந்திநகரில் இருந்து மக்களவைத் தேர்தல்களில் வெற்றிபெறத் தொடங்கினார்.

எவ்வாறாயினும், பாபர் மசூதி இடிப்புக்குப் பிறகு, "மதச்சார்பற்ற" கட்சிகள் அவர் மீது பழியைச் சுமத்தியதால், ரத யாத்திரை அவரை அரசியல் வனாந்தரத்திற்குள் தள்ளியது. 1998 முதல் 2004 வரை பிரதமராக இருந்த வாஜ்பாய் ஒருமித்த கருத்துடன் கைகோர்த்து பணியாற்ற அவர் விருப்பத்துடன் முடிவு செய்தார். 2005ல், பாகிஸ்தானில் ஜின்னாவை "மதச்சார்பற்றவர்" என்று அழைத்ததால், அத்வானி பா.ஜ.க தலைவர் பதவியை ராஜினாமா செய்தார். இது தவறான பிம்பத்தை மாற்றி ஒரு மிதமான பிம்பத்தை முன்னிறுத்தும் ஒரு முயற்சியாக விமர்சகர்களால் பார்க்கப்பட்டது. 2009 ஆம் ஆண்டில், அப்போது ஒரு கூட்டணியை உருவாக்க முயற்சித்து, பிரதமர் வேட்பாளராக அத்வானி தலைமையில் பா.ஜ.க பரிதாபமாக தோற்றது. மக்களவையில் அக்கட்சி வெறும் 116 இடங்களையும், காங்கிரஸ் 206 இடங்களையும் பெற்றது.

அத்வானிக்கு மீண்டும் அதிகாரம் கிடைக்கவில்லை. 2013 ஆம் ஆண்டு, கோவாவில் பா.ஜ.க.,வின் மத்திய பிரச்சார ஒருங்கிணைப்பாளராக நரேந்திர மோடி அறிவிக்கப்பட்டபோது, ​​அத்வானி கட்சிப் பதவிகள் அனைத்தையும் ராஜினாமா செய்தார். 1990ல் சோம்நாத்தில் இருந்து ராமர் ரத யாத்திரை தொடங்கியபோது அவருடன் இருந்தவர் மற்றும் அவர் ஒருமுறை வழிகாட்டியாக இருந்த மோடியுடனான அவரது உறவுகள் மோசமடைந்ததாகத் தெரிகிறது. கட்சியின் நாடாளுமன்ற குழு அவரது ராஜினாமாவை நிராகரித்தது, அப்போதைய பா.ஜ.க தலைவர் ராஜ்நாத் சிங், அத்வானி கட்சிக்கு தொடர்ந்து வழிகாட்டுவார் என்று கூறினார், மேலும் தேசபக்தரான அத்வானி தனது ராஜினாமா கடிதத்தை திரும்பப் பெற்றார்.

ஆகஸ்ட், 2014 இல், அப்போது எம்.பி.யாக இருக்கும் அத்வானி, மூத்த தலைவரான முரளி மனோகர் ஜோஷியுடன் இணைந்து பா.ஜ.க நாடாளுமன்றக் குழுவில் தனது இடத்தை இழந்தார். ஜூன் 2015 இல், அத்வானி "ஜனநாயகத்தை நசுக்கக்கூடிய சக்திகள் வலுவாகிவிட்டதால், அவசரநிலையை நிராகரிக்க முடியாது" என்று கூறினார், அப்போதைய நிதியமைச்சர் அருண் ஜெட்லி ஒரு நிகழ்வில், அத்வானியின் பெயரை குறிப்பிடாமல், அவசரநிலைக்கு சாத்தியம் இல்லை என்று கூறினார்.

அத்வானி இடம் பெற்றிருந்த பா.ஜ.க மார்கதர்ஷக் மண்டல், ஒருபோதும் சந்திக்கவில்லை, மேலும் அவர் 2019 ஆம் ஆண்டு மக்களவைத் தேர்தலில் நிறுத்தப்படவில்லை, இது அவரது அரசியல் வாழ்க்கையின் முடிவைக் குறிக்கிறது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“