பிரிஜ் பூஷண் தவறாக நடந்துக் கொண்டதைக் காட்டும் புகைப்படங்கள்; போலீஸ் குற்றப் பத்திரிக்கை

Mahender Singh Manral 

"(ஒரு) புகார்தாரரிடம் ”பாலியல் ரீதியாக தவறாக நடப்பதைக்” காட்டுவதாகக் கூறப்படும் இரண்டு புகைப்படங்கள்; அவரது தொலைபேசி இருப்பிடம் மற்றொருவரின் சாட்சியத்துடன் பொருந்துகிறது; பாலியல் துன்புறுத்தல் சம்பவம் நடந்ததாகக் கூறப்படும் நிகழ்வில் அவர் இருப்பதை உறுதிப்படுத்தும் புகைப்படங்களின் தொகுப்பு - இவை இந்திய மல்யுத்தக் கூட்டமைப்பு (WFI) முன்னாள் தலைவரும் பா.ஜ.க எம்.பி.,யுமான பிரிஜ் பூஷன் சரண் சிங்கிற்கு எதிரான டெல்லி காவல்துறை குற்றப்பத்திரிக்கையில் உள்ள “தொழில்நுட்ப ஆதாரங்களின்” ஒரு பகுதியாகும்.

இருப்பினும், புகார்களின்படி, டெல்லி அசோகா சாலையில் உள்ள WFI அலுவலகம், பிரிஜ் பூஷன் சரண் சிங்கின் வீடு மற்றும் குறைந்தது இரண்டு பாலியல் துன்புறுத்தல் சம்பவங்கள் நடந்த இடத்தில் பார்வையாளர்கள் பதிவேடு அல்லது சி.சி.டி.வி எதுவும் இல்லை.

இதையும் படியுங்கள்: டாக்டர், இன்ஜினியர்னு சொல்லி 15 பெண்களை திருமணம் செய்த ஆசாமி; 10 ஆண்டுகளுக்கு பிறகு கைது

தி இந்தியன் எக்ஸ்பிரஸ் செவ்வாயன்று முதன்முதலில் அறிக்கை செய்த குற்றப்பத்திரிக்கை, ஆறு உயர்மட்ட மல்யுத்த வீரர்கள் தாக்கல் செய்த பாலியல் துன்புறுத்தல் புகார்கள் மீதான போலீஸ் விசாரணையை அடிப்படையாகக் கொண்டது.

506 (குற்றவியல் மிரட்டல்), 354 (ஒரு பெண்ணின் நாகரீகம்) ஆகியவற்றின் கீழ் பாலியல் துன்புறுத்தல், துன்புறுத்தல் மற்றும் பின்தொடர்தல்; 354 ஏ (பாலியல் துன்புறுத்தல்); மற்றும் 354 டி (பின்தொடர்தல்) போன்ற குற்றங்களுக்காக பிரிஜ் பூஷன் சரண் சிங் "விசாரணை மற்றும் தண்டிக்கப்பட வேண்டியவர்" என்று குற்றப்பத்திரிக்கை கூறுகிறது

குற்றப்பத்திரிக்கையின் படி, WFI அதிகாரிகள், போலீஸ் நோட்டீசுக்கு பதிலளித்து, பிரிஜ் பூஷன் சரண் சிங் மற்றும் புகார்தாரர் வெளிநாட்டில் (கஜகஸ்தான்) இருப்பதைக் காட்டும் நான்கு புகைப்படங்களை வழங்கினர். "இரண்டு புகைப்படங்கள், புகார்தாரரிடம் பிரிஜ் பூஷன் சரண் சிங் தவறாக நடப்பதை காட்டுகிறது" என்று குற்றப்பத்திரிகை கூறுகிறது.

WFI வழங்கிய மல்யுத்த நிகழ்வுகளின் புகைப்படங்கள், சாட்சிகளின் அழைப்பு விவரப் பதிவுகள் ஆகியவற்றின் அடிப்படையில், பாதிக்கப்பட்ட ஆறு பேரில் ஐந்து பேர் தாக்கல் செய்த புகாரில் குறிப்பிடப்பட்டுள்ள துன்புறுத்தல் நடந்த இடங்களில் பிரிஜ் பூஷன் சரண் சிங் இருந்ததாக குற்றப்பத்திரிக்கை முடிவு செய்தது.

குற்றச்சாட்டுகள் மற்றும் குற்றப்பத்திரிக்கையின் படி, ஒவ்வொரு புகாருக்கான தொழில்நுட்ப ஆதாரங்களின் நிலையும் கீழே உள்ளன.

மல்யுத்த வீரர் 1:

குற்றச்சாட்டுகள்: “(பதக்கம் வென்ற பிறகு, பயிற்சியாளர்கள் பிரிஜ் பூஷனை சந்திக்க என்னை அழைத்துச் சென்றனர். அங்கு அவர் என்னை வலுக்கட்டாயமாக கட்டிப்பிடிக்க முயன்றார். நான் ஒரு கையில் கொடியை வைத்திருந்தேன், அதனால் என் மற்றொரு கையால் அவரைத் தள்ள முயன்றேன், ஆனால் அவர் இறுக்கமாக பிடித்துக் கொண்டார்”

“(ஒருமுறை), நான் மல்யுத்த லீக்கில் ஒரு போட்டியில் தோற்றேன். நான் களத்திலிருந்து என் அணியுடன் இணைந்தப்போது, பிரிஜ் பூஷன் என்னை நோக்கி வந்து வலுக்கட்டாயமாக என்னைக் கட்டிப்பிடித்தார். அவர் என்னை 15-20 வினாடிகள் கட்டிப்பிடித்திருந்தார், நான் அவரைத் தள்ள முயற்சித்தேன், ஆனால் அவர் என்னை விடவில்லை.”

ஆதாரம்: "இரண்டு புகைப்படங்களில், அவர் புகார்தாரரிடம் தவறாக நடப்பத்தைக் காணலாம்... பல்வேறு நிகழ்வுகளின் புகைப்படங்கள் மற்றும் வீடியோகிராஃப்கள் வடிவில் கிடைக்கும் தொழில்நுட்ப சான்றுகள், குற்றம் சாட்டப்பட்டவரின் முன்னிலையில் புகார்தாரரால் சுமத்தப்பட்ட குற்றச்சாட்டை தெளிவாக ஆதரிக்கின்றன."

மல்யுத்த வீரர் 2

குற்றச்சாட்டுகள்: “WFI அலுவலகத்தில் நான் எனது பயிற்சியாளருடன் சென்றேன்… நாற்காலியில் அமர்ந்திருந்த பிரிஜ் பூஷன் என்னை உட்காரச் சொன்னார்… எனது காயத்தைப் பற்றி அவரிடம் தெரிவித்தேன்… அவர் எனக்கு எல்லா உதவியும் செய்வதாக உறுதியளித்தார், ஆனால் அதற்காக அவருடன் உடல் உறவில் ஈடுபடும்படி என்னிடம் கேட்டார்.”

ஆதாரம்: “...சம்பவம் நடந்ததாகக் கூறப்படும் நாளில், அவர் (புகார்தாரரின் பயிற்சியாளர்) புது தில்லி மாவட்டப் பகுதியில் இருந்தார், மேலும் அவரது மொபைல் டவர் இடம் அசோகா சாலைக்கு (அலுவலக இடம்) அருகில் உள்ள நார்த் அவென்யூ பகுதியில் இருந்தது.”

மல்யுத்த வீரர் 3

குற்றச்சாட்டுகள்: “(அணியினருடனான புகைப்படத்திற்காக) நான் கடைசி வரிசையில் நின்று கொண்டிருந்தேன்… குற்றம் சாட்டப்பட்டவர் (பிரிஜ் பூஷன் சரண் சிங்) வந்து என்னுடன் நின்றார். திடீரென்று என் பிட்டத்தில் (பின்புறம்) ஒரு கை இருப்பதை உணர்ந்தேன். நான் விலகிச் செல்ல முயன்றபோது, ​​வலுக்கட்டாயமாக என் தோளைப் பிடித்துக் கொண்டார்.”

ஆதாரம்: WFI அந்த நிகழ்வு தொடர்பான வண்ணப் புகைப்படங்களின் நான்கு அச்சுப் பிரதிகளை வழங்கியது மற்றும் இந்த புகைப்படங்களில், புகார்தாரர் மற்ற மல்யுத்த வீரர்களுடன் முன் வரிசையில் அமர்ந்திருப்பதைக் காணலாம், மேலும் இந்த புகைப்படங்கள் குற்றம் சாட்டப்பட்ட பிரிஜ் பூஷனையும் காட்டுகின்றன, இதனை புகார்தாரரின் பின்வரிசையை முன்வரிசைக்கு நகர்த்துவது தொடர்பான குற்றச்சாட்டுகளின் வெளிச்சத்தில் மதிப்பிடப்படலாம்.

மல்யுத்த வீரர் 4

குற்றச்சாட்டுகள்: “நான் மேட்டில் படுத்திருந்தபோது, ​​குற்றம் சாட்டப்பட்டவர் (பிரிஜ் பூஷன் சரண் சிங்) என் அருகில் வந்தார், எனக்கு அதிர்ச்சியும் ஆச்சரியமும் அளிக்கும் வகையில், என் பயிற்சியாளர் இல்லாத நிலையில், என் அனுமதியைப் பெறாமல் என் டி-ஷர்ட்டை மேலே இழுத்து, என் மார்பகத்தின் மீது கையை வைத்து, என் சுவாசத்தை பரிசோதிக்கும்/ பார்க்கும் சாக்குப்போக்கில் அவரது கையை என் வயிற்றுக்குக் கீழே கொண்டு சென்றார்.”

"கூட்டமைப்பு அலுவலகத்திற்கு நான் சென்றபோது... குற்றம் சாட்டப்பட்டவரின் (பிரிஜ் பூஷன் சரண் சிங்) அறைக்கு நான் அழைக்கப்பட்டேன்... என்னுடன் வந்த எனது சகோதரனைத் திட்டவட்டமாக வெளியில் இருக்கும்படி கேட்டுக் கொண்டார்... குற்றம் சாட்டப்பட்டவர் (பிரிஜ் பூஷன் சரண் சிங்), மற்ற நபர்கள் வெளியேறியதும், கதவை மூடிக்கொண்டு... என்னைத் தன் பக்கம் இழுத்துக்கொண்டு என்னுடன் பலவந்தமாக உடல் ரீதியாக தொடர்பு கொள்ள முயன்றார்.”

ஆதாரம்: "புகார்தாரர் பிற மல்யுத்த வீரர்களுடன், குற்றம் சாட்டப்பட்ட பிரிஜ் பூஷனுடன் நிற்பதைக் காணலாம், இது சம்பவம் நடந்த இடத்தில் குற்றம் சாட்டப்பட்டவர் மற்றும் புகார்தாரரின் இருப்பை நிறுவுகிறது.”

* "பதிலின்படி, WFI எந்த பார்வையாளர் பதிவேட்டையும் பராமரிக்கவில்லை மற்றும் WFI அலுவலக வளாகத்தில் CCTV கேமராவும் நிறுவப்படவில்லை."

மல்யுத்த வீரர் 5

குற்றச்சாட்டுகள்: "என்னுடன் ஒரு படத்தைக் கிளிக் செய்கிறேன் என்ற சாக்குப்போக்கில், அவர் என்னை என் தோள்பட்டை உரச அவரை நோக்கி இழுத்தார் ... என்னைக் காப்பாற்றிக் கொள்ள, நான் குற்றம் சாட்டப்பட்டவரிடமிருந்து (பிரிஜ் பூஷண் சரண் சிங்) விலகிச் செல்ல முயற்சித்தேன்."

ஆதாரம்: "WFI இந்த நிகழ்வு தொடர்பான புகைப்படங்களின் ஆறு வண்ண அச்சுப் பிரதிகளை வழங்கியது, புகைப்படங்கள் அந்த நிகழ்வில் பாதிக்கப்பட்டவர் மற்றும் குற்றம் சாட்டப்பட்டவர் இருப்பதை சித்தரிக்கிறது."

மல்யுத்த வீரர் 6

குற்றச்சாட்டுகள்: "அவர் என்னை எனது பெற்றோருடன் தொலைபேசியில் பேச வைத்தார், அந்த நேரத்தில் என்னிடம் தனிப்பட்ட மொபைல் போன் இல்லை ... குற்றம் சாட்டப்பட்டவர் (பிரிஜ் பூஷண் சரண் சிங்) அவர் அமர்ந்திருந்த படுக்கையை நோக்கி என்னை அழைத்தார், பின்னர் திடீரென்று என் அனுமதியின்றி என்னை வலுக்கட்டாயமாக கட்டிப்பிடித்தார்.”

ஆதாரம்: "நிகழ்ச்சியை நடத்திய WFIக்கு நோட்டீஸ் அனுப்பப்பட்டது, ஏதேனும் புகைப்படங்கள், ஹோட்டல் விவரங்கள், மல்யுத்த வீரர் தங்கியிருந்த அறை எண் ஆகியவற்றை வழங்குமாறு கேட்டு, ஆனால் இதுவரை எந்த பதிலும் வரவில்லை."

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil