சட்டவிரோத அமெரிக்க பயணம்: ஹரியானா இளைஞர் கைது; நாடு கடத்த முடிவு!

சமூக ஊடகங்களில் வெளியான காணொளி ஒன்றில், ஹரியானா மொழி பேசும் இளைஞர் அமெரிக்காவின் நெவார்க் விமான நிலையத்தில் கைவிலங்கிடப்பட்டு, தரையில் அழுத்தப்பட்டு, கடுமையாக நடத்தப்படுவது காட்டப்பட்டிருந்தது. இந்நிகழ்வு நடந்த 2 நாட்களுக்குப் பிறகு, அந்த நபர் ஹரியானாவைச் சேர்ந்தவர் என்றும், அவர் சட்டவிரோதமாக அமெரிக்காவிற்குள் நுழைந்துள்ளார் என்றும் உறுதி செய்யப்பட்டுள்ளது. தகவல்களின்படி, அவர் தற்போது மருத்துவமனையில் அனுமதிக்கப்பட்டுள்ளார். இதுகுறித்து இந்திய வெளியுறவு அமைச்சக வட்டாரங்கள் புதன்கிழமை அன்று கூறியதாவது:

"நியூயார்க்கில் உள்ள எங்கள் துணைத் தூதரகம் நடத்திய விசாரணையில், ஹரியானாவைச் சேர்ந்த அந்த நபர் விசா இன்றி சட்டவிரோதமாக அமெரிக்காவிற்குள் நுழைந்துள்ளார் என்பது உறுதி செய்யப்பட்டுள்ளது. மேலும், நீதிமன்ற உத்தரவின்படி அவர் மீண்டும் இந்தியாவிற்குத் திருப்பி அனுப்பப்படுகிறார்.

"நெவார்க் விமான நிலையத்தில் பயணத்திற்காகக் காத்திருந்தபோது, அவரது நடத்தை பயணத்திற்கு உகந்ததாக இல்லை எனக் கண்டறியப்பட்டதால், அவர் கைவிலங்கிடப்பட்டு மருத்துவமனையில் அனுமதிக்கப்பட்டார்," என்று அந்த வட்டாரங்கள் மேலும் தெரிவித்தன.

இந்த செய்தியை ஆங்கிலத்தில் படிக்க

இதற்கு ஒருநாள் முன்னதாக, இந்திய வெளியுறவு அமைச்சகம் (MEA) இந்த விவகாரத்தை டெல்லியில் உள்ள அமெரிக்கத் தூதரகத்திடம் அதிகாரப்பூர்வமாக எழுப்பியது. இதற்கிடையில், நியூயார்க்கில் உள்ள இந்தியத் துணைத் தூதரகமும் இந்தச் சம்பவம் குறித்த முழு விவரங்களையும் அறிந்துகொள்ள அமெரிக்க அதிகாரிகளுடன் தொடர்பில் இருந்து வருகிறது. "அவர் பயணிக்க உடல் தகுதி பெற்றவுடன், இந்தியாவிற்கு நாடு கடத்தப்படுவார்," என்று வெளியுறவு அமைச்சக வட்டாரங்கள் புதன்கிழமை அன்று தெரிவித்தன.

இந்திய-அமெரிக்க தொழில்முனைவோரான குணால் ஜெயின் என்பவரால் 'X' தளத்தில் பதிவிடப்பட்ட காணொளிகளிலும் புகைப்படங்களிலும், அடையாளம் தெரியாத அந்த இளம் நபர், ஞாயிற்றுக்கிழமை இரவு விமான நிலையத்தில் கைவிலங்கிடப்பட்டு அழுதபடி காணப்பட்டார். ஜெயின், தனது தொடர் பதிவுகளில் வாஷிங்டனில் உள்ள இந்தியத் தூதரகத்தையும், வெளியுறவுத்துறை அமைச்சர் எஸ். ஜெய்சங்கரையும் டேக் செய்திருந்தார்.

இந்தக் காணொளிகளைக் கவனத்தில் எடுத்துக்கொண்ட நியூயார்க்கில் உள்ள இந்தியத் துணைத் தூதரகம், திங்கள்கிழமை மாலை வெளியிட்ட அறிக்கையில், "நெவார்க் லிபர்ட்டி சர்வதேச விமான நிலையத்தில் இந்தியர் ஒருவர் இன்னல்களைச் சந்தித்து வருவதாகக் கூறும் சமூக ஊடகப் பதிவுகளை நாங்கள் கண்டோம். இது தொடர்பாக உள்ளூர் அதிகாரிகளுடன் நாங்கள் தொடர்பில் இருக்கிறோம்," என்று கூறியிருந்தது.

ஜெயினால் பகிரப்பட்ட புகைப்படங்கள் மற்றும் காணொளிக் காட்சிகளில், நியூயார்க் மற்றும் நியூ ஜெர்சியில் உள்ள முக்கிய போக்குவரத்து மையங்களின் சட்ட அமலாக்கத்திற்குப் பொறுப்பான துறைமுக அதிகாரசபையின் காவல்துறை (Port Authority Police Department) அதிகாரிகள் அந்த இளைஞரைக் கட்டுப்படுத்துவது தெரிகிறது.