மியான்மரில் ராணுவ தாக்குதலில் 50 பேர் மரணம்… உலகச் செய்திகள்

இன்று உலக நாடுகளில் நடைபெற்ற முக்கிய நிகழ்வுகளை இப்போது பார்ப்போம்.

மியான்மரில் ராணுவ தாக்குதலில் 50 பேர் மரணம்

மத்திய மியான்மரில் செவ்வாயன்று ராணுவத்தினர் நடத்திய வான்வழித் தாக்குதலில் அதன் ஆட்சிக்கு எதிரானவர்கள் கலந்து கொண்ட நிகழ்வில் குறைந்தது 50 பேர் கொல்லப்பட்டதாக ஊடகங்கள் மற்றும் உள்ளூர் எதிர்ப்பு இயக்கத்தின் உறுப்பினர்கள் தெரிவிக்கின்றனர்.

சகைங் (Sagaing) பகுதியில் வசிப்பவர்களை மேற்கோள் காட்டி, BBC பர்மிஸ், ரேடியோ ஃப்ரீ ஏசியா (RFA), மற்றும் Irrawaddy நியூஸ் போர்டல் ஆகியவை தாக்குதலில் பொதுமக்கள் உட்பட 50 முதல் 100 பேர் வரை இறந்ததாக அறிவித்தது.

இந்திய வம்சாவளி முஸ்லீம் தம்பதியிடம் மன்னிப்பு கேட்ட சிங்கப்பூர் சூப்பர் மார்க்கெட்

சிங்கப்பூரில் உள்ள ஒரு முன்னணி சூப்பர் மார்க்கெட், இந்திய வம்சாவளியைச் சேர்ந்த முஸ்லீம் தம்பதியினரிடம், ரம்ஜான் பண்டிகையின் போது வழங்கிய இலவச தின்பண்டங்களை மலாய்க்காரர்களுக்கு மட்டுமே என்று கூறி தடுத்ததற்கு மன்னிப்புக் கோரியுள்ளது.

ஏப்ரல் 9 அன்று தேசிய தொழிற்சங்க காங்கிரஸ் (NTUC) நடத்தும் பல்பொருள் அங்காடியில் ஒரு ஆண் ஊழியர், வழக்கமான மளிகைக் பொருட்களை வாங்கிக் கொண்டிருந்தப்போது ​​சிற்றுண்டி நிலையத்திலிருந்து ஜஹபர் ஷாலிஹ் (36) மற்றும் அவரது மனைவி ஃபரா நாத்யா-ஐ (35) அவர்களது இரண்டு இளம் குழந்தைகளுடன் "துரத்தினார்" என்று சேனல் நியூஸ் ஏசியா செய்தி வெளியிட்டது.

அங்கு வழங்கப்பட்ட ரம்ஜான் சிறப்பு இலவச உணவுகள் மலாய்காரர்களுக்கு மட்டுமே என்று கூறி அவர்களை விரட்டியதாக கூறப்படுகிறது. இது தொடர்பான தம்பதியினரின் ஃபேஸ்புக் பதிவு சமூக வலைதளங்களில் வைரலான நிலையில், தற்போது சூப்பர் மார்க்கெட் மன்னிப்பு கோரியுள்ளது.

இந்திய-அமெரிக்கர்கள் மீதான சாதிப் பாகுபாடு வழக்கு தள்ளுபடி

இந்திய வம்சாவளியைச் சேர்ந்த இரண்டு சிஸ்கோ பொறியாளர்கள் மீதான சாதிப் பாகுபாடு வழக்கை கலிபோர்னியா சிவில் உரிமைகள் துறை (CRD) தள்ளுபடி செய்துள்ளது. அதேநேரம், சிஸ்கோ மற்றும் CRD இடையே ஒரு மத்தியஸ்த கூட்டம் மே 2 இல் அமைக்கப்பட்டுள்ளது.

"இரண்டு இந்திய-அமெரிக்கர்கள் ஏறக்குறைய மூன்று ஆண்டுகளாக முடிவில்லாத விசாரணைகள், ஆன்லைனில் கடுமையான விமர்சனங்கள் மற்றும் ஊடகங்களில் குற்ற உணர்வை அனுபவித்தனர், பின்னர் CRD அவர்கள் சாதி அடிப்படையிலான பாகுபாடுகளில் ஈடுபட்டதாக குற்றம் சாட்டி அவர்களின் நற்பெயருக்கு களங்கம் ஏற்படுத்தியது" என்று இந்து அமெரிக்கன் அறக்கட்டளையின் (HAF) நிர்வாக இயக்குனர் சுஹாக் சுக்லா கூறினார்.

"(சுந்தர்) ஐயர் மற்றும் (ரமணா) கொம்பெல்லா ஆகியோர் தங்கள் மதம் அல்லது இனத்தின் காரணமாக இந்து மற்றும் இந்திய அமெரிக்கர்கள் மீது தவறுகளைக் கூறுவதற்கு அரசுக்கு உரிமை இல்லை என்ற எங்கள் நிலைப்பாட்டோடு சேர்த்து நிரூபணம் செய்யப்பட்டதில் நாங்கள் மகிழ்ச்சியடைகிறோம்," என்று சுக்லா கூறினார்.

400 ஆண்டுகளுக்கு முன் மூழ்கிய கப்பல்; டி.என்.ஏ ஆராய்ச்சியில் புதிய கண்டுபிடிப்பு

ஆகஸ்ட் 10, 1628 அன்று பிற்பகலில், பால்டிக் பகுதியில் மிகவும் சக்திவாய்ந்த போர்க்கப்பல்களில் ஒன்றான ஸ்வீடன்ஸ் கட்டிய வாசா, ஸ்டாக்ஹோமில் உள்ள அரண்மனை கப்பல்துறையிலிருந்து புறப்பட்டது. வாசா 1 மைல் தூரம் கூட கடக்கவில்லை.

226 அடி நீளமுள்ள கப்பலை ஒரு வலுவான காற்று தாக்கியதில், அதன் திறந்த ஏவுகணை குழாய்கள் வழியாக தண்ணீர் நிரம்பியதால், மூழ்கியது. அது மூழ்கியபோது சுமார் 150 பேர் அதில் இருந்ததாக நம்பப்படுகிறது; சுமார் 30 பேர் இறந்தனர்.

இப்போது, ​​ஏறக்குறைய 400 ஆண்டுகளுக்குப் பிறகு, மேம்பட்ட டி.என்.ஏ சோதனையானது, கப்பலின் இறந்தவர்களைப் பற்றி மேலும் அறிய ஆராய்ச்சியாளர்களுக்கு உதவுகிறது, ஆராய்ச்சியாளர்கள் ஒரு ஆண் என்று நீண்ட காலமாக நம்பியது "ஜி" என்று அழைக்கப்படும் ஒரு பெண் என்று தெரியவந்துள்ளது. அருங்காட்சியகக் காட்சியில் அவளுக்கு "குஸ்டாவ்" என்று பெயரிடப்பட்டுள்ளது. மேலும் பல தகவல்களை ஆராய்ச்சியாளர்கள் கண்டறிந்து வருகின்றனர்.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil