காசா மருத்துவ மனை தாக்குதல்; மேற்கு நாடுகள் கடும் கண்டனம்; பரஸ்பர குற்றம் சுமத்தும் இஸ்ரேல் – ஹமாஸ்

Shubhajit Roy 

இஸ்ரேல்-ஹமாஸ் போர்: காசா மருத்துவமனையில் ஒரு பயங்கர குண்டு வெடிப்பில் நூற்றுக்கணக்கான பொதுமக்கள் கொல்லப்பட்டதாகக் கூறப்படும் நிலையில், இதற்கு மேற்கு ஆசியா முழுவதும் சீற்றம் அதிகரித்து எதிர்ப்புகள் அதிகரித்ததால் இஸ்ரேலிய மற்றும் பாலஸ்தீனிய அதிகாரிகள் புதன்கிழமை பழியை மாறிமாறி குற்றம் சுமத்தினர், இது ஒரு பரந்த பிராந்திய மோதலின் அச்சுறுத்தலை உயர்த்தியது.

ஆங்கிலத்தில் படிக்க: Outrage over Gaza hospital deaths, protests roil West Asia amid blame game

காசா நகரில் அல் அஹ்லி மருத்துவமனையில் நடந்த குண்டுவெடிப்பில், ஹமாஸ் கட்டுப்பாட்டில் உள்ள காசா சுகாதார அமைச்சகத்தின் படி, இறந்தவர்களின் எண்ணிக்கை 471 ஆக உள்ளது. மரணங்களுக்கு இஸ்ரேலிய ஏவுகணைத் தாக்குதலே காரணம் என்று பாலஸ்தீனியர்கள் குற்றம் சாட்டினர். அதே நேரத்தில் இந்த குண்டு வெடிப்புக்கும் தங்களுக்கும் எந்த தொடர்பும் இல்லை என்று இஸ்ரேல் கூறியதோடு, பாலஸ்தீனிய இஸ்லாமிய ஜிஹாத் ஏவப்பட்ட ராக்கெட் தவறாகச் சுடப்பட்டு மருத்துவமனை மீது விழுந்ததாகவும், இதனால் உயிரிழப்புகள் ஏற்பட்டதாகவும் கூறியது.

உலகெங்கிலும் இருந்து இந்த சம்பவத்திற்கு கண்டனங்கள் வலுவாகவும் வேகமாகவும் வந்தன. குறிப்பாக எதிர்ப்புக்கள் பொங்கி எழும் பிராந்தியத்தின் சீற்றமடைந்த தலைநகரங்களில் இருந்து வந்த நிலையில், அமெரிக்க ஜனாதிபதி ஜோ பிடன் டெல் அவிவ் சென்று பிரதமர் பெஞ்சமின் நெதன்யாகுவை சந்தித்து ஹமாஸுக்கு எதிரான போருக்கு இஸ்ரேலுடன் ஒற்றுமையை வெளிப்படுத்தினார். பாலஸ்தீனிய இஸ்லாமிய ஜிஹாத் தவறாக வீசிய ராக்கெட்டின் விளைவாக மருத்துவமனையில் குண்டு வெடிப்பு ஏற்பட்டது என்ற இஸ்ரேலின் கூற்றுக்கு ஜோ பிடன், பிரதமர் பெஞ்சமின் நெதன்யாகுவை ஆதரித்ததாகத் தெரிகிறது.

(அசோசியேட்டட் பிரஸ் செய்தி நிறுவனம் ஜோ பிடன், பிரதமர் பெஞ்சமின் நெதன்யாகுவிடம் கூறியதை மேற்கோள் காட்டியது: "நான் பார்த்தவற்றின் அடிப்படையில், இது மற்ற குழுவால் செய்யப்பட்டது போல் தோன்றுகிறது, நீங்கள் அல்ல." ஆனால் அவர் "அங்கு நிறைய பேர்" இருந்ததாக கூறினார். குண்டுவெடிப்புக்கு என்ன காரணம் என்று தெரியவில்லை, "உலகம் முழுவதுமே சீற்றம் அடைந்தது, ஆனால் இந்த சீற்றம் இஸ்ரேலை நோக்கி அல்ல, பயங்கரவாதிகளை நோக்கியே இருக்க வேண்டும்" என்று பிடன் மற்றும் இஸ்ரேலின் போர் அமைச்சரவையுடன் நடந்த சந்திப்பின் போது பெஞ்சமின் நெதன்யாகு கூறினார். புதன்கிழமை அரபுத் தலைவர்களைச் சந்திக்க ஜோர்டானுக்குச் செல்ல பிடன் திட்டமிட்டு இருந்தார், ஆனால் மருத்துவமனை குண்டு வெடிப்புக்குப் பிறகு உச்சிமாநாடு நிறுத்தப்பட்டது. சவூதி அரேபியாவில் உள்ள ஜித்தாவில் இஸ்லாமிய ஒத்துழைப்பு அமைப்பின் (OIC) அவசரக் கூட்டம் நடைபெற்று வருவதாக ராய்ட்டர்ஸ் செய்தி நிறுவனம் தெரிவித்துள்ளது.)

காசா மருத்துவமனை சம்பவம் குறித்து பிரதமர் நரேந்திர மோடியும் பதிலடி கொடுத்துள்ளார். “காஸாவிலுள்ள அல் அஹ்லி மருத்துவமனையில் உயிரிழந்தவர்களின் துயரமான இழப்பு ஆழ்ந்த அதிர்ச்சியை ஏற்படுத்தியுள்ளது. உயிரிழந்தவர்களின் குடும்பங்களுக்கு எங்களது ஆழ்ந்த இரங்கலையும், காயமடைந்தவர்கள் விரைவில் குணமடைய பிரார்த்தனைகளையும் தெரிவித்துக்கொள்கிறோம்.”

"நடக்கும் மோதலில் பொதுமக்கள் உயிரிழப்புகள் தீவிரமான மற்றும் தொடர்ச்சியான கவலைக்குரிய விஷயமாகும். சம்பந்தப்பட்டவர்கள் பொறுப்பேற்க வேண்டும், ”என்று மோடி X தளத்தில் பதிவிட்டுள்ளார். இது இஸ்ரேலுக்கும் ஹமாஸுக்கும் ஒரு செய்தியாக உணரப்பட்டது.

சர்வதேச மனிதாபிமான சட்டத்தை கடைபிடிக்க உலகளாவிய பொறுப்பு உள்ளது என்றும், பயங்கரவாதத்தை அதன் அனைத்து வடிவங்களிலும் வெளிப்பாடுகளிலும் எதிர்த்துப் போராடுவதற்கான உலகளாவிய பொறுப்பும் உள்ளது என்றும் வெளியுறவு அமைச்சகத்தின் செய்தித் தொடர்பாளர் அரிந்தம் பாக்சி கூறியதற்கு இணங்க மோடியின் கருத்துக்கள் இருந்தன.

ஈரான், ஜோர்டான், துருக்கி, எகிப்து, சவூதி அரேபியா மற்றும் பிற நாடுகளிலில் இருந்து கண்டனம் எழுந்ததால், குண்டுவெடிப்புக்கு பாலஸ்தீனிய இஸ்லாமிய ஜிஹாத் தான் காரணம் என்பதைக் குறிக்கும் கூடுதல் ஆதாரங்களை இஸ்ரேல் முன்வைத்தது.

காசா மருத்துவமனை சம்பவம் அரபு உலகிற்கும் இஸ்ரேலுக்கும் இடையேயும், மேலும் இஸ்ரேலிய சமுதாயத்திற்குள்ளும் கருத்து வேறுபாடுகளை ஆழமாக்கியுள்ளது.

ஜெருசலேமை தளமாகக் கொண்ட ஆய்வாளரும், மத்திய கிழக்கு மன்றத்தின் ஆராய்ச்சி இயக்குநருமான ஜொனாதன் ஸ்பையர், “ஹமாஸ் தாக்குதல் முன்னோடியில்லாதது மற்றும் கொலைகார, ஜிஹாதி அமைப்புக்கு எதிராக இஸ்ரேல் பதிலளித்துள்ளது. இஸ்ரேலுடன் இணைந்து வாழ்வது சாத்தியமில்லை என்பதை ஹமாஸ் எப்பொழுதும் தெளிவுபடுத்தியுள்ளது,” என்று கூறினார்.

மருத்துவமனை சம்பவம் குறித்து, ஜொனாதன் ஸ்பையர் கூறுகையில், மிகக் குறைவான சேதம் ஏற்பட்டதற்கான ஆதாரங்கள் இருப்பதாகவும், மருத்துவமனையின் வாகன நிறுத்துமிடத்தில் குண்டுவெடிப்பு நிகழ்ந்ததாகவும், இது பாலஸ்தீனிய இஸ்லாமிய ஜிஹாத் தவறாக வீசிய ராக்கெட்டின் விளைவாகும் என்றும் கூறினார்.

"ஒரு கொலைகார தாக்குதல்" என்ற கூற்றுக்களை நம்புபவர்கள் "ஒருபக்கச் சார்பு" காட்டுவதாக ஜொனாதன் ஸ்பையர் கூறினார்.

இஸ்ரேலிய யூதர்கள் மற்றும் இஸ்ரேலிய அரேபியர்களுக்கு இடையே உள்ள கருத்து வேறுபாடுகளின் அடிப்படையில், 20 சதவீதம் பேர் அரபு இனத்தைச் சேர்ந்தவர்கள் என்பதால் அவர்கள் சகவாழ்வு பிரச்சினையில் "கவலைப்பட வேண்டும்" என்று ஜொனாதன் ஸ்பையர் கூறினார். “எந்தவொரு இஸ்ரேலிய யூதரும் அரேபிய வம்சாவளியைச் சேர்ந்த சக தோழர்களைக் குறிவைத்ததில் மகிழ்ச்சியளிக்கும் வகையில் சிறிய அல்லது எந்த சம்பவமும் இல்லை. இதுவரை, இதுபோன்ற தவறான பழிவாங்கும் நடவடிக்கைகள் எதுவும் இல்லை, ஏனெனில் ஒற்றுமை மற்றும் ஒரு தேசிய பணியை முடிக்க வேண்டிய பொதுவான உணர்வு உள்ளது,” என்று ஜொனாதன் ஸ்பையர் கூறினார்.

ஹமாஸின் அட்டூழியங்கள் இருந்தபோதிலும், பேச்சுவார்த்தைக்கு மாற்று இல்லை என்று அரவா கல்வி நிறுவனத்திற்கு தலைமை தாங்கும் இஸ்ரேலிய அரேபியரும் தெற்கு இஸ்ரேலில் வசிப்பவருமான டாக்டர் தாரேக் அபு ஹமத் கூறினார்.

"இந்த அதிர்ச்சியை கடக்க நாம் அனைவரும் மிகவும் கடினமான நேரத்தை சந்திப்போம். இந்தப் போர் மிக விரைவில் முடிவுக்கு வரும் என்று அனைவரும் நம்புகிறோம். இரு தரப்பினரும் அவதிப்படுகின்றனர். ஒரு போரில் யாரும் வெற்றி பெற மாட்டார்கள், இரு தரப்பிலும் உள்ள பொதுமக்கள் பாதிக்கப்பட்டு இறக்கிறார்கள். இந்த வன்முறைச் சுழற்சியை நிறுத்துவதற்கான ஒரே வழி, நாம் அனைவரும் எதிர்பார்க்கும் நியாயமான அமைதியைப் பெறுவதற்கு உரையாடல், புரிந்துணர்வை உருவாக்குதல் மற்றும் நம்பிக்கையை வளர்ப்பது மட்டுமே,” என்று டாக்டர் தாரேக் அபு ஹமத் கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“