‘அணுசக்தி பேச்சில் மிக, மிக எச்சரிக்கையாக இருங்கள்’: டிரம்ப் நீர்மூழ்கிக் கப்பல் நடவடிக்கைக்கு ரஷ்யா எச்சரிக்கை

திங்கள்கிழமை செய்தியாளர்களிடம் பேசிய கிரெம்ளின் செய்தித் தொடர்பாளர் டிமிட்ரி பெஸ்கோவ், “அனைவரும் அணுசக்தி பற்றிய பேச்சில் மிக, மிக எச்சரிக்கையாக இருக்க வேண்டும்” என்று கூறினார். டிரம்ப்பின் கருத்துக்களுக்கு முன்பே அந்த அமெரிக்க நீர்மூழ்கிக் கப்பல்கள் ஏற்கனவே செயல்பாட்டில் இருந்ததாகவும் அவர் குறிப்பிட்டார்.

ஆங்கிலத்தில் படிக்க:

ராய்ட்டர்ஸ் செய்தி நிறுவனத்தின்படி, பெஸ்கோவ் கூறுகையில், “இந்த விஷயத்தில், அமெரிக்க நீர்மூழ்கிக் கப்பல்கள் ஏற்கனவே போர்ப் பணியில் உள்ளன என்பது தெளிவாகிறது. இது ஒரு தொடர்ச்சியான செயல்முறை, இதுதான் முதல் விஷயம்” என்றார்.

“ஆனால், பொதுவாக, இதுபோன்ற சர்ச்சையில் ஈடுபட நாங்கள் விரும்பவில்லை. மேலும் எந்த வகையிலும் கருத்து தெரிவிக்கவும் விரும்பவில்லை” என்றும் அவர் மேலும் கூறினார்.

முன்னாள் ரஷ்ய அதிபர் டிமிட்ரி மெட்வெடேவ் அணு ஆயுதம் தாங்கிய நாடுகளுக்கு இடையே போர் ஏற்படும் ஆபத்து குறித்து எச்சரித்ததற்குப் பதிலடியாக, கடந்த வெள்ளிக்கிழமை டிரம்ப் இந்த நீர்மூழ்கிக் கப்பல் அறிவிப்பை வெளியிட்டார்.

டிரம்ப் ரஷ்யாவுக்கு எதிராக புதிய பொருளாதாரத் தடைகளை விதிக்க நிர்ணயித்த காலக்கெடு நெருங்கி வரும் நிலையில் இந்தக் கருத்துக்கள் வெளியாகியுள்ளன. ரஷ்ய அதிபர் விளாடிமிர் புதின், உக்ரைனில் போரை முடிவுக்குக் கொண்டு வர வரும் வெள்ளிக்கிழமை, ஆகஸ்ட் 8-ம் தேதிக்குள் ஒப்புக்கொள்ளவில்லை என்றால், ரஷ்யா மற்றும் இந்தியா, சீனா உள்ளிட்ட அதன் எண்ணெய்யை வாங்கும் நாடுகளுக்கு எதிராக பொருளாதாரத் தடைகளை விதிப்பதாக டிரம்ப் கூறியுள்ளார்.

புதின் கடந்த வாரம் அமைதிப் பேச்சுவார்த்தைகளில் சில முன்னேற்றங்கள் ஏற்பட்டுள்ளதாகக் கூறிய போதிலும், போரில் ரஷ்யாவுக்கு சாதகம் இருப்பதாகவும் கூறினார். அவரது கருத்துக்கள் நிலைப்பாட்டில் எந்த மாற்றமும் இல்லை என்பதையே சுட்டிக்காட்டுகின்றன.

போரை 24 மணி நேரத்திற்குள் முடிவுக்குக் கொண்டு வர முடியும் என்று மீண்டும் மீண்டும் கூறி வரும் டிரம்ப், இந்த வாரத்தின் பிற்பகுதியில் தனது தூதர் ஸ்டீவ் விட்காஃப்பை மாஸ்கோவிற்கு அனுப்பக்கூடும் என்று கூறினார். ராய்ட்டர்ஸ் தகவலின்படி, விட்காஃப் புதன்கிழமை அல்லது வியாழன் அன்று ரஷ்யாவுக்குச் செல்லலாம் என்று எதிர்பார்க்கப்படுகிறது.

விட்காஃப் கடந்த காலத்தில் பலமுறை புடினைச் சந்தித்துள்ளார், ஆனால், போர்நிறுத்தத்தை உறுதி செய்வதில் அவர் வெற்றி பெறவில்லை. இந்த வாரப் பயணம் கிரெம்ளினின் கோரிக்கையின் பேரில் திட்டமிடப்பட்டதா அல்லது அதன் மூலம் என்ன பலனை எதிர்பார்க்கிறது என்பதை கிரெம்ளின் குறிப்பிடவில்லை.

“விட்காஃப் மாஸ்கோவில் வருவதை நாங்கள் எப்போதும் வரவேற்கிறோம், மேலும் அவரிடம் தொடர்புகளைப் பேணுவதில் நாங்கள் எப்போதும் மகிழ்ச்சியாக இருக்கிறோம். அவற்றை நாங்கள் முக்கியமானதாகவும், அர்த்தமுள்ளதாகவும், மிகவும் பயனுள்ளதாகவும் கருதுகிறோம்” என்று பெஸ்கோவ் கூறினார்.

கடந்த காலத்தில் புதின் பற்றி சாதகமாகப் பேசியிருந்தாலும், டிரம்ப் சமீபத்தில் அவரைப் பற்றி மேலும் விமர்சனத்துடன் பேசி வருகிறார்.

ரஷ்யா சமீப வாரங்களில் உக்ரேனிய நகரங்கள் மீது வான்வழித் தாக்குதல்களை அதிகரித்துள்ளது. அதே சமயம், துருக்கியில் நடந்த அமைதிப் பேச்சுவார்த்தைகள் கைதிகள் மற்றும் உடல்களைப் பரிமாறிக்கொள்வதைத் தவிர வேறு பெரிய முடிவுகளை எட்டவில்லை.

ரஷ்யா மற்றும் மேற்கத்திய நாடுகளில் உள்ள சில ஆய்வாளர்கள், மெட்வெடேவுடன் ஆன்லைனில் ஏற்பட்ட கருத்து வேறுபாட்டிற்குப் பிறகு, அணுசக்தி நீர்மூழ்கிக் கப்பல்கள் பற்றிய டிரம்ப்பின் பகிரங்கமான கருத்துக்கள் பதட்டங்களை மோசமாக்கக்கூடும் என்று கூறியுள்ளனர். சமூக ஊடகங்களில் ஆத்திரமூட்டும் கருத்துக்களைக் கூறுவதில் மெட்வெடேவ் பெயர் பெற்றவர்.

டிரம்ப்பின் கருத்துக்களை ரஷ்யா பதட்டங்களை அதிகரிக்கும் ஒரு நடவடிக்கையாகக் கருதுகிறதா என்று கேட்டபோது, பெஸ்கோவ்,  “நாங்கள் இப்போது எந்தவொரு பதட்ட அதிகரிப்பு குறித்தும் பேசுவதாக நம்பவில்லை” என்று கூறினார். அணுசக்தி விவகாரங்கள் மிகவும் உணர்வுபூர்வமானவை என்றும், அவை பலரால் உணர்ச்சிபூர்வமாக பார்க்கப்படுகின்றன என்றும் அவர் கூறினார்.

மெட்வெடேவ் தனது ஆன்லைன் பேச்சைக் குறைத்துக் கொள்ளுமாறு புதின் அவருக்கு அறிவுறுத்தினாரா என்று கேட்டபோது பதிலளிக்க பெஸ்கோவ் மறுத்துவிட்டார்.  “முக்கியமான விஷயம், நிச்சயமாக, அதிபர் புதினின் நிலைப்பாடுதான்” என்று அவர் கூறினார்.