உக்ரைன் போருக்கு சீனா, இந்தியாதான் நிதியுதவி: ஐ.நா.வில் டிரம்ப் குற்றச்சாட்டு

ஐக்கிய நாடுகளின் பொதுச் சபையில் (UNGA) உலகத் தலைவர்கள் மத்தியில் பேசிய அமெரிக்க அதிபர் டிரம்ப், இந்தியா மற்றும் சீனா ஆகிய நாடுகள் ரஷ்ய எண்ணெயைத் தொடர்ந்து வாங்குவதால், அவைதான் உக்ரைன் போரின் "முக்கிய நிதியாளர்கள்" என்று குற்றம் சாட்டினார். மேலும், ரஷ்யாவிடமிருந்து எரிசக்திப் பொருட்களை வாங்குவதைக் குறைப்பதற்குப் போதுமான நடவடிக்கைகளை எடுக்கவில்லை என்று நேட்டோ நாடுகளையும் (NATO countries) அவர் விமர்சித்தார்.

தொடர்ந்து ரஷ்ய எண்ணெயை வாங்குவதன் மூலம், சீனா மற்றும் இந்தியாதான் நடைபெற்று வரும் உக்ரைன் போருக்கு நிதியாளர்களாக இருக்கிறார்கள். ஆனால் மன்னிக்க முடியாத வகையில், நேட்டோ நாடுகள்கூட ரஷ்ய எரிசக்தியையும், அதன் பொருட்களையும் முழுமையாக நிறுத்தவில்லை. இதை நான் 2 வாரங்களுக்கு முன்பு அறிந்துகொண்டபோது எனக்கு மகிழ்ச்சி இல்லை. அவர்கள் தங்களுக்கு எதிராகவே போருக்கு நிதியளிக்கிறார்கள். இதைப்பற்றி யார் தான் கேள்விப்பட்டிருக்க முடியும்? என்று டிரம்ப் ஆவேசமாகக் கூறினார்.

இந்த செய்தியை ஆங்கிலத்தில் படிக்க

ரஷ்யா அமைதி ஒப்பந்தம் செய்யத் தயாராக இல்லாவிட்டால், "மிக வலிமையான, சக்திவாய்ந்த வரிகளின் அடுத்த சுற்றை விதிக்க வாஷிங்டன் முழுமையாகத் தயாராக உள்ளது. இது ரத்தக் கொதிப்பை மிக விரைவாக நிறுத்தும் என்று நான் நம்புகிறேன்" என்று டிரம்ப் தெரிவித்தார். அந்த வரிகள் பயனுள்ளதாக இருக்க, ஐரோப்பிய நாடுகளும் அமெரிக்காவுடன் இணைந்து இதேபோன்ற நடவடிக்கைகளை எடுக்க வேண்டும் என்றும் அவர் வலியுறுத்தினார்.

அமெரிக்காவின் உள்நாட்டு விவகாரங்களைப் பற்றிப் பேசிய டிரம்ப், "ஓராண்டுக்கு முன்பு நம் நாடு ஆழ்ந்த சிக்கலில் இருந்தது. ஆனால் இன்று, நாங்கள்தான் உலகின் 'மிகவும் சூடான' (Hottest) நாடாக இருக்கிறோம்" என்று கூறி, தனது நிர்வாகத்தின் சாதனைகளை வரிசைப்படுத்தினார். "அமெரிக்கா மிக வலுவான பொருளாதாரம், எல்லை, ராணுவம், நட்பு, தேச உணர்வு ஆகியவற்றால் ஆசீர்வதிக்கப்பட்டுள்ளது," என்றும் அவர் குறிப்பிட்டார். தமது அரசாங்கம் அமெரிக்க வரலாற்றில் மிகப்பெரிய வரி குறைப்புகளை அறிமுகப்படுத்தியதாகவும், பங்குச் சந்தை சிறப்பாகச் செயல்படுவதாகவும், ஊதியங்கள் உயர்ந்து வருவதாகவும் டிரம்ப் கூறினார்.

எல்லைப் பாதுகாப்பு குறித்துப் பேசிய அவர், "கடந்த 4 மாதங்களாக சட்டவிரோதமாக எங்கள் நாட்டிற்குள் நுழைபவர்களின் எண்ணிக்கை பூஜ்ஜியமாக உள்ளது. நீங்கள் சட்டவிரோதமாக அமெரிக்காவுக்கு வந்தால், சிறைக்குச் செல்வீர்கள் என்பதுதான் எங்கள் தெளிவான செய்தி," என்றார்.

சர்வதேச மோதல்களைப் பற்றிப் பேசிய டிரம்ப், தான் மீண்டும் பதவிக்கு வந்ததில் இருந்து 7 போர்களை முடிவுக்குக் கொண்டு வந்ததாகத் தெரிவித்தார். இஸ்ரேல்-ஈரான், பாகிஸ்தான்-இந்தியா, ருவாண்டா-காங்கோ, தாய்லாந்து-கம்போடியா, அர்மீனியா-அசர்பைஜான், எகிப்து-எத்தியோப்பியா, மற்றும் செர்பியா-கொசோவோ ஆகியவற்றுக்கு இடையேயான மோதல்களை அவர் பட்டியலிட்டார். "வேறெந்த அதிபரும் இதைப் போலச் செய்ததில்லை" என்றும் அவர் கூறினார்.

ஐக்கிய நாடுகள் சபையைப் பற்றி விமர்சித்த அவர், இந்த அமைப்பு அதன் "திறனை" முழுமையாகப் பயன்படுத்தவில்லை என்றார். போர்களுக்கு அதன் பதில் "வெற்று வார்த்தைகளாக" உள்ளது என்று குறைகூறிய டிரம்ப், பல ஆண்டுகளுக்கு முன்பு நியூயார்க்கில் உள்ள ஐ.நா. தலைமையகத்தை மறுவடிவமைக்க அவர் எடுத்த முயற்சி தோல்வியடைந்ததையும் நினைவு கூர்ந்தார்.