உடைந்த நட்பு, உஷ்ணமான வார்த்தைகள்: ட்ரம்ப் Vs மஸ்க் மோதல் பின்னணி என்ன?

ஒரு காலத்தில் நெருங்கிய நண்பர்களாகக் கருதப்பட்ட அமெரிக்க அதிபர் டொனால்ட் டிரம்ப் மற்றும் உலகின் பணக்காரர்களில் ஒருவரான எலான் மஸ்க் இடையேயான உறவு, தற்போது முற்றிலும் உடைந்திருக்கிறது. ஏறக்குறைய ஒரு வருடம் மட்டுமே நீடித்த இந்த 'நட்பு', டிரம்ப்பின் இரண்டாவது அதிபர் பதவிக்காலம் தொடங்கிய ஐந்து மாதங்களுக்குள் பகிரங்கமாக முறிந்துள்ளது.

வியாழக்கிழமை, காலமான பாலியல் குற்றவாளி ஜெஃப்ரி எப்ஸ்டீன் உடனான தொடர்புகளை டிரம்ப் மறைப்பதாக மஸ்க் பகிரங்கமாக குற்றம் சாட்டினார். 

இதற்குப் பதிலடியாக, அதிபர் டிரம்ப், வெள்ளை மாளிகையில் ஜெர்மனியின் புதிய அதிபருடன் செய்தியாளர்களைச் சந்தித்தபோது, மஸ்கை "ஏமாற்றம்" என்று குறிப்பிட்டார். ஸ்பேஸ்எக்ஸ் மற்றும் ஸ்டார்லிங்கிற்கு வழங்கப்படும் பில்லியன் டாலர் மதிப்புள்ள அரசு ஒப்பந்தங்களை ரத்து செய்வதாகவும் மிரட்டினார்.

மஸ்க் உடனடியாக சமூக ஊடகங்களில் பதிலடி கொடுத்ததோடு, டிரம்பின் குற்றச்சாட்டுக்களை மறுத்து, சில கேலிச்சித்திரங்களையும் வெளியிட்டார். மேலும், டிரம்பை பதவி நீக்கம் செய்ய வேண்டும் என்ற கோரிக்கைக்கும் 'ஆம்' என்று பதிலளித்தார்.

சமூக ஊடகங்களில் வெடித்த போர்:

இந்த மோதல் டிரம்ப்பின் ட்ரூத் சோஷியல் (Truth Social) மற்றும் மஸ்கின் எக்ஸ் (X) ஆகிய சமூக ஊடக தளங்களில் முழுமையாக வெளிப்பட்டது. மஸ்க், டிரம்ப்பின் புதிய கூட்டாட்சிச் செலவு மசோதாவை "பிக் பியூட்டிஃபுல் பில்" என்று கேலி செய்த சில மணிநேரங்களுக்குப் பிறகு, இந்த வார்த்தைப் போர் வெடித்தது.

"எலான் குறித்து நான் மிகவும் ஏமாற்றமடைந்துள்ளேன்," என்று ஓவல் அலுவலகத்தில் இருந்து டிரம்ப் கூறினார். 

இந்த வார்த்தைப் போர் பல அடுத்தடுத்த மோதல்களுக்கு வழிவகுத்தது. மஸ்க் கூட்டாட்சி ஒப்பந்தங்களில் இருந்து அதிகப்படியான பலன்களைப் பெறுவதாக டிரம்ப் குற்றம் சாட்டினார். மேலும், அமெரிக்க அரசாங்கத்திற்கும் மஸ்கின் நிறுவனங்களுக்கும் இடையிலான அனைத்து வணிக உறவுகளையும் முடிவுக்குக் கொண்டு வருவதாக அச்சுறுத்தினார்.

"எங்கள் பட்ஜெட்டில் பில்லியன் கணக்கான டாலர்களை மிச்சப்படுத்த எளிதான வழி, எலானின் அரசு மானியங்கள் மற்றும் ஒப்பந்தங்களை ரத்து செய்வதே ஆகும்," என்று டிரம்ப் பதிவிட்டார்.

சில மணிநேரங்களுக்குப் பிறகு, சர்வதேச விண்வெளி நிலையத்திற்கு (ISS) விண்வெளி வீரர்களை ஏற்றிச் செல்ல பயன்படுத்தப்படும் நாசாவுடன் ஒப்பந்தம் செய்யப்பட்ட விண்கலங்களை ஸ்பேஸ்எக்ஸ் படிப்படியாக நிறுத்தும் என்று மஸ்க் அறிவித்தார். இது செயல்படுத்தப்பட்டால், சர்வதேச விண்வெளி நிலையத்திற்கு அமெரிக்காவின் பயண திறனைக் குறைத்து, ரஷ்யாவை நம்பியிருக்க வேண்டிய நிலைக்குத் தள்ளும்.

குற்றச்சாட்டுகளும், அவதூறுகளும், எப்ஸ்டீனும்:

இந்த வார்த்தைப் பரிமாற்றம் மிகவும் இருண்ட பக்கத்தை அடைந்தது. ஜெஃப்ரி எப்ஸ்டீன் தொடர்பான வெளியிடப்படாத பதிவுகளில் டிரம்ப் பெயர் குறிப்பிடப்பட்டுள்ளதாக மஸ்க் X தளத்தில் பதிவிட்டார். அதுவே இந்த ஆவணங்கள் பொது மக்களுக்கு வெளியிடப்படாத உண்மையான காரணம் என்று ஆதாரம் இல்லாமல் அவர் குறிப்பிட்டார்.

டிரம்ப் பதவி நீக்கம் செய்யப்பட வேண்டும் என்று அழைப்பு விடுக்கும் ஒரு பதிவையும் மஸ்க் பகிர்ந்து கொண்டார். நிர்வாகம் நாட்டை மந்தநிலைக்கு இட்டுச் செல்கிறது என்ற தனது கருத்தை அவர் மீண்டும் வலியுறுத்தினார்.

டிரம்ப்-மஸ்க் 'நட்பு' எப்படி தொடங்கியது?

அவர்களின் அரசியல் கூட்டணி அசாதாரண சூழ்நிலைகளில் தொடங்கியது: கடந்த ஜூலை மாதம் பென்சில்வேனியாவில் நடந்த பேரணியின் போது டிரம்ப் மீது நடந்த கொலை முயற்சிக்கு சில நாட்களுக்குப் பிறகு. டிரம்ப்பின் மிகவும் தீவிர ஆதரவாளர்களில் ஒருவராக மஸ்க் உருவெடுத்தார்.

ஒரு அரசியல் நடவடிக்கைக் குழுவை (PAC) தொடங்கி, டிரம்ப்பின் மறுதேர்தல் முயற்சிக்கு $250 மில்லியனுக்கும் அதிகமாக நிதி அளித்தார். கடந்த ஆண்டு பென்சில்வேனியாவில் மஸ்கின் PAC நிதியளித்த $1 மில்லியன் பரிசுப் போட்டி, வாக்காளர் பங்கேற்பை அதிகரித்ததாகக் கூறப்படுகிறது.

டிரம்ப்புடன் பிரச்சார நிறுத்தங்கள், ஒயிட் ஹவுஸ், ஏன் லிங்கன் படுக்கையறையில் இரவு தங்குவது என மஸ்க் அடிக்கடி காணப்பட்டார். 

டிரம்ப் பதவி ஏற்ற பிறகு, மஸ்க் அமைச்சரவைக் கூட்டங்களில் பங்கேற்றார், ஏர் ஃபோர்ஸ் ஒன்னில் மார்-அ-லாகோவிற்கு பறந்தார், மேலும் புதிதாக உருவாக்கப்பட்ட அரசுத் திறனாய்வுத் துறைக்கு ஒரு மூத்த ஆலோசகராக நியமிக்கப்பட்டார்.

மூன்று மாதங்களுக்கு முன்பு, மஸ்கின் சிக்கலில் சிக்கியுள்ள மின்சார வாகன நிறுவனத்திற்கு தனது ஆதரவை வெளிப்படுத்தும் விதமாக டிரம்ப் ஒரு சிவப்பு டெஸ்லாவை வாங்குவதைக் காட்டிக் கொண்டார்.

"இவ்வளவு நன்றி கெட்ட தனமா?"

வியாழக்கிழமை, டிரம்ப் இந்த முறிவை ஒப்புக்கொண்டார். "நான் எலானுக்கு நிறைய உதவினேன். ஆனால் நான் மிகவும் ஏமாற்றமடைந்தேன்" என்று அவர் கூறினார்

மசோதா பற்றிய மஸ்கின் புகார்களை அதிபர் நிராகரித்தார். மஸ்க் மின்சார வாகன வரிச் சலுகைகள் குறைக்கப்படுவதால் வெறுப்படைவதாகக் கூறினார். 

"தவறு. இந்த மசோதா எனக்கு ஒருமுறை கூட காட்டப்படவில்லை, மேலும் இது இரவின் இருட்டில் மிக வேகமாக நிறைவேற்றப்பட்டது. கிட்டத்தட்ட காங்கிரஸில் யாருக்கும் இதை படிக்க கூட நேரம் இல்லை!" என்று மஸ்க் பதிலடி கொடுத்தார். 

அதைத் தொடர்ந்து "நான் இல்லாமல், டிரம்ப் தேர்தலில் தோற்றிருப்பார். இவ்வளவு நன்றி கெட்ட தனமா?" என்று அதிபரின் ஈகோவை நோக்கிய ஒரு குத்தலான கருத்தைப் பதிவிட்டார்.

சந்தைகள் எப்படி எதிர்வினையாற்றின?

இந்த மோதலை சந்தைகள் சாதாரணமாக எடுத்துக் கொள்ளவில்லை. டிரம்ப் மஸ்க் மீதான தனது தாக்குதல்களைத் தீவிரப்படுத்தியதால், டெஸ்லா பங்குகள் 14 சதவீதத்திற்கும் அதிகமாக சரிந்தன. இது சுமார் $150 பில்லியன் சந்தை மதிப்பைக் குறைத்தது. மஸ்க் ஒரு நாளிலேயே தனது தனிப்பட்ட செல்வத்தில் சுமார் $20 பில்லியனை இழந்தார்.

2022 ஆம் ஆண்டுக்குப் பிறகு மஸ்கிற்கு ஏற்பட்ட மோசமான ஒரு நாள் இழப்பு இது என்று ஆய்வாளர்கள் தெரிவித்தனர்.

இந்த மோதல் முதலீட்டாளர்கள் மத்தியில் கவலையை எழுப்பியுள்ளது. ஸ்பேஸ்எக்ஸ் மற்றும் ஸ்டார்லிங் உட்பட மஸ்கின் பல நிறுவனங்கள் அரசு ஒப்பந்தங்களை பெரிதும் நம்பியுள்ளன.

இருப்பினும், மஸ்க் தனது முறைசாரா ஆலோசகர் பதவியில் இருந்து விலகத் தயாராகி வந்ததாகத் தெரிகிறது. கடந்த வாரம், ஓவல் அலுவலகத்தில் தனது "பிரியாவிடை பத்திரிகையாளர் சந்திப்பு" என்று உதவியாளர்கள் விவரித்ததை அவர் வழங்கினார். அவர் ஒரு கறுப்பு கண்ணுடன் தோன்றினார். அதை தனது இளம் மகனுடன் ஏற்பட்ட விளையாட்டுத்தனமான காயம் என்று கூறினார்.

Read in English: A billionaire breakup: Trump vs Musk war of words and an ‘Epstein files’ claim by Tesla CEO