சான் பிரான்சிஸ்கோவில் உள்ள இந்தியாவின் துணைத் தூதரகத்தில் நடந்த காழ்ப்புணர்ச்சி சம்பவம் தொடர்பாக அமெரிக்காவிடம் இந்தியா கடுமையான எதிர்ப்பை தெரிவித்ததால், வெள்ளை மாளிகை முதல் வெளியுறவுத்துறை வரையிலான அமெரிக்க நிர்வாகம், இந்த சம்பவத்தை கண்டித்து, “முற்றிலும் ஏற்றுக்கொள்ள முடியாதது” என்று கூறியது. அமெரிக்காவிற்குள் உள்ள இராஜதந்திர மையங்களுக்கு எதிரான வன்முறை “தண்டனைக்குரிய குற்றம்” என்றும் அமெரிக்க நிர்வாகம் கடுமையான எச்சரிக்கையுடன் கூறியது.
அமெரிக்க தேசிய பாதுகாப்பு ஆலோசகர் ஜேக் சல்லிவன் இந்த சம்பவத்தை கண்டித்த பிடன் நிர்வாகத்தின் உயர் அதிகாரி ஆவார். மேலும், “சான் பிரான்சிஸ்கோவில் உள்ள இந்திய துணைத் தூதரகத்திற்கு எதிரான வன்முறைச் செயல்களை நாங்கள் கண்டிக்கிறோம். இந்த தூதரகம் மற்றும் அவற்றில் பணிபுரியும் தூதர்களின் பாதுகாப்பிற்கு நாங்கள் கடமைப்பட்டுள்ளோம், ”என்று ஜேக் சல்லிவன் ட்வீட் செய்துள்ளார்.
இதையும் படியுங்கள்: லண்டனில் இந்திய தூதரகம் மீது தாகுதல்; தேசியக் கொடியை அகற்றிய காலிஸ்தான் போராட்டக்காரர்கள்
“இந்த விவகாரத்தில் அடுத்த கட்ட நடவடிக்கைகள் தொடர்பாக உள்ளூர் சட்ட அமலாக்கப் பிரிவுடன் வெளியுறவுத்துறை தொடர்பில் உள்ளது” என்று ஜேக் சல்லிவன் கூறினார்.
கேள்விகளுக்கு பதிலளித்த வெள்ளை மாளிகையின் மூலோபாய தகவல்தொடர்புகளுக்கான தேசிய பாதுகாப்பு கவுன்சில் ஒருங்கிணைப்பாளர் ஜான் கிர்பி, செய்தியாளர்களிடம் இந்த சம்பவத்தை கடுமையாக கண்டனம் செய்து, “அந்த நாசவேலை, முற்றிலும் ஏற்றுக்கொள்ள முடியாதது,” என்று கூறினார்.
“அரசாங்கத் துறையின் இராஜதந்திர பாதுகாப்பு சேவை உள்ளூர் அதிகாரிகளுடன் இணைந்து செயல்படுகிறது. சான் பிரான்சிஸ்கோ காவல்துறை சார்பாக என்னால் பேச முடியாது, ஆனால் உள்ளூர் அதிகாரிகளுடன் இராஜதந்திர பாதுகாப்பு சேவை ஒழுங்காக விசாரணை செய்து வருகிறது என்று என்னால் கூற முடியும், வெளிப்படையாக, வெளியுறவுத்துறை உள்கட்டமைப்புக் கண்ணோட்டத்தில் சேதத்தை சரிசெய்யப் போகிறது, ஆனால் சம்பவம் ஏற்றுக்கொள்ள முடியாதது, ”என்று ஜான் கிர்பி ஒரு கேள்விக்கு பதிலளித்தார்.
இந்தச் செயலுக்குப் பின்னால் இருப்பவர்கள் தண்டிக்கப்படுவார்கள் என்று அமெரிக்க வெளியுறவுத் துறையும் அறிக்கை ஒன்றை வெளியிட்டது. “ஞாயிற்றுக்கிழமை சான் பிரான்சிஸ்கோவில் உள்ள இந்திய தூதரகத்தின் மீது நடத்தப்பட்ட தாக்குதலை அமெரிக்கா கண்டிக்கிறது. அமெரிக்காவிற்குள் தூதரக நிலையங்களுக்கு எதிரான வன்முறை தண்டனைக்குரிய குற்றமாகும், ”என்று அறிக்கை கூறியது.
“இந்த தூதரகங்கள் மற்றும் அவற்றில் பணிபுரியும் தூதர்களின் பாதுகாப்பைப் பாதுகாப்பது எங்கள் முன்னுரிமை” என்று வெளியுறவுத்துறையின் தெற்கு மற்றும் மத்திய ஆசியப் பணியகம் தெரிவித்துள்ளது.
ஞாயிற்றுக்கிழமை காலிஸ்தான் சார்பு கோஷங்களை எழுப்பியபோது, போராட்டக்காரர்கள் நகர காவல்துறையால் எழுப்பப்பட்ட தற்காலிக பாதுகாப்பு தடைகளை உடைத்து, தூதரக வளாகத்திற்குள் காலிஸ்தான் கொடிகள் என்று அழைக்கப்படும் இரண்டு கொடிகளை நிறுவியதாக அமெரிக்காவில் இருந்து PTI செய்தி வெளியிட்டுள்ளது. இரண்டு தூதரக பணியாளர்கள் இந்த கொடிகளை விரைவில் அகற்றினர். சிறிது நேரத்திற்குப் பிறகு, கோபமடைந்த போராட்டக்காரர்களில் ஒரு குழு தூதரக வளாகத்திற்குள் நுழைந்து கதவு மற்றும் ஜன்னல்களை இரும்பு கம்பிகளால் தாக்கத் தொடங்கினர். தூதரக கட்டிடத்திற்கு தீ வைக்கும் முயற்சியும் நடந்ததாக கூறப்படுகிறது.
சான் பிரான்சிஸ்கோவில் உள்ள துணைத் தூதரகத்தில் நடந்த நாசவேலை சம்பவம் தொடர்பாக இந்தியாவில் உள்ள அமெரிக்க தூதரகத்திடம் இந்தியா திங்கள்கிழமை கடும் கண்டனத்தை பதிவு செய்தது.
இந்திய வெளியுறவு அமைச்சகம் இது போன்ற சம்பவங்கள் மீண்டும் நடைபெறாமல் இருக்க தகுந்த நடவடிக்கைகளை எடுக்குமாறு அமெரிக்க அரசிடம் கேட்டுக் கொண்டுள்ளது.
தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil
