இந்தியாவின் வடகிழக்கு மாநிலங்கள் பங்களாதேஷ் பகுதியா? பாகிஸ்தான் தளபதிக்கு யூனுஸ் அளித்த சர்ச்சை வரைபடப் பரிசு

பங்களாதேஷின் இடைக்காலத் தலைவர் முகமது யூனுஸ், இந்தியாவின் வடகிழக்கு மாநிலங்களை வங்கதேசத்தின் ஒரு பகுதியாகக் காட்டும் ஒரு திரிக்கப்பட்ட வரைபடத்தை பாகிஸ்தானின் கூட்டுப் படைகளின் தலைவர் குழுவின் (சி.ஜே.சி.எஸ்.சி) தலைவர் ஜெனரல் சஹிர் ஷம்ஷாத் மிர்சாவுக்குப் பரிசளித்ததன் மூலம் புதிய சர்ச்சையைத் தூண்டியுள்ளார். இந்தச் சர்ச்சைக்குரிய வரைபடத்தில், அசாம் மற்றும் பிற வடகிழக்கு மாநிலங்கள் வங்கதேசத்தின் பகுதியாகக் காட்டப்பட்டிருந்தன.

கடந்த வார இறுதியில் ஜெனரல் சஹிர் ஷம்ஷாத் மிர்சா டாக்காவுக்குச் சென்றிருந்தபோது இந்தச் சம்பவம் நடந்தது. 1971-ம் ஆண்டு விடுதலைப் போருக்குப் பிறகு புளித்துப்போயுள்ள இரு நாடுகளுக்கு இடையேயான உறவுகளை மேம்படுத்தும் நோக்கில் அவர் யூனுஸைச் சந்தித்தார்.

இந்தச் சந்திப்புக் குறித்த புகைப்படங்களை எக்ஸ் தளத்தில் பகிர்ந்த பங்களாதேஷ் அரசாங்கத்தின் தலைமை ஆலோசகரின் அதிகாரப்பூர்வப் பக்கம், "சந்திப்பின்போது, இருதரப்பு வர்த்தகம், முதலீடு மற்றும் பாதுகாப்பு ஒத்துழைப்பின் வளர்ந்து வரும் முக்கியத்துவம் உட்பட, பங்களாதேஷ் - பாகிஸ்தான் உறவுகள் தொடர்பான பரந்த அளவிலான பிரச்சினைகள் குறித்து அவர்கள் விவாதித்தனர்” என்று கூறியுள்ளது.

இந்தியாவின் வடகிழக்கு மாநிலங்களைக் குறிப்பிட்டு, யூனுஸ் இந்தியாவைப் புண்படுத்தியது இது முதல் முறை அல்ல.

யூனுஸின் திரும்பத் திரும்ப வரும் இந்திய வடகிழக்கு மாநிலக் குறிப்புகள்

இந்தியாவின் வடகிழக்கு மாநிலங்களைக் குறிப்பிட்டு யூனுஸ் இந்தியாவைத் தொந்தரவு செய்வது இது முதல் முறையல்ல. நோபல் பரிசு பெற்ற இவர், வெளிநாடுகளுடனான சந்திப்புகளின்போது இந்தியாவின் "நிலத்தால் சூழப்பட்ட" வடகிழக்கு மாநிலங்கள் குறித்து ஏற்கனவே பலமுறை குறிப்பிட்டுள்ளார். மேலும், பங்களாதேஷ்தான் "கடலின் ஒரே பாதுகாவலர்" என்றும் அவர் கூறியிருந்தார்.

“இந்தியாவின் ஏழு மாநிலங்கள், இந்தியாவின் கிழக்குப் பகுதி... அவை நிலத்தால் சூழப்பட்ட நாடுகள். கடலை அடைய அவர்களுக்கு வழியில்லை” என்று யூனுஸ் கடந்த ஏப்ரல் மாதம் சீனாவுக்குச் சென்றிருந்தபோது சீன அதிகாரிகளிடம் கூறியிருந்தார்.

யூனுஸின் இந்தக் கருத்துக்கள் இந்தியாவில் பெரும் கொந்தளிப்பை ஏற்படுத்தின. இதையடுத்து, இந்தியப் பகுதி வழியாக பங்களாதேசஷ பொருட்களை நேபாளம், பூட்டான் மற்றும் மியான்மருக்கு கொண்டு செல்ல அனுமதித்த ஒப்பந்தத்தை இந்திய அரசு ரத்து செய்தது.

சர்ச்சைக்குரிய சாகீர் நாயக்கிற்கு சிவப்புக் கம்பளம்

மற்றொரு முக்கிய நிகழ்வாக, அடுத்த மாதம் பங்களாதேஷிற்கு வரவிருக்கும் அடிப்படைவாத இஸ்லாமிய மத போதகரான சாகிர் நாயக்கிற்கு (Zakir Naik) சிறப்பான வரவேற்பு அளிக்கப்பட உள்ளதாகச் செய்திகள் தெரிவிக்கின்றன. சர்ச்சைக்குரிய கருத்துக்களை வெளியிடுவதற்காக அறியப்பட்ட மற்றும் பல நாடுகளில் தடை செய்யப்பட்ட சாகீர் நாயக்கிற்கு முகமது யூனுஸ் வரவேற்பு அளிக்கத் திட்டமிட்டுள்ளதாகத் தகவல்கள் தெரிவிக்கின்றன.

குறிப்பிடத்தக்க வகையில், 2016-ம் ஆண்டு டாக்காவில் உள்ள ஹோலி ஆர்ட்டிசன் பேக்கரியில் நடந்த பயங்கரவாதத் தாக்குதலுக்குப் பிறகு சாகீர் நாயக் வங்கதேசத்தில் தடை செய்யப்பட்டார். அந்தத் தாக்குதலில் இஸ்லாமியக் குழுவான ஜமாத்-உல்-முஜாஹிதீன் பங்களாதேஷ் (ஜே.எம்.பி), 9 இத்தாலியர்கள், 7 ஜப்பானியர்கள், 1 அமெரிக்கர் மற்றும் 1 இந்தியர் உட்பட 20 பேரைக் கொன்றது.

இருப்பினும், அதே சாகீர் நாயக்கிற்கு பங்களாதேஷ் அரசாங்கம் சிவப்புக் கம்பளம் விரிப்பது பலரிடமிருந்தும் கடுமையான விமர்சனங்களைப் பெற்றுள்ளது. சாகீர் நாயக்கின் இந்தப் பயணம், இந்த ஆண்டு பிப்ரவரியில் அவர் பாகிஸ்தானுக்குச் சென்ற சில மாதங்களுக்குப் பிறகு வருகிறது.