A, O, or AB: ரத்த வகைகளுக்கும் வெப்ப உணர்திறனுக்கும் தொடர்புண்டா? நிபுணர்கள் சொல்வது என்ன?

குறிப்பிட்ட ரத்த வகை கொண்டவர்களுக்கு வெப்ப உணர்திறன் அதிகமாக இருக்குமா? என்ற கேள்விக்கு, புதுடெல்லியில் உள்ள சி.கே. பிர்லா மருத்துவமனையின் உள் மருத்துவப் பிரிவின் தலைமை ஆலோசகர் டாக்டர் நரேந்தர் சிங்லா, "ரத்த வகைகளுக்கும் ஒரு தனிநபரின் வெப்ப உணர்திறனுக்கும் நேரடித் தொடர்பு இல்லை" என்றார். இருப்பினும், அவரது கருத்துப்படி, சில ஆராய்ச்சிகள் ரத்த வகைகளில் காணப்படும் கார்போஹைட்ரேட் ரத்த குழு ஆன்டிஜென்கள் (carbohydrate blood group antigens) காரணமாக, குறிப்பிட்ட ரத்த வகைகள் மாறுபட்ட அளவிலான வெப்ப எதிர்ப்பைக் காட்டக்கூடும் என்று தெரிவிக்கின்றன. இந்த ஆன்டிஜென்கள், வெப்ப அழுத்தத்திலிருந்து செல்களைப் பாதுகாப்பதில் பங்கை வகிக்கலாம் என்றும் அவர் மேலும் விளக்கினார். ரத்த வகையை மட்டும் வைத்து ஒருவருக்கு வெப்ப உணர்திறன் அதிகமாக இருக்கும் என்று உறுதியாகக் கூற முடியாது. ஆனால், ரத்த செல்களில் உள்ள சில கூறுகள் வெப்பத்தை தாங்கும் திறனைப் பாதிக்கலாம் என்று ஆய்வுகள் தெரிவிக்கின்றன.

இந்த செய்தியை ஆங்கிலத்தில் படிக்க

குறிப்பிட்ட ரத்த வகை ஆன்டிஜென்களை வெளிப்படுத்தும் செல்கள் வெப்பத்திற்கு அதிக எதிர்ப்பைக் காட்டக்கூடும் என சி.கே. பிர்லா மருத்துவமனையின் உள் மருத்துவப் பிரிவின் தலைமை ஆலோசகர் டாக்டர் நரேந்தர் சிங்லா தெரிவித்துள்ளார். அவரது கூற்றுப்படி, H மற்றும் A ஆன்டிஜென்கள் போன்ற குறிப்பிட்ட ரத்த குழு ஆன்டிஜென்களை வெளிப்படுத்தும் செல்கள், வெப்பத்திற்கு அதிக எதிர்ப்பைக் காட்டலாம். "இந்த எதிர்ப்பு, இந்த ஆன்டிஜென்களுடன் தொடர்புடைய சில கிளைகோசில்டிரான்ஸ்ஃபெரேஸ் (glycosyltransferase) என்சைம்களின் செயல்பாட்டுடன் இணைக்கப்படலாம். இவை வெப்ப அழுத்தத்தின் கீழ் செல் பாதுகாப்பிற்கு பங்களிக்க முடியும்," என்று டாக்டர் சிங்லா விளக்கினார். மேலும், ஆன்டிஜென் வெளிப்பாட்டின் அளவு, வெப்ப அதிர்ச்சியைத் தாங்கும் செல்லின் திறனை வெளிப்படுத்தலாம் என்றும், இந்த ஆன்டிஜென்கள் அதிகமாக வெளிப்படும் செல்கள் அதிக வெப்பத்தை எதிர்க்கும் திறன் கொண்டவையாக இருக்கலாம் என்றும் அவர் கூறினார்.

மறுபுறம், ரத்த வகை 'O' கொண்ட நபர்களுக்கு அட்ரினலின் அளவு அதிகமாக இருப்பதாகக் கூறப்படுகிறது. இது மன அழுத்தம் அல்லது உடல் செயல்பாடுகளின் போது இதயத் துடிப்பு மற்றும் உடல் வெப்பநிலையை அதிகரிக்கச் செய்து, அவர்களின் உடல்கள் அதிக வெப்பத்தை உருவாக்கக்கூடும் என்று நவி மும்பையின் மெடிகோவர் மருத்துவமனைகளின் பொது மருத்துவ ஆலோசகர் டாக்டர் பதால் தௌரி தெரிவித்தார். "ரத்த வகை 'AB' அல்லது 'B' கொண்டவர்கள், ரத்த ஓட்டம் மற்றும் நோயெதிர்ப்பு மண்டல வேறுபாடுகள் காரணமாக வெப்பத்திற்கு சகிப்புத் தன்மை கொண்டிருக்கலாம். இருப்பினும், இந்த கூற்றுக்கள் சரிபார்க்கப்படவில்லை அல்லது நிரூபிக்கப்படவில்லை," என்றும் டாக்டர் தௌரி குறிப்பிட்டார்.

ரத்த வகை நேரடியாக ஒருவரின் வெப்ப உணர்வை பாதிக்கவில்லை என்றாலும், சில இரத்த வகைகள் குறிப்பிட்ட உடல்நல அபாயங்களுடன் தொடர்புடையவை என்று நிபுணர்கள் தெரிவிக்கின்றனர். புதுடெல்லியில் உள்ள சி.கே. பிர்லா மருத்துவமனையின் உள் மருத்துவப் பிரிவின் தலைமை ஆலோசகர் டாக்டர் நரேந்தர் சிங்லா, "O வகை ரத்தம் கொண்டவர்களுக்கு மாரடைப்பு, ரத்த உறைவு ஏற்படும் அபாயம் குறைவாக இருக்கலாம்" என்று கூறினார். மாறாக, "A அல்லது AB வகை ரத்தம் கொண்டவர்களுக்கு இரைப்பை மற்றும் கணைய புற்றுநோய் (gastric and pancreatic cancer) உள்ளிட்ட சில வகையான புற்றுநோய்கள் ஏற்படும் அபாயம் அதிகமாக இருக்கலாம்" என்றும் டாக்டர் சிங்லா தெரிவித்தார்.

ரத்த வகைகளுக்கும் வெப்ப உணர்வுக்குமிடையே வெளிப்படையான தொடர்பு இல்லை என்றாலும், செல்களின் வெப்ப எதிர்ப்பில் ரத்த குழு ஆன்டிஜென்களின் பங்கு குறித்து தொடர்ச்சியான ஆய்வுகள் நடைபெற்று வருவதாக டாக்டர் சிங்லா குறிப்பிட்டார். "ரத்த வகைகளில் உள்ள வேறுபாடுகள் தனிநபர்கள் வெப்பத்தை உணரும் விதத்தில் அளவிடக்கூடிய தாக்கத்தை ஏற்படுத்துகின்றனவா என்பதை ஆராய மேலும் ஆய்வுகள் தேவை" என்றும் அவர் வலியுறுத்தினார்.

ஒட்டுமொத்தமாக, ஒருவரின் வெப்ப உணர்திறனை ரத்த வகையை விட, நீரேற்றம் (hydration), உடல் எடை, வளர்சிதை மாற்றம் (metabolism), உடற்பயிற்சி நிலை மற்றும் வாழ்க்கை முறை போன்ற காரணிகள் பெரிதும் பாதிக்கின்றன என்று நவி மும்பையின் மெடிகோவர் மருத்துவமனைகளின் பொது மருத்துவ ஆலோசகர் டாக்டர் பதால் தௌரி தெரிவித்தார். "ரத்த வகையைப் பொருட்படுத்தாமல், உடல் குளிர்ச்சியாக இருப்பதை உறுதி செய்தல், போதுமான திரவங்களை அருந்துதல் மற்றும் நேரடி சூரிய ஒளியைத் தவிர்க்க வேண்டும் என்றும் டாக்டர் தௌரி அறிவுறுத்தினார்.