இப்பவும் நான் ரஜினி சார் ரசிகை... 'அண்ணாமலை' ரஜினி மகள் இப்போ 2 குழந்தைகளின் தாய்!

‘அண்ணாமலை' திரைப்படத்தில் ரஜினிகாந்த்தின் மகளாக நடித்த சிறுமி தக்ஷாயினி உங்களுக்கு நினைவிருக்கிறதா? அதே செல்லமான முகம், அதே துடிப்பான கண்களுடன் இப்போது இரண்டு குழந்தைகளின் தாயாக மாறிவிட்டார். ஆனாலும், அவர் உள்ளத்துக்குள் இருக்கும் ரஜினி ரசிகை மட்டும் மாறவே இல்லை.

இப்போது சீரியல்களில் நடித்து வரும் தக்ஷாயினி சமீபத்தில் திரை மொழி யூடியூப் சேனலுக்கு அளித்த பேட்டியில், ரஜினி மீதான தன் அன்பு இன்னும் மாறாமல் பசுமையாக இருப்பதை பகிர்ந்து கொண்டார். 

"நான் இப்பவும் ரஜினி சார் ரசிகைதான். எங்க குடும்பத்துல எல்லாருமே ரஜினி சார் ரசிகர்கள்தான். ரஜினிதான் சூப்பர் ஸ்டார்னு நாங்க உறுதியா நம்புவோம். அவர் ஒரு சிறந்த நடிகர் என்பது நிறைய பேருக்கு தெரியுமா, தெரியாதானு தெரியல. ரஜினி சாருடைய பழைய படங்கள், 'பைரவி', முள்ளும் மலரும்', 'ஆறு முதல் அறுபது வரை', 'மூன்று முடிச்சு', 'பதினாறு வயதினிலே' போன்ற படங்கள்ல அவருடைய நடிப்புக்கான வாய்ப்பு நிறைய இருந்தது. அந்தப் படங்கள்ல அவர் அருமையா நடிச்சிருப்பார். 'புவனா ஒரு கேள்விக்குறி' மாதிரி நிறைய படங்களை நான் சின்ன வயதிலிருந்தே விடாமல் பார்த்திருக்கேன். அவருடைய நடிப்பு ரொம்ப இயல்பா இருக்கும்.

சமீபத்துல கூட என் பசங்களோட சேர்ந்து 'பைரவி' படத்தை பார்த்தோம். அப்பவே ரஜினி சார் எவ்வளவு அருமையா நடிச்சிருக்கார்னு அவங்க ஆச்சரியப்பட்டாங்க. நைட்டு 11, 12 மணி வரைக்கும் கூட அந்தப் படத்தை பார்த்தோம். 'பைரவி'ல அவர் அவ்வளவு நல்லா பண்ணியிருக்கார், அவருடைய நடிப்பு ரொம்ப யதார்த்தமா இருந்தது. அவர் ஸ்டைலாக நடிக்கிறார்னு மட்டுமே பலரும் பேசுறாங்க. அவர் ஒரு சிறந்த நடிகர் என்பது நிறைய பேருக்கு தெரியவில்லை.

'ஜெயிலர்' படத்துல 'காவாலா' பாட்டுல அவர் ஒரு குழந்தையா, இயல்பா ஆடிருப்பார். வேற எந்த ஹீரோவும் அப்படி செய்ய மாட்டாங்க. அவங்களுடைய இமேஜ் பார்ப்பாங்க. ரஜினி சார் எப்போவும் டைரக்டர் சொல்றதை அப்படியே செய்றதாலதான் இன்னைக்கும் சூப்பர் ஸ்டாராக இருக்கார்.

View this post on Instagram

A post shared by Dhakshayene (@dhakshyene_official)

ரஜினி சார் தவிர எனக்கு விஜய்யும் பிடிக்கும். அவருடைய டான்ஸ் பிடிக்கும். அஜித்தோட குணம் பிடிக்கும். அவர் எல்லாரிடமும் ரொம்ப ஃப்ரெண்ட்லியா பழகுவார். கார்த்திக் சாரோட இயல்பான நடிப்பு பிடிக்கும். விஷால் சாரையும் எனக்கு பிடிக்கும். என் கணவர் விஷால் கூட நிறைய படங்களுக்கு உதவி இயக்குநரா வேலை செய்திருக்கார். 'கும்கி', 'மருது' போன்ற படங்கள்ல. பொதுவா இவங்களையெல்லாம் எனக்குப் பிடிக்கும்’, என்று அந்த பேட்டியில் பகிர்ந்து கொண்டார் தக்ஷாயினி.