இப்படி உட்காருவது ஆபத்து… முதுகு வலி குறைய இந்த டிப்ஸ் ஃபாலோ பண்ணுங்க; டாக்டர் ஷர்மிகா

இன்றைய வேகமான உலகில், கணினி முன்பு பல மணி நேரம் அமர்ந்து வேலை செய்பவர்கள், அல்லது நீண்ட நேரம் ஒரே இடத்தில் அமர்ந்து படிக்கும் மாணவர்களுக்கு ஏற்படும் பொதுவான பிரச்சனை முதுகு வலி. குறிப்பாக இளைஞர்கள் மத்தியில் இது அதிகரித்து வருகிறது. இதற்கு முக்கிய காரணம், நம்முடைய உட்காரும் முறை (Sitting Posture) முற்றிலும் தவறாக இருப்பதே.

முதுகு வலி என்பது வயதானவர்களுக்கு மட்டுமே வரும் என்ற பொதுவான கருத்து உண்டு. ஆனால், இப்போது 18 வயது இளம் வயதினருக்கும் முதுகு வலி ஏற்படுவதை பார்க்கிறோம். பலருக்கு, சரியான முறையில் உட்காரத் தெரியவில்லை. உட்காரும் போது, இடுப்பு எலும்பில் (Buttocks) உட்காராமல், முதுகுத் தண்டை வளைத்து அமர்வதால், முதுகு தசைகளில் அதிக அழுத்தம் ஏற்படுகிறது. இதனால், முதுகுத் தண்டு பாதிக்கப்படுகிறது.

முதுகுவலியைத் தடுக்க உதவும் எளிய வழிகள்:

டாக்டர் ஷர்மிகா, முதுகு வலியைத் தடுக்கவும், முதுகுத் தண்டை ஆரோக்கியமாக வைத்துக்கொள்ளவும் சில எளிய வழிமுறைகளை வழங்கியுள்ளார்:

சரியான முறையில் உட்காருதல்: உட்காரும் போது உங்கள் முதுகெலும்பு நேராக இருக்கிறதா என்பதை உறுதிப்படுத்திக் கொள்ளுங்கள். உங்கள் இடுப்பை (Buttocks) இருக்கையில் படுமாறு அமர்ந்து, முதுகெலும்புக்கு நேராக ஒரு தலையணையை வைத்து அமரலாம். இது உங்கள் முதுகுக்கு ஆதரவு அளிக்கும்.

தரையிலமர்ந்து படிக்கும் பழக்கம்: தரையில் அமர்ந்து படிப்பதன் மூலம் முதுகுத் தண்டு நேராக இருக்கும். ஒரு பாய் அல்லது பெட்ஷீட்டை விரித்து அதன் மேல் அமர்ந்து படிப்பதன் மூலம் நல்ல பலன் கிடைக்கும். இது, முதுகுத் தண்டுக்கு ஒருவித பயிற்சியை அளித்து, வலியைப் போக்கும்.

முதுகுத்தண்டுக்கான பயிற்சிகள்: தினமும் தவறாமல், முதுகுத் தண்டை நீட்டுவதற்கான (Backward Stretches) பயிற்சிகளைச் செய்யுங்கள். குனியும் பயிற்சிகளைத் தவிர்த்து, பின்னோக்கி வளைக்கும் பயிற்சிகளைச் செய்வது முதுகுத் தண்டுக்கு நன்மை பயக்கும்.

சரியான நேரத்தில் மருத்துவ ஆலோசனை: உங்களுக்கு கடுமையான முதுகு வலி இருந்தால், அதை அலட்சியம் செய்யாதீர்கள். உடனடியாக ஒரு மருத்துவரை அணுகி, முழு முதுகுத் தண்டிற்கும் ஒரு MRI ஸ்கேன் எடுத்து, பிரச்சனைக்கான சரியான காரணத்தைக் கண்டறியுங்கள். அதன் பிறகு, மருத்துவர் அளிக்கும் சிகிச்சையை முறையாகப் பின்பற்றுவது அவசியம்.

இந்த எளிய ஆலோசனைகளைப் பின்பற்றுவதன் மூலம், உங்கள் முதுகுத் தண்டை ஆரோக்கியமாக வைத்துக்கொள்வதோடு, உங்கள் தன்னம்பிக்கையையும் அதிகரிக்கலாம். முதுகு வலி என்பது உங்களை சோர்வாகவும், அசௌகரியமாகவும் உணர வைக்கும். சரியான பழக்கவழக்கங்கள் மூலம் இதைத் தடுக்கலாம்.