முதுமையை தள்ளிப்போட சூப்பர் டிப்ஸ்… ஒரே வாரத்தில் ரிசல்ட் தெரியும்; டாக்டர் நித்யா

வெயில் காலம், சீதோஷ்ண மாற்றம் எனப் பல காரணங்களால் உடல் மற்றும் சரும வறட்சி ஏற்படுவது பரவலாகக் காணப்படுகிறது. இந்த வறட்சி வெறும் தோலில் மட்டும் இல்லாமல், நம் உள் உறுப்புகள் மற்றும் மூட்டுகளையும் பாதிக்கும். சித்த மருத்துவர் டாக்டர் நித்யா, வறட்சிக்கான காரணங்களையும், அதை சரிசெய்வதற்கான எளிய வீட்டு வைத்தியங்களையும் விளக்குகிறார்.

வறட்சி என்றால், பொதுவாக நாம் சருமம் வறண்டு போவதைப் பற்றி மட்டும் தான் நினைக்கிறோம். ஆனால், அது உள் உறுப்புகளையும் பாதிக்கும். மூட்டுகளில் வறட்சி ஏற்படும்போது, கீல்வாதம் (crepitation) மற்றும் வலி உண்டாகிறது. சிலருக்கு நடக்கும்போது அல்லது உடலை அசைக்கும்போது சத்தம் கேட்கும். இதுவும் வறட்சியின் அறிகுறிதான். உமிழ்நீர் சுரப்பிகளின் உற்பத்தி குறையும்போது வாய் வறண்டு போகும். அதேபோல், கண்ணீர் சுரப்பிகளின் செயல்பாடு குறைந்தால் கண்களில் வறட்சி ஏற்படும். கடுமையான வறட்சி காரணமாக அரிக்கும் தோலழற்சி (psoriasis) போன்ற சரும நோய்களும், பொடுகு தொல்லையும் அதிகரிக்கலாம்.

நம் அன்றாட உணவுப் பழக்கங்கள் மற்றும் வாழ்க்கை முறையே வறட்சிக்கு முக்கிய காரணம் என்கிறார். அதிக உப்பு உள்ள உணவுகள், பதப்படுத்தப்பட்ட உணவுகள், குளிர்சாதனப் பெட்டியில் வைக்கப்பட்ட உணவுகள் போன்றவை வறட்சியை ஏற்படுத்தும். போதிய அளவு தண்ணீர் குடிக்காததும் முக்கிய காரணம். சில மாத்திரைகள் மற்றும் மருந்துகள் எடுத்துக்கொள்வதும் உடலில் வறட்சியை அதிகரிக்கலாம். உடலில் பித்தம் (உடல் சூடு) அதிகரிப்பதாலும் வறட்சி ஏற்படும்.

வறட்சிக்கான எளிய வீட்டு வைத்தியங்கள்:

வாரத்திற்கு ஒரு முறை அல்லது 2 முறை எண்ணெய் தேய்த்துக் குளிப்பது உடலின் வறட்சியைப் போக்க சிறந்த வழி. இது தலை, கண் மற்றும் சருமம் என அனைத்தையும் பாதுகாக்கும். மூட்டு வலி அல்லது குடல் சம்பந்தப்பட்ட பிரச்னை உள்ளவர்கள், தினமும் 10 மில்லி தூய நல்லெண்ணெய் குடிக்கலாம். இது வறட்சியைப் போக்கி, மூட்டுகளுக்குப் பலம் கொடுக்கும். தூங்குவதற்கு முன், விளக்கெண்ணெய் அல்லது நல்லெண்ணெயை சில துளிகள் தொப்புளில் வைப்பது ஒரு சிறந்த வழியாகும். இது உடல் சூட்டை குறைத்து, கண் எரிச்சல், முடி உதிர்தல் போன்ற பிரச்னைகளையும் சரிசெய்ய உதவும். நீர்ச்சத்து நிறைந்த பழங்கள் மற்றும் காய்கறிகளை அதிகம் உணவில் சேர்த்துக்கொள்வது உடலை நீரேற்றத்துடன் வைத்திருக்க உதவும்.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.