அலர்ஜி வராத பாத்திர சோப் இதுதான்; எலுமிச்சை தோல் வைத்து வீட்டிலே இப்படி ரெடி பண்ணுங்க; டாக்டர் கார்த்திகேயன்

சாதாரண சோப்புகளைப் பயன்படுத்தும் போது பலருக்கு தோல் அலர்ஜி ஏற்படுவதுண்டு. எவ்வளவு நல்ல சோப்பு பயன்படுத்தினாலும், பாத்திரம் கழுவும் பவுடர்கள், தரை மற்றும் சமையலறை சுத்தப்படுத்தும் ரசாயனங்கள் என பலவும் ஒவ்வாமையை அதிகரிக்கின்றன. இந்த ரசாயனங்கள் நம் ஆரோக்கியத்திற்கு மட்டுமல்லாமல், சுற்றுச்சூழலுக்கும் பெரிய பாதிப்பை ஏற்படுத்துகின்றன.

இந்த சிக்கல்களுக்கு ஒரு சிறந்த தீர்வுதான் பயோ என்சைம் சோப். இது இயற்கையான முறையில் தயாரிக்கப்பட்டு, அலர்ஜியைக் குறைத்து, பாத்திரங்களையும் பளபளக்கச் செய்கிறது. மேலும், சுற்றுச்சூழலுக்கு எந்தவித பாதிப்பையும் ஏற்படுத்துவதில்லை.
 
பயோ என்சைம் சோப் தயாரிக்க தேவையான பொருட்கள்:

எலுமிச்சை அல்லது ஆரஞ்சு பழ தோல்கள்
வெல்லம் அல்லது நாட்டு சர்க்கரை
தண்ணீர்
ஒரு கண்டெய்னர் (பிளாஸ்டிக் பாட்டில் அல்லது பக்கெட்)

தயாரிப்பு விகிதம்:

3 பங்கு எலுமிச்சை தோல்கள்
1 பங்கு வெல்லம் / நாட்டு சர்க்கரை
10 பங்கு தண்ணீர்

செய்முறை:

ஒரு சுத்தமான கண்டெய்னரில் முதலில் 10 பங்கு தண்ணீரை ஊற்றவும். அதில் 1 பங்கு வெல்லம் அல்லது நாட்டு சர்க்கரையை சேர்க்கவும். சர்க்கரை கரைவது நொதித்தலுக்கு உதவும்.

அடுத்து, 3 பங்கு எலுமிச்சை அல்லது ஆரஞ்சு தோல்களை (சிறு துண்டுகளாக நறுக்கியது) சேர்க்கவும்.

கண்டெய்னரில் முழுமையாக நிரப்பாமல், மேல் பகுதியில் மூன்றில் ஒரு பங்கு காலி இடம் விடவும். நொதித்தல் ஏற்படும்போது வாயுக்கள் உருவாகும் என்பதால் இந்த இடைவெளி அவசியம்.

கண்டெய்னரை மூடி வைக்கவும்.

முக்கிய குறிப்புகள்:

முதல் ஒரு வாரத்திற்கு தினமும் ஒருமுறை மூடியைத் திறந்து, உள்ளே உருவாகும் வாயுக்களை வெளியேற்றவும். இல்லையென்றால், வாயு அழுத்தம் காரணமாக கண்டெய்னர் வெடிக்க வாய்ப்புள்ளது.

ஒரு வாரத்திற்குப் பிறகு, வாரத்திற்கு 2 அல்லது 3 முறை மூடியைத் திறந்து வாயுக்களை வெளியேற்றினால் போதுமானது.

ஒரு ஸ்பூன் ஈஸ்ட் சேர்த்தால், நொதித்தல் செயல்முறை விரைவாக நடைபெறும். ஈஸ்ட் சேர்க்கவில்லை என்றால், பயோ என்சைம் முழுமையாக உருவாக 3 மாதங்கள் ஆகும். ஈஸ்ட் சேர்த்தால், ஒரு மாதத்திலேயே தயாராகிவிடும்.

நொதித்தல் முழுமையடைந்ததும், எலுமிச்சை தோல்கள் அனைத்தும் கண்டெய்னரின் அடிப்பகுதிக்கு சென்றுவிடும். திரவம் மேலே தெளிவாக இருக்கும்.

பயன்படுத்தும் முறை:

மேலே உள்ள திரவத்தை எடுத்து, உங்கள் தேவைக்கேற்ப நீர்த்துப் பயன்படுத்தலாம்.

பாத்திரம் கழுவ: சில துளிகள் சோப்பு திரவத்துடன் தண்ணீர் கலந்து பயன்படுத்தலாம்.

தரையை சுத்தம் செய்ய: ஒரு பக்கெட் தண்ணீரில் சிறிதளவு பயோ என்சைம் கலந்து துடைக்கலாம்.

கழிவறை மற்றும் சமையலறை சிங்க் அடைப்பை நீக்க: நேரடியாக சிறிதளவு திரவத்தை ஊற்றலாம்.

இந்த பயோ என்சைம், வினிகரை விடவும் மிகவும் லேசான அமிலத்தன்மை கொண்டது. இதை எந்தவித பயமுமின்றி பயன்படுத்தலாம். இதன் மூலம் உங்கள் வீடு சுத்தமாவதோடு, உங்கள் சருமமும் பாதுகாக்கப்படும், பூமியும் மாசுபடுவதிலிருந்து காக்கப்படும்.

இனி ரசாயன சோப்புகளைத் தவிர்த்து, இயற்கையான பயோ என்சைம் சோப் பயன்படுத்தி ஆரோக்கியமான வாழ்க்கையை வாழுங்கள்!