நீண்ட நேரம் ஒரே இடத்தில் உட்கார்ந்து வேலை செய்பவர்களுக்கு, தேவையான அளவு நடப்பதோ அல்லது நாள் முழுவதும் சுறுசுறுப்பாக இருப்பதோ கடினமாக இருக்கிறதா? கவலை வேண்டாம். நிபுணர்களின் கூற்றுப்படி, ஒவ்வொரு 45 நிமிடங்களுக்கும் சரியான முறையில் 10 ஸ்குவாட்ஸ் (squats) செய்வதன் மூலம், நீங்கள் உட்கார்ந்திருக்கும் நேரத்தைக் குறைக்கலாம். சிலர் இதை இரத்த சர்க்கரை அளவைக் கட்டுப்படுத்த தினசரி 30 நிமிட நடைப்பயணத்தை விடவும் சிறந்ததாகக் கூறுகிறார்கள். இது உண்மையா?
நடைப்பயணம் vs. ஸ்குவாட்ஸ்: எது சிறந்தது?
இதய ஆரோக்கியத்தை மேம்படுத்துவதற்கும், நாள்பட்ட நோய்களின் அபாயத்தைக் குறைப்பதற்கும் நடைப்பயணம் ஒரு நன்கு அறியப்பட்ட செயல்பாடு. ஆனால், நீண்ட நேரம் உட்கார்ந்திருப்பதை, ஒவ்வொரு 45 நிமிடங்களுக்கும் 10 ஸ்குவாட்ஸ் போன்ற குறுகிய நேர செயல்பாடுகளால் தடை செய்வது குறிப்பிடத்தக்க நன்மைகளைத் தரும் என்று டெல்லி சி.கே. பிர்லா மருத்துவமனையின் உள் மருத்துவ இயக்குநர் டாக்டர் மனிஷா அரோரா கூறுகிறார்.
இந்தச் செயல்பாடு குறுகியதாக இருந்தாலும், அதன் அதிர்வெண் உடல் பருமன் மற்றும் குறிப்பாக குளுக்கோஸ் வளர்சிதை மாற்றத்தில் (glucose metabolism) ஏற்படும் எதிர்மறை விளைவுகளைத் தணிக்க உதவும். இந்த நாட்களில், நீங்கள் எவ்வளவு சுறுசுறுப்பாக இருக்கிறீர்கள் என்பது மட்டுமல்ல, எவ்வளவு நேரம் உட்கார்ந்தே இருக்கிறீர்கள் என்பதும் முக்கியப் பேசுபொருளாகி வருகிறது. வேறு வார்த்தைகளில் கூறுவதானால், ஒட்டுமொத்த செயல்பாட்டு அளவைப் பொருட்படுத்தாமல், அசைவில்லாமல் நீண்ட நேரம் உட்கார்ந்திருப்பது ஒரு ஆபத்துக் காரணியாகும், என்று டாக்டர் அரோரா கூறினார்.
ஸ்க்வாட்ஸ் எவ்வாறு உதவுகிறது?
ஸ்க்வாட்ஸ் ஒரு வகையான எதிர்ப்புப் பயிற்சி (resistance exercise) என்பதால், இது கீழ் உடலில் உள்ள பெரிய தசை குழுக்களை செயல்படுத்துகிறது. இவை குளுக்கோஸ் வளர்சிதை மாற்றத்திற்கு முக்கியமானவை என்று ஹைதராபாத், எல்.பி. நகரில் உள்ள க்ளீனெகில்ஸ் அவேர் மருத்துவமனையின் தலைமை உணவியல் நிபுணர் டாக்டர் பிராலி ஸ்வேதா தெரிவித்தார்.
நாள் முழுவதும் ஸ்குவாட்ஸ் போன்ற வழக்கமான அசைவு இடைவெளிகளை இணைப்பது இரத்த சர்க்கரை அளவைக் கட்டுப்படுத்த உதவும். "மேலும், நீங்கள் இன்னும் பயனுள்ள முடிவுகளை விரும்பினால், இந்த அசைவு இடைவெளிகளை வழக்கமான நடைப்பயணம் அல்லது வேறு எந்த வகையான ஏரோபிக் உடற்பயிற்சியுடன் இணைப்பது, குறிப்பாக இரத்த குளுக்கோஸ் அளவை நிர்வகிப்பதில் சக்திவாய்ந்த நன்மைகளைத் தரும்," என்று டாக்டர் அரோரா கூறினார்.
ஒருங்கிணைந்த அணுகுமுறை சிறந்தது:
நடைப்பயணத்தின் நன்மைகள் பல ஆய்வுகள் மூலம் நிறுவப்பட்டிருந்தாலும், இரத்த சர்க்கரை கட்டுப்பாட்டிற்கான ஒரு கருவியாக ஸ்குவாட்ஸ் குறித்த சான்றுகள் இன்னும் வளர்ந்து வருகின்றன என்று அவர் கூறினார். "ஸ்க்வாட்ஸ் மற்றும் நடைப்பயணத்தின் செயல்திறன், ஒட்டுமொத்த உடற்தகுதி, உணவுமுறை, உடல்நல நிலை மற்றும் வாழ்க்கை முறை போன்ற தனிப்பட்ட காரணிகளைப் பொறுத்து மாறுபடும்," என்று டாக்டர் அரோரா கூறினார்.
இருப்பினும், இரண்டு முறைகளுக்கும் அவற்றின் நன்மைகள் உள்ளன, மேலும் சிறந்த அணுகுமுறை ஒரு கலவையாகும்: தினசரி 30 நிமிட நடைப்பயணம் மற்றும் ஸ்குவாட்ஸ் போன்ற குறுகிய செயல்பாட்டு இடைவெளிகள் என்று டாக்டர் பிராலி தெரிவித்தார். "நீரிழிவு நோய் உள்ளவர்கள் அல்லது ஆபத்தில் உள்ளவர்களுக்கு, இந்த அணுகுமுறை நிலையான குளுக்கோஸ் அளவை பராமரிக்கவும், இருதய மற்றும் தசை ஆரோக்கியத்தை ஆதரிக்கவும் உதவுகிறது. புதிய வழக்கத்தைத் தொடங்குவதற்கு முன் எப்போதும் உங்கள் மருத்துவரை அணுகவும்," என்று டாக்டர் பிராலி கூறினார்.
Read in English: Are 10 squats every 45 minutes more effective than a 30 minute daily walk to control blood sugar levels?
/indian-express-tamil/media/agency_attachments/33Ho9XHwZawzDekwDLnu.png)
Follow Us/indian-express-tamil/media/media_files/2025/06/04/Lp53tdRW7TuNc1QEBuvk.jpg)