கவலை, பதட்டத்தைக் குறைக்க... 'ஹேண்ட் ஸ்கேட்டிங்' முறையா? நிபுணர்கள் கருத்து என்ன?

பதட்டம் என்பது பலருக்கும் பெரும் சங்கடத்தை ஏற்படுத்தும் உணர்வு. குறிப்பாக, சிலருக்கு ஏற்படும் பதட்டத் தாக்குதல்கள் (anxiety attacks) பல மணிநேரம் நீடிக்கக்கூடும். இத்தகைய சூழலில் இணையத்தில் வைரலாக பரவிவரும் 'ஹேண்ட் ஸ்கேட்டிங்' (HandSkating) முறை, சில நொடிகளில் பதட்டத்தைப் போக்க உதவும் என்று கூறப்படுகிறது.

'ஹேண்ட் ஸ்கேட்டிங்' என்றால் என்ன?

'ஹேண்ட் ஸ்கேட்டிங்' என்பது, உங்கள் கையைப் பயன்படுத்தி கற்பனையான வடிவங்களை மனதுடன் ஒன்றி, விழிப்புணர்வுடன் வரைவது (tracing imaginary patterns with mindful movement). இருதரப்பு தூண்டுதல் (bilateral stimulation) என்ற கொள்கைகளில் இந்த நுட்பம் வேரூன்றியுள்ளது. இது கண்களின் இயக்கத்தின் உணர்திறன் நீக்கம் மற்றும் மறு செயலாக்கம் (EMDR) போன்ற சிகிச்சைகளில் பயன்படுத்தப்படும் நுட்பத்தை ஒத்திருக்கிறது.

இந்த செய்தியை ஆங்கிலத்தில் படிக்க

அறிவியல் பூர்வமான ஆதாரம் உள்ளதா?

எம் பவர் (Mpower) நிறுவனத்தின் உளவியலாளர் ஜுஹி பாண்டே இதுகுறித்து கருத்துத் தெரிவித்தார். அவர் கூறுகையில், "பதட்டத்தை குறைக்க உதவும் முறை என்று நிரூபிக்க போதுமான அறிவியல் ஆதாரங்கள் இதற்கு இல்லை. இருப்பினும், மைண்ட்ஃபுல்னஸ் (Mindfulness - கவனத்துடன் செயல்படும் முறை) பற்றி நாம் பேசும்போது, நாள்பட்ட மற்றும் கடுமையான பதட்டம் இரண்டையும் குறைக்க இது உதவும் என்று ஆய்வுகள் காட்டுகின்றன" என்றார்.

இது எப்படி வேலை செய்கிறது?

'ஹேண்ட் ஸ்கேட்டிங்' முறை மூளையின் இரு அரைக்கோளங்களையும் (both hemispheres) ஈடுபடுத்த உதவுகிறது. மன அமைதி மேம்படுத்துகிறது மற்றும் பதட்டம் குறைக்கிறது. இது உங்களை நிகழ்காலத்துடன் திறம்பட இணைத்து, பாராசிம்பதெடிக் நரம்பு மண்டலத்தைத் (parasympathetic nervous system) தூண்ட உதவுகிறது. இதன் விளைவாக, உடல் ஓய்வு நிலைக்கு வந்து, மன அழுத்தத்தைக் குறைக்கிறது.

பதட்டத்தைக் குறைப்பதற்கான இந்த புதிய முறைக்கு நேரடி அறிவியல் ஆதாரம் குறைவாக இருந்தாலும், மைண்ட்ஃபுல்னஸ் மற்றும் மூளையின் இருபக்கத் தூண்டுதல் கொள்கைகளின் அடிப்படையில் இது சிலருக்குப் பலனளிக்கக்கூடும் என்று கருதப்படுகிறது. இருப்பினும், கடுமையான பதட்டத் தாக்குதல்கள் அல்லது நாள்பட்ட பதட்டத்தால் பாதிக்கப்பட்டவர்கள், முறையான மருத்துவரை அல்லது மனநல நிபுணரை அணுகி சிகிச்சை பெறுவது அவசியம்.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.