புற்றுநோய் முடிவு: கீமோ, அறுவை சிகிச்சை தேவையில்லை - நம்பிக்கை தரும் அமெரிக்க ஆய்வு

அறுவை சிகிச்சை தேவையில்லை, கீமோதெரபி அல்லது கதிர்வீச்சின் பக்க விளைவுகள் இல்லை, சிகிச்சைக்குப் பின் ஆரோக்கியமான குழந்தை பிறக்கும் வாய்ப்பு அமெரிக்காவின் மெமோரியல் ஸ்லோன் கெட்டரிங் புற்றுநோய் மையத்தில் நடைபெற்ற இரண்டாம் கட்ட மருத்துவ பரிசோதனையின் ஒரு பகுதியாக, ஒரு புதிய நோயெதிர்ப்பு சிகிச்சையைப் பெற்ற மலக்குடல் புற்றுநோயாளிகளின் அனுபவம் பற்றி பார்ப்போம். 

மொத்த சோதனை பங்கேற்பாளர்களில் கிட்டத்தட்ட 80% பேர் மற்றும் அனைத்து மலக்குடல் புற்றுநோயாளிகளும் டோஸ்டார்லிமாப் என்ற நோய் எதிர்ப்பு மருந்துடன் சிறந்த முடிவுகளைக் காட்டினர், மேலும் அவர்கள் அறுவை சிகிச்சை, கீமோதெரபி அல்லது கதிர்வீச்சுக்கு உட்படுத்த வேண்டியதில்லை.

புற்றுநோயாளிகளுக்கு, குறிப்பாக மலக்குடல் புற்றுநோயாளிகளுக்கு, வழக்கமான சிகிச்சைகள் சிறுநீர் அடங்காமை, மலக்குடல் பை (மாற்று திறப்பு மூலம் மலம் வெளியேற்றுவதற்கான பை), மற்றும் மலட்டுத்தன்மை போன்ற வாழ்க்கை மாற்றும் விளைவுகளுக்கு வழிவகுக்கும் என்பதைக் கருத்தில் கொள்ளும்போது இது மிகவும் முக்கியமானது. 117 சோதனை பங்கேற்பாளர்களில் மூன்று பேர் கருத்தரித்து குழந்தைகளைப் பெற்றெடுத்தனர்.

இந்த ஆய்வு என்ன கண்டறிந்தது?

இந்த ஆய்வில் ஒரு குறிப்பிட்ட மரபணு மாற்றத்தைக் கொண்ட புற்றுநோயாளிகள் 117 பேர் சேர்க்கப்பட்டனர். 49 பேர் மலக்குடல் புற்றுநோயாளிகள் மற்றும் 54 பேர் உணவுக்குழாய், வயிறு, பெருங்குடல் மற்றும் புரோஸ்டேட் போன்ற பிற திடமான புற்றுநோயாளிகள் அடங்குவர்.

மலக்குடல் புற்றுநோய் அல்லாத பிற புற்றுநோயாளிகள் 54 பேரில், 35 பேர் சிகிச்சைக்குப் பிறகு புற்றுநோய் இல்லாதவர்களாகக் கண்டறியப்பட்டனர். மேலும், இரண்டு நோயாளிகளுக்கு மட்டுமே அறுவை சிகிச்சை தேவைப்பட்டது.

அறுவை சிகிச்சை தேவைப்பட்ட நோயாளிகளிடம் கூட, கட்டி சுருங்கியது மற்றும் சில சமயங்களில் குறைந்த நிலையிலும் இருந்தது என்று ஆராய்ச்சியாளர்கள் தெரிவித்தனர். மருந்தின் பதில் நீண்ட காலம் நீடித்தது, இரண்டு ஆண்டுகளில் மீண்டும் வராத உயிர்வாழ்வு 85% ஆக இருந்தது.

இந்த செய்தியை ஆங்கிலத்தில் படிக்க க்ளிக் செய்யவும்.

மலக்குடல் புற்றுநோயாளிகளைப் பொறுத்தவரை, இந்த மருந்து ஒரு அற்புதமாக வேலை செய்தது. அனைத்து 49 நோயாளிகளும் சிகிச்சைக்குப் பிறகு புற்றுநோய் இல்லாதவர்களாகக் கண்டறியப்பட்டனர். எந்த நோயாளிக்கும் அறுவை சிகிச்சை தேவைப்படவில்லை. இந்த குழுவில் இரண்டு ஆண்டுகளில் மீண்டும் வராத உயிர்வாழ்வு இன்னும் அதிகமாக 96% ஆக இருந்தது.

இரு குழுக்களிலிருந்தும் மொத்த சோதனை பங்கேற்பாளர்களில், ஐந்து பேருக்கு மட்டுமே புற்றுநோய் மீண்டும் வந்தது.

மரபணு மாற்றம் என்ன, சிகிச்சை எவ்வாறு செயல்படுகிறது?

இந்த சிகிச்சை அனைத்து வகையான மலக்குடல் அல்லது பிற திடமான கட்டிகளின் புற்றுநோய்களுக்கும் பொருந்தாது. இது "மிஸ்மேட்ச் ரிப்பேர் குறைபாடுள்ள" புற்றுநோயாளிகளுக்கு மட்டுமே வேலை செய்யும். மிஸ்மேட்ச் ரிப்பேர் என்பது ஒரு செல்லிலிருந்து மற்றொன்றுக்கு மரபணுத் தரவை நகலெடுக்கும்போது ஏற்படும் பிழைகளை சரிபார்க்க உதவும் ஒரு செயல்முறையாகும்.

மிஸ்மேட்ச் ரிப்பேர் குறைபாடு சரி செய்யப்படாத பிழைகள், அதிக எண்ணிக்கையிலான மரபணு மாற்றங்கள் மற்றும் புற்றுநோய்களுக்கு வழிவகுக்கிறது. மலக்குடல் புற்றுநோய்கள் மற்றும் திடமான கட்டிகளின் புற்றுநோய்களில் 10% வரை மிஸ்மேட்ச் ரிப்பேர் குறைபாடு இருக்கலாம்.

நோய் எதிர்ப்பு சிகிச்சைகள் செக்பாயிண்ட் எனப்படும் புரதத்தை ஒழுங்குபடுத்தலாம். இது பல்வேறு நோய் எதிர்ப்பு செல்களின் பதிலைத் தீர்மானிக்கிறது. டோஸ்டார்லிமாப் PD-1 - அல்லது புரோகிராம்டு செல் டெத்-1 - என்ற புரதத்தில் செயல்பட்டு அதன் செயல்பாட்டைத் தடுக்கிறது. இந்த புரதம், மற்றவற்றுடன், நோய் எதிர்ப்பு டி-செல்களின் செயல்பாட்டை அடக்குகிறது. எனவே இந்த மருந்து நோய் எதிர்ப்பு அமைப்பு டி செல்களுக்கு போடும் பிரேக்கை தடுக்கிறது.

இந்த கண்டுபிடிப்புகள் ஏன் முக்கியமானவை?

இது போன்ற சிகிச்சைகள் புற்றுநோய் செல்கள் தவிர மற்ற செல்களுக்கு குறைந்தபட்ச சேதத்தை உறுதி செய்கின்றன மற்றும் தனிப்பயனாக்கப்பட்ட சிகிச்சையை வழங்குகின்றன.

முக்கியமாக, இந்த ஆய்வு குறிப்பிட்ட மரபணு மாற்றங்களைக் கொண்ட புற்றுநோய்களில், நோய் எதிர்ப்பு சிகிச்சை மட்டுமே நோயாளிகளுக்கு சிகிச்சையளிக்க போதுமானதாக இருக்கலாம் என்பதைக் காட்டுகிறது. தற்போது, இந்த நோய் எதிர்ப்பு மருந்து மற்ற சிகிச்சைகளுடன் இணைந்து பயன்படுத்தப்படுகிறது. இது மற்ற உறுப்பு அமைப்புகளுக்கு ஏற்படும் சேதம் மற்றும் சிக்கல்களை குறைக்கும்.

இந்த மருந்து இந்தியாவில் ஏற்கனவே கிடைக்கிறது மற்றும் பயன்பாட்டில் உள்ளது. மற்ற சிகிச்சைகளுடன் இணைந்து இருந்தாலும் விலை பெரும்பாலானவர்களுக்கு எட்டாக்கனியாக உள்ளது. மருந்தின் ஒவ்வொரு டோஸும்  11,000 டாலர் வரை செலவாகலாம்.