பொருத்தமான ரெயின்கோட் தேடி குழம்பாதீங்க... 9 வகை இருக்கு; பெஸ்ட் எதுன்னு நீங்களே பாருங்க!

மழைக்காலம் வந்துவிட்டால் நம் அன்றாட வாழ்க்கையில் முக்கிய பங்கு வகிப்பது ரெயின்கோட்டுதான். மழையிலிருந்து பாதுகாப்பதுடன், சுகமாகவும் வறண்ட நிலையில் இருக்கவும் உதவுகிறது. ஆனால் அனைவரும் ஒரே வகையான ரெயின்கோட்டை பயன்படுத்த முடியாது. ஒருவரின் தேவைக்கேற்பவும், வானிலை நிலைக்கேற்பவும் ரெயின்கோட்டை தேர்ந்தெடுக்க வேண்டும்.

மழையின் தன்மை — கனமழையா, லேசான மழையா என்பதையும், உங்களது பயன்பாட்டையும் பொருத்து ரெயின்கோட் மாறுபடும். நிபுணர்கள் கூறுவதாவது, கனமழைக்கு பாலியஸ்டர் ரெயின்கோட் சிறந்தது; இது நீர் புகாததும், நீடித்து உழைக்கும் தன்மையுடையதுமானது. அதேபோல் லேசான மழைக்கு நைலான் ரெயின்கோட் போதுமானது, ஏனெனில் இது இலகுவானது, மென்மையானது மற்றும் எடுத்துச் செல்ல எளிதானது.

ரெயின்கோட்டை வாங்கும்போது ஜிப், பட்டன்கள் சரியாக உள்ளனவா எனவும், போதுமான அசைவு சுதந்திரம் (Free Movement) உள்ளதா எனவும் சரிபார்க்க வேண்டும். மேலும், டபுள் லேயர் (Double Layer) ரெயின்கோட்டின் தையல் பகுதியில் வாட்டர் டேப் சீல் (Waterproof Tape Seal) உள்ளதா என்பதை உறுதிப்படுத்த வேண்டும். இல்லையெனில் தையல் வழியாக தண்ணீர் ஊறக்கூடும்.

ரெயின்கோட்டின் முக்கிய வகைகள்

1. அனைத்து வானிலை ரெயின்கோட்கள் (All-weather raincoats):
இந்த ரெயின்கோட்டுகளில் நீக்கக்கூடிய புறணி (lining) இருக்கும். வெவ்வேறு வானிலைகளுக்கு ஏற்ப மாற்றிக் கொள்ளலாம். இதனால் எந்த பருவத்திலும் பயன்படுத்த ஏற்றது.

2. மெல்லிய ரெயின்கோட்கள் (Lightweight raincoats):
இவை எடை குறைவாகவும், பயணங்களுக்கு ஏற்றதாகவும் இருக்கும். பெரும்பாலும் விண்ட்சீட்டர், மெல்லிய ட்ரெஞ்ச் கோட், மழை ஜாக்கெட் ஆகிய வடிவங்களில் கிடைக்கும்.

3. மடிக்கக்கூடிய ரெயின்கோட்கள் (Foldable raincoats):
பயணத்தின்போது பையில் எளிதாக மடித்து எடுத்துச் செல்லலாம். திடீர் மழைக்கு தயாராக இருக்க விரும்புபவர்களுக்கு சிறந்த தேர்வு. சில மாடல்களில் பெரிய பாக்கெட்டுகளும் இணைக்கப்பட்டிருக்கும்.

4. வினைல் ரெயின்கோட்கள் (Vinyl raincoats):
பளபளப்பான தோற்றம் கொண்ட இவை பாலிவினைல் குளோரைடு (PVC) மூலம் தயாரிக்கப்படுகின்றன. நீர்ப்புகாத தன்மை அதிகம். ஆனால் அவற்றை அவ்வப்போது கழுவி பராமரிக்க வேண்டும்.

5. ட்ரெஞ்ச் கோட்கள் (Trench coats):
இலகுரக பருத்தி அல்லது பாலியஸ்டர் துணியால் செய்யப்பட்ட இவை ஆண்களுக்கும் பெண்களுக்கும் பொருந்தும் வகையில் வடிவமைக்கப்படுகின்றன. ஸ்டைலிஷ் தோற்றத்துடன் மழையிலிருந்து பாதுகாக்கும்.

6. பொன்சோ ரெயின்கோட்கள் (Poncho raincoats):
தலைக்கு மேல் போட்டுக்கொள்ளும் தளர்வான வடிவமைப்பு கொண்ட இவை மழை, குளிர் மற்றும் பனிப்பொழிவிலிருந்தும் பாதுகாப்பை வழங்கும். சுலபமாக அணியவும், எடுத்துச் செல்லவும் எளிதானது.

7. PVC ரெயின்கோட்கள்:
மலிவானவையும், நீடித்த பயன்பாட்டிற்கும் ஏற்றவையும். இவை பிளாஸ்டிக் பொருட்களால் செய்யப்பட்டதால் முழுமையான நீர்ப்புகாத தன்மை கொண்டவை.

8. தொழில்துறை ரெயின்கோட்கள் (Industrial raincoats):
கட்டுமானம், சுரங்கம், கடுமையான வானிலையில் பணிபுரிபவர்கள் பயன்படுத்தும் ரெயின்கோட்கள். இவை பிவிசி அல்லது ரப்பர் பூசப்பட்ட பாலியஸ்டர் துணிகளால் தயாரிக்கப்படுகின்றன.

9. பிளாஸ்டிக் ரெயின்கோட்கள்:
மிகவும் இலகுவானதும் மலிவானதும். பொன்சோ வடிவத்திலும் கிடைக்கும். பொதுவாக தற்காலிக பயன்பாட்டிற்கு உகந்தது.

மழைக்காலத்தில் ரெயின்கோட் என்பது வெறும் ஆடையல்ல — அது பாதுகாப்பும், நிம்மதியும் தரும் ஒரு அவசியமான துணை. உங்கள் தேவைக்கும், மழையின் தன்மைக்கும் ஏற்ற ரெயின்கோட்டை தேர்ந்தெடுத்தால் மட்டுமே நீண்டநாள் பாதுகாப்பும் வசதியும் கிடைக்கும்.