450க்கும் மேற்பட்ட அரங்குகள், வெளிநாட்டு வகை ஆடுகள்: கோவையில் களைகட்டிய வேளாண் கண்காட்சி

கோவை கொடிசியா தொழிற்கூட கண்காட்சி வளாகத்தில் 22வது சர்வதேச வேளாண் கண்காட்சி இன்று தொடங்கியது. சர்வதேச அளவில் நடைபெறும் இந்த கண்காட்சி வரும் 15ஆம் தேதி வரை 5 நாட்கள் நடைபெறுகிறது.

வழக்கமாக நான்கு நாட்கள் நடைபெறும் இந்த கண்காட்சி இந்த ஆண்டு ஐந்து நாட்களாக மாற்றம் செய்யப்பட்டுள்ளது.

இதில் 450க்கும் மேற்பட்ட அரங்குகள் அமைக்கப்பட்டு வேளாண் விவசாய பொருட்கள் காட்சிபடுத்தப்பட்டுள்ளன.

இந்த கண்காட்சியில் பல்வேறு மாவட்டத்தைச் சேர்ந்த வேளாண் நிறுவனங்களும், மலேசியா, சிங்கப்பூர், சீனா, தென்கொரியா உட்பட பல்வேறு வெளிநாட்டு நிறுவனங்களும் அவர்களது கண்டுபிடிப்புகளை காட்சிப்படுத்தி உள்ளனர்.

இந்தியாவை சேர்ந்த நாட்டு மாடுகளும் வெளிநாட்டு வகை ஆடுகளும் இந்த கண்காட்சியில் காட்சிப்படுத்தப்பட்டுள்ளன.

மேலும் பல்வேறு விதைகள், இயற்கை குளிரூட்டிகளும் காட்சிப்படுத்தப்பட்டுள்ளது. அதுமட்டுமின்றி தோட்டக்கலை சார்பில் நர்சரிகளும் அமைக்கப்பட்டு பல்வேறு ரக செடிகள், பூச்செடிகள் ஆகியவை விற்பனை நடைபெறுகிறது. செய்தி: பி.ரஹ்மான், கோவை மாவட்டம்