கண்ட கிரீம் எதுக்கு? தயிர் இருக்கு! வீட்டுலேயே க்ளோயிங் முகம் பெற இப்படி அப்ளை பண்ணுங்க- தோல் மருத்துவர் டிப்ஸ்

சரும அழகை மேம்படுத்த கண்ட கண்ட க்ரீம்களைப் பூசுவதை விட்டுவிட்டு, உங்கள் வீட்டிலேயே இருக்கும் பொருட்களை வைத்து அழகைப் பராமரிப்பது எப்படி என்று பலரும் தேடுகிறார்கள். அதிலும், நம் சமையலறையில் இருக்கும் தயிர், சருமப் பராமரிப்பில் ஒரு மந்திரப் பொருள் போல செயல்படும் என்பது உங்களுக்குத் தெரியுமா?

குஜராத், சூரத்தைச் சேர்ந்த பிரபல தோல் சிகிச்சை நிபுணர் டாக்டர் ஆஞ்சல் எம்.டி., தயிரின் அற்புதப் பயன்களைப் பற்றியும், அதைக் கொண்டு வீட்டிலேயே ஃபேஸ் மாஸ்க் தயாரிக்கும் முறைகளைப் பற்றியும் இங்கே விரிவாக விளக்குகிறார்.

தயிர் - சருமத்தின் சூப்பர்ஸ்டார்!

தயிர் என்பது வெறும் உணவுப் பொருள் மட்டுமல்ல, அது உங்கள் சருமத்திற்கு ஒரு அருமருந்து. இதில் நிறைந்துள்ள லாக்டிக் அமிலம் (Lactic Acid), சருமத்திற்கு ஆழமான ஈரப்பதத்தை அளித்து, மிருதுவாக்குகிறது. இதனால், உங்கள் சருமம் இயற்கையாகவே பளபளப்பாகவும், பிரகாசமாகவும் மாறும். ஆய்வுகளும் தயிரை அடிப்படையாகக் கொண்ட ஃபேஸ் மாஸ்க்குகள் சருமத்தின் ஈரப்பதம் மற்றும் நெகிழ்ச்சித்தன்மையை கணிசமாக மேம்படுத்துவதாகக் கண்டறிந்துள்ளன.

பிரபல மருத்துவர் பரிந்துரைக்கும் தயிர் ஃபேஸ் மாஸ்க்!

டாக்டர் ஆஞ்சல் பரிந்துரைக்கும் சில அற்புதமான தயிர் ஃபேஸ் மாஸ்க் செய்முறைகள் இங்கே கொடுக்கப்பட்டுள்ளன.

தயிர் மற்றும் வெள்ளரி மாஸ்க்: ஒரு வெள்ளரிக்காயைத் துருவி, அதனுடன் தயிர் சேர்த்து கெட்டியான கலவையாகத் தயார் செய்யவும். இதை முகத்தில் பூச, வெள்ளரி சருமத்திற்கு குளிர்ச்சியையும் புத்துணர்வையும் அளிக்கும்.

தயிர் மற்றும் மஞ்சள் மாஸ்க்: ஒரு கிண்ணம் தயிருடன் அரை டீஸ்பூன் மஞ்சள் தூள் சேர்த்து நன்றாகக் கலக்கவும். இதை முகத்தில் பூசுவது, சரும நிறத்தை மேம்படுத்தி கறைகளை நீக்க உதவும்.

தயிர் மற்றும் தேன் மாஸ்க் (பருக்கள் உள்ளவர்களுக்கு): குறைந்த கொழுப்புள்ள தயிருடன் ஒரு டீஸ்பூன் தேன் சேர்த்து நன்றாகக் கலக்கவும். தேனில் உள்ள ஆன்டிபாக்டீரியல் பண்புகள் பருக்கள் வராமல் தடுக்க உதவும்.

தயிர் மற்றும் பப்பாளி மாஸ்க்: நன்கு பழுத்த பப்பாளியை மசித்து, தயிருடன் சேர்த்து பசை போல கலக்கவும். பப்பாளியில் உள்ள என்சைம்கள் இறந்த செல்களை நீக்கி, சருமத்தை மிருதுவாக்கும்.

முக்கிய குறிப்புகள்!

எந்த மாஸ்க்கைப் பயன்படுத்தினாலும், அதை குளிர்ந்த நீரால் நன்றாகக் கழுவவும்.

கழுவிய பிறகு, ஒரு லேசான மாய்ஸ்சரைசரைப் பயன்படுத்த மறக்காதீர்கள்.

எலுமிச்சை வேண்டாம்: தயிருடன் எலுமிச்சை சாற்றைச் சேர்ப்பதைத் தவிர்க்கவும். இது சருமத்தில் எரிச்சலை ஏற்படுத்தலாம்.

கடலை மாவு: கடலை மாவு மற்றும் தயிர் மாஸ்க் பிரபலமானது என்றாலும், வறண்ட சருமம் உள்ளவர்கள் இதைத் தவிர்ப்பது நல்லது. இது சருமத்தை மேலும் வறண்டு போகச் செய்யலாம்.

உங்கள் சருமத்திற்கு இயற்கையான பளபளப்பைப் பெற, இந்த எளிய வீட்டு வைத்தியங்களை முயற்சித்துப் பாருங்கள்.