ஒரு கைப்பிடி கறிவேப்பிலை கூட இந்த பொருள் மட்டும் போதும்; உங்கள் முடி உறுதியாக இருக்கும்!

தற்போதைய சூழலில் முடி வளர்ச்சியை அதிகரிக்கச் செய்யும் ஷம்பூ உள்ளிட்ட பொருட்களின் விற்பனை நாளுக்கு நாள் அதிகரித்துக் கொண்டே செல்கிறது. நிறைய இளம் தலைமுறையினருக்கு முடி உதிர்வு பாதிப்பு ஏற்படுவதன் காரணமாக இவற்றின் விற்பனை கணிசமாக உயர்ந்து வருகிறது.

ஏனெனில், இன்றைய காலகட்டத்தில் ஐ.டி நிறுவனங்கள் உள்ளிட்ட பல்வேறு துறைகளில், இரவு முழுவதும் விழித்திருந்த பணி செய்ய வேண்டிய கட்டாயம் நிறைய பேருக்கு இருக்கிறது. இதனால் ஏற்படும் வாழ்க்கை முறை மாற்றம், உணவு முறை மாற்றம் போன்ற காரணங்களால் அதிகப்படியான முடி உதிர்வு ஏற்படுகிறது.

முடி வளர்ச்சியை அதிகரிக்க சத்தான உணவுகளை சாப்பிட வேண்டியது அவசியம். அதே நேரத்தில் தலை முடி பராமரிப்பிற்கு என்று தனியாக நேரம் ஒதுக்க வேண்டும். முடியை சீராக பராமரிக்க சில ஹேர்பேக்குகள் பயன்படுத்துவதன் மூலம் சுத்தமாக வைத்திருப்பதுடன், அவற்றை உறுதியாக வளரச் செய்ய முடியும்.

இதற்காக அதிக செலவு இல்லாமல் நம் வீட்டில் இருக்கும் இரண்டு பொருட்களை மட்டும் பயன்படுத்தி ஒரு சிம்பிளான ஹேர்பேக்கை தயாரித்துக் கொள்ள முடியும். இதனை உபயோகப்படுத்துவதால், நம் முடி அடர்த்தியாக வளரும் என்று வல்லுநர்கள் கூறுகின்றனர்.

அதன்படி, ஒரு கைப்பிடி அளவிற்கு கறிவேப்பிலை மற்றும் 5 அல்லது 6 சின்ன வெங்காயத்தை சிறிது தண்ணீர் சேர்த்து பசை பதத்திற்கு அரைக்க வேண்டும். இவ்வாறு செய்தால் நமக்கு தேவையான ஹேர்பேக் தயாராகி விடும். இதனை தலையில் தேய்த்து விட்டு சுமார் 20 நிமிடங்கள் கழித்து குளித்து விடலாம்.

இந்த ஹேர்பேக்கை நாம் தலைக்கு குளிக்கும் தினங்களில் தொடர்ச்சியாக பயன்படுத்தி வந்தால், முடியின் வளர்ச்சி அடர்த்தியாகவும், உறுதியாகவும் இருக்கும். மேலும், இதில் சின்ன வெங்காயம் சேர்த்திருப்பதால் பொடுகு பிரச்சனைக்கும் தீர்வாக அமையும்.

நன்றி - Spicy Samayals Youtube Channel

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.