வெறும் 3 வாரத்தில் பொடுகுக்கு டாட்டா சொல்லுங்க: ஆயுர்வேத நிபுணர் பரிந்துரைக்கும் எளிய தீர்வு

தலையை சொறிந்து சோர்ந்து போக வைக்கும் பொடுகு பிரச்சனைக்கு ஒரு நிரந்தர தீர்வு கிடைக்காதா என ஏங்குபவர்கள் பலர். குளிரும், வறண்ட காலநிலையும் இந்த பொடுகுத் தொல்லையை இன்னும் அதிகரிக்கும். பொடுகுத் தொல்லை உள்ளவர்களுக்காக, இதோ ஒரு சுலபமான, விரைவான, மற்றும் இயற்கையான வழியை ஆயுர்வேத நிபுணர் டாக்டர் தீக்‌ஷா பவ்சார் சாவாலியா கூறுகிறார்.

பொடுகுக்கு முக்கிய காரணம் மலாசீசியா குளோபோசா (malassezia globosa) என்ற ஒரு வகை பூஞ்சை தான். இது தலையில் உள்ள அதிகப்படியான எண்ணெயை உடைத்து, தலையின் தோலை எரிச்சலூட்டுகிறது. இந்த எரிச்சலால் தான் பொடுகு ஏற்படுகிறது. இந்தப் பிரச்சனையிலிருந்து விடுபடவும், முடியின் வேர்களை வலுப்படுத்தவும், முடி உதிர்வதைக் குறைக்கவும் ஒரு எளிய ஹேர் மாஸ்க் இங்கே. இந்த மாஸ்க்கை வாரத்திற்கு இரண்டு முறை, மூன்று வாரங்களுக்குப் பயன்படுத்தினால், பொடுகு இல்லாத, மென்மையான மற்றும் ஆரோக்கியமான கூந்தல் கிடைக்கும். 

இந்த மாஸ்க்கை வீட்டிலேயே எளிதாகத் தயாரிக்கலாம். தேவையான பொருட்கள் இங்கே:

தேவையான பொருட்கள்:

1 தேக்கரண்டி கெட்டித் தயிர் 

5-7 நசுக்கிய கறிவேப்பிலை

2 அங்குல நசுக்கிய இஞ்சித் துண்டு

View this post on Instagram

A post shared by Dr Dixa Bhavsar Savaliya | Thyroid, Fertility, Hormones (@drdixa_healingsouls)

தயாரிப்பு முறை:

ஒரு கிண்ணத்தில் இந்த மூன்று பொருட்களையும் ஒன்றாகக் கலக்கவும். இதை 30 நிமிடங்கள் தனியே வைத்திருக்கவும். பின்னர், இந்த கலவையை தலையின் வேர்க்கால்களில் நன்கு தேய்த்துப் பூசவும்.

குறிப்பு: உங்களிடம் ஃப்ரெஷ் கறிவேப்பிலை அல்லது இஞ்சி இல்லை என்றால், அதற்குப் பதிலாக 1 தேக்கரண்டி கறிவேப்பிலை பொடி மற்றும் 1 தேக்கரண்டி சுக்குப்பொடியை பயன்படுத்தலாம். இந்த மூன்று பொருட்களும் ஒன்றாகச் சேரும்போது, அவை பொடுகு மற்றும் அரிப்புள்ள தலைக்கு ஒரு அருமையான தீர்வாக அமையும்.

இந்த மாஸ்க்கின் அற்புதப் பயன்கள்:

தயிர்: தயிரில் உள்ள ஊட்டச்சத்துக்கள், குறிப்பாக புரதம், முடி வளர்ச்சிக்குத் தேவையான ஆற்றலை அளிக்கிறது. இது தலைமுடிக்கு ஒரு இயற்கையான கண்டிஷனராகவும் செயல்படுகிறது. இது தலையை ஈரப்பதமாக வைத்திருக்க உதவுகிறது, இதனால் முடி உதிர்வு குறைந்து, முடிக்கு ஒரு பளபளப்பைக் கொடுக்கிறது. தயிரின் அழற்சி எதிர்ப்புப் பண்புகள் தலையில் ஏற்படும் அரிப்பையும் தணிக்கிறது.

கறிவேப்பிலை: கறிவேப்பிலையில் உள்ள பூஞ்சை எதிர்ப்புப் பண்புகள் (anti-fungal properties) பொடுகு மற்றும் தலையில் ஏற்படும் அரிப்பைக் குறைக்க உதவுகிறது.

இஞ்சி: இஞ்சியில் அழற்சி எதிர்ப்பு, கிருமிநாசினி மற்றும் பாக்டீரியா எதிர்ப்புப் பண்புகள் உள்ளன. இது தலையில் சேரும் இறந்த செல்களைப் போக்கி, பொடுகு மற்றும் முடி உதிர்வதைத் தடுக்க உதவுகிறது.

இந்த ஆயுர்வேத ஹேர் மாஸ்க்கை முயற்சி செய்து பார்த்து, பொடுகுத் தொல்லையிலிருந்து விடைபெறுங்கள்!