நகத்தில் இப்படி கோடு; மெலிந்த தோல்... என்ன குறைபாடு தெரியுமா? விளக்கும் டாக்டர் கார்த்திகேயன்

சிலரது நகத்தில் நீளமாக கோடுகள் இருக்கும். இதேபோன்று, சிலரது சருமமும் மெலிதாக காணப்படும். இவை இரண்டும் ஆரோக்கியம் குறைபாடு காரணமாக தான் இருக்கிறது என்று மருத்துவர் கார்த்திகேயன் தெரிவித்துள்ளார். அதற்கான விளக்கத்தையும் அவர் குறிப்பிட்டுள்ளார்.

நம் உடலில் கொலஜன் என்கிற முக்கியமான சத்து இருக்கிறது. நம் உடலின் தசைகள், சருமம், எலும்புகள், இரத்தக் குழாய்கள் மற்றும் செரிமான உறுப்புகள் உள்ளிட்டவற்றில் இருக்கக் கூடிய ஒரு வகையான ப்ரோட்டீன் தான் கொலஜன் என்று அறியப்படுகிறது. இது நம் எலும்பு மற்றும் சருமத்தை இறுக்கமாகவும், வலிமையாகவும் வைத்திருக்க உதவுகிறது.

மேலும், மூட்டுகளில் ஒரு விதமான பசை தன்மையையும் கொலஜன் கொடுக்கிறது. எனவே, கொலஜன் குறைபாடு இருந்தால் எதிர்காலத்தில் எலும்பு தொடர்பான பாதிப்புகள் வருவதற்கு வாய்ப்பு இருக்கிறது. வயதானவர்களுக்கு இந்த கொலஜன் உற்பத்தி இயற்கையாகவே குறையும். 

அதிகமாக இனிப்பு சாப்பிடுவது, புகைப்பிடித்தல், வெயிலில் அதிகமாக சுற்றுவது போன்ற காரணங்களும் கொலஜன் உற்பத்தியை குறைக்கும். இதனை தடுப்பதற்கு சில வாழ்க்கை முறை மாற்றம் மற்றும் உணவு முறை மாற்றத்தை பின்பற்ற வேண்டும் என்று மருத்துவர் கார்த்திகேயன் அறிவுறுத்துகிறார்.

அதன்படி, வைட்டமின் சி மற்றும் புரதம் நிறைந்த உணவுகளை கட்டாயம் சாப்பிட வேண்டும். முட்டை மற்றும் பழங்களான எலுமிச்சை, ஆரஞ்சு, ஆப்பிள் போன்றவற்றை உணவில் எடுத்துக் கொள்ள வேண்டும். இது தவிர புகைப்பிடிக்கும் பழக்கம் இருப்பவர்கள், அதனை உடனடியாக கைவிட வேண்டும். மேலும், நீண்ட நேரம் வெயிலில் இருப்பதை தவிர்க்க வேண்டும். 

பெரும்பாலும் உணவில் இருந்து கொலஜன் உற்பத்தியை அதிகரிக்க செய்யலாம். அந்த வகையில், சிக்கன், முட்டை, மீன், பீன்ஸ், பருப்புகள், கொண்டை கடலை, ராஜ்மா மற்றும் காளான் போன்ற பொருட்களை சாப்பிடலாம். மேலும், தசைகள் மற்றும் எலும்புகளை உறுதிப்படுத்தும் பயிற்சிகளிலும் ஈடுபட வேண்டும் என்று மருத்துவர் கார்த்திகேயன் தெரிவித்துள்ளார்.

நன்றி - Doctor Karthikeyan Youtube Channel

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.