இனிப்பை விட இது ரொம்ப ஆபத்தானது... பி.பி ஏறாமல் இருக்க இத கம்மியா யூஸ் பண்ணுங்க: டாக்டர் சிவராமன்

இனிப்பை விட உப்பு மிகவும் ஆபத்தான விஷயம் என்று மருத்துவர் சிவராமன் எச்சரிக்கை விடுத்துள்ளார். சமீப நாட்களில் மக்கள் இனிப்பின் பயன்பாட்டை கூட குறைத்துக் கொண்டனர். ஆனால், உப்பை சரியான முறையில் இன்னும் பொதுமக்கள் கட்டுப்படுத்தவில்லை என்றும் அவர் குறிப்பிட்டுள்ளார்.

ஒரு நாளைக்கு அவசியமான உப்பின் அளவு 4 கிராம் மட்டும் தான். ஆனால், ஏறத்தாழ 10 கிராம் உப்பை நாம் தினசரி சாப்பிடுகிறோம் என்று மருத்துவர் சிவராமன் கூறுகிறார். உதாரணத்திற்கு நான்கு பேர் இருக்கும் குடும்பத்தில் ஒரு கிலோ உப்பு பாக்கெட் வாங்கினால், அது ஒரு மாதத்தில் காலியாகி விடுகிறது. அந்த அளவிற்கு உப்பின் பயன்பாடு நம்மிடையே அதிகரித்து இருப்பதாக அவர் தெரிவித்துள்ளார்.

இரத்தக் கொதிப்புடன் சேர்த்து பல நோய்களுக்கு உப்பு காரணமாகி விடுகிறது. அதன்படி, வீட்டில் அப்பாவிற்கு இரத்தக் கொதிப்பு அல்லது அம்மாவிற்கு இருதய நோய் ஏற்பட்டால் அவர்களது குழந்தைகளும் உப்பு எடுத்துக் கொள்வதை குறைக்க வேண்டும் என்று மருத்துவர் சிவராமன் அறிவுறுத்துகிறார். 

நமக்கு இரத்த அழுத்தம், இரத்தக் கொதிப்பு, இருதய நோய் போன்ற பாதிப்புகள் இல்லையென்றாலும் உப்பு சாப்பிடுவதை குறைக்க வேண்டும். இது நம்முடைய நீண்ட நாள் ஆரோக்கியத்திற்கு பயன் அளிக்கும். குறிப்பாக, உப்பு இல்லா பண்டம் குப்பையிலே என்று ஒரு பழமொழி இருக்கிறது. அதனை நாம் தவறாக புரிந்து கொண்டதாக மருத்துவர் சிவராமன் கூறிகிறார்.

அதன்படி, ஒரு நபர் வியர்வை வழிந்து உப்புச் சுவை வெளியேறும் வகையில் வேலை பார்க்கவில்லை என்றால், அந்நபரின் உடல் குப்பைக்கு செல்லும் என்று மருத்துவர் சிவராமன் விளக்கம் அளித்துள்ளார். எனவே, நாம் ஆரோக்கியமாக நீண்ட நாட்களுக்கு வாழ வேண்டுமென்றால் உப்பு எடுத்துக் கொள்ளும் அளவை கட்டாயம் குறைக்க வேண்டும்.

நன்றி - Tamil Speech Box Youtube Channel

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.