மீன் வலையில் சிக்கிய டூம்ஸ் டே மீன்... பேரழிவுக்கான அறிகுறியா?

ராமேசுவரம் அருகே பாம்பனில் உள்ள மன்னார் வளைகுடா கடற்பகுதியில் ஞாயிற்றுக்கிழமை நூற்றுக்கும் மேற்பட்ட விசைப்படகுகளில் மீனவர்கள் கடலுக்குள் மீன்பிடிக்கச் சென்றனர். மீன்பிடித்த பின்னர் அவர்கள் கரை திரும்பிய போது, ஒரு அரிய வகை ஆழ்கடல் மீன், வலையில் சிக்கியது.

இந்த மீன் ‘டூம்ஸ்டே மீன்’ என அழைக்கப்படும் துடுப்பு மீன் என்பதாகும். சுமார் 10 கிலோ எடையும், 5 அடி நீளமும் கொண்ட இந்த மீன், மன்னார் வளைகுடா பகுதியில் முதன்முறையாக வலையில் சிக்கியது என்பதால், பாம்பன் மற்றும் சுற்றுவட்டார மக்கள் அதை ஆர்வமுடன் பார்வையிட்டனர்.

மிகவும் வியப்பூட்டும் தோற்றமுடைய இந்த மீன், நீளமான, பட்டைப் போல இருக்கக்கூடிய உடல் அமைப்புடன், ஆரஞ்சு நிற துடுப்புகள் போன்ற பாகங்களைக் கொண்டது. இவை பொதுவாக மிதவெப்ப மண்டல கடல் பகுதிகளில் மட்டும் காணப்படும் ஒரு அரிய மீன் இனமாகும். உலகளவில் அதிகபட்சமாக 16 மீட்டர் (சுமார் 52 அடி) வரை வளரக்கூடியதெனக் கூறப்படுகிறது.

இந்த மீன் பொதுவாக ஆழ்கடலில் வாழும் உயிரினமாகும். கடலின் மேல்நிலைக்கு வந்துவிடுவது மிகமிக அரிது. ஆனால், சில சமயங்களில் இது கரை ஒதுங்கிய நிகழ்வுகள் நிகழ்ந்துள்ளன. இதனைத் தொடர்ந்து, ஜப்பான் உள்ளிட்ட சில ஆசிய நாடுகளில் இந்த மீன் கரை ஒதுங்குவது அல்லது வலையில் சிக்குவது பேரழிவுக்கான முன்னறிவிப்பாக கருதப்படுகிறது. குறிப்பாக, நிலநடுக்கம், சுனாமி போன்ற இயற்கை பேரழிவுகள் நேரிடும் என்பதே அந்த நம்பிக்கையின் ஆதாரம்.

இதனால்தான் இந்த மீனுக்கு ‘டூம்ஸ்டே மீன்’ என்ற மர்மமான பெயர் இடப்பட்டுள்ளது. இதன் பிடிப்பு பலருக்கு அச்சத்தை ஏற்படுத்தியுள்ளது. குறிப்பாக, பாம்பனில் இதுபோன்று ஒரு மீன் முதல்முறையாக சிக்கியுள்ளதால், மீனவர்களிடையே ஒருவித பதட்டம் ஏற்பட்டுள்ளது.

இந்நிலையில், இது தொடர்பாக மீன்வளத்துறை அதிகாரிகள் விளக்கம் அளிக்கையில், “துடுப்பு மீன் என்பது ஒரு அரிய மற்றும் ஆழ்கடலில் வாழும் மீன் இனமாகும். இவை பல்வேறு காரணங்களுக்காக கரைக்கு வரக்கூடும். ஆனால், இதனை பேரழிவின் அறிகுறியாக கருதுவது முழுமையாக மூடநம்பிக்கையே. இதுவரை இந்த நம்பிக்கையை ஆதரிக்கும் எந்தவொரு அறிவியல் ஆதாரமும் இல்லை.” எனத் தெரிவித்தனர்.

அதிகாரிகளின் விளக்கத்தால் பொதுமக்கள் மற்றும் மீனவர்கள் நிம்மதியடைந்துள்ளதுடன், இப்படியான நிகழ்வுகளை அறிவியல் ரீதியாகவும் பரிசீலிக்க வேண்டிய அவசியம் இருந்தும் வலியுறுத்தப்படுகின்றது.