6 வேளையை 3 ஆக மாற்றுங்கள்… உடல் எடை சர்ருனு குறையும்; டாக்டர் வேணி

ஒரு நாளைக்கு 3 வேளைதான் சாப்பிட வேண்டும் ஆணால், பலரும் 6 வேளை சாப்பிடுகிறார்கள். இப்படி சாப்பிடுபவர்கள் உடல் எடையைக் குறைக்க வேண்டும் என்றால் 3 வேளை சாப்பாடாக மாற்றினால் உடல் எடை சர்ருனு குறையும் என்று டாக்டர் வேணி ஆலோசனை வழங்குகிறார். உங்கள் உடல் எடையைக் குறைக்க 3 வேளை உணவு எப்படி சாப்பிட வேண்டும் என்பதை இங்கே பார்ப்போம்.

உடல் எடையைக் குறைப்பதற்கு உடற்பயிற்சிகளையும் உணவுமுறைகளையும் டாக்டர் வேணி, ராக்ஃபோர்ட் நியூரோ செண்ட்ர் (RockFort Nuro Centre) என்ற யூடியூப் சேனலில் ஆலோசனைகளை வழங்கி வருகிறார். உடல் எடையை குறைப்பதற்கு 6 வேளை உணவை 3 வேளையாக மாற்றுங்கள் சர்ருனு குறையும் என்று டாக்டர் வேணி கூறுகிறார். அது எப்படி என்று பார்ப்போம்.

பலரும் உடல் எடையைக் குறைக்க வேண்டும் என்கிறார்கள். ஆனால், சாப்பாட்டைக் குறைக்கவில்லை என்றால் உடல் எடை எப்படி குறையும். பொதுவாக பலரும் காலையில் ஒரு டீ அல்லது காபி குடிக்கிறார்கள். பிறகு, காலை உணவு எடுத்துக்கொள்கிறார்கள். அதற்கு பிறகு, 11 மணிக்கு ஒரு டீ அல்லது ஸ்நாக்ஸ் சாப்பிடுகிறார்கள். மதியம் நல்லா வயிறு நிரம்ப சாப்பிடுகிறார்கள். பிறகு, மாலை 3-4 மணி அளவில் ஸ்நாக்ஸ் சாப்பிடுகிறார்கள். இரவு 8 மணிக்கு மேல் சாப்பாடு சாப்பிடுகிறார்கள். பிறகு, இரவு தூங்கச் செல்வதற்கு முன்பு ஒரு டம்பளர் பால் குடிக்கிறார்கள். டீ, ஸ்நாக்ஸ், பால் எல்லாம் கணக்கில் எடுத்துக்கொண்டால் இவர்கள் ஒரு நாளைக்கு 6 வேளை சாப்பிடுகிறார்கள் என்று அர்த்தம். இதனால், பெரும்பாலான நேரங்களில் சீரணம் நடந்துகொண்டே இருக்கிறது என்று டாக்டர் வேணி கூறுகிறார்.

உடல் எடையைக் குறைக்க வேண்டும் என்றால் முதலில் இந்த 6 வேளை உணவை 3 வேளையாக மாற்ற வேண்டும். டீ, ஸ்நாக், பால், பால் பொருட்கள் தவிர்க்க வேண்டும். மூன்று வேளை உணவு சாப்பிட வேண்டும். பிறகு, மெல்ல 3 வேளை உணவை 2 வேளையாக மாற்ற வேண்டும். அதற்கு காலை உணவை 11 மணிக்கு மேல் சாப்பிட வேண்டும். அடுத்து மாலை 6 மணி அளவில் இரவு உணவை எடுத்துக்கொள்ள வேண்டும். இதை அப்படியே மெல்ல ஒரு நாளைக்கு ஒரு வேளை உணவு என மாலையில் 6 மணி அளவில் உணவு சாப்பிட வேண்டும். சாப்பிடுவதற்கு முன், முட்டைக்கோஸ் ஜூஸ் அல்லது பழ ஜூஸ் குடித்துவிட்டு 10 நிமிடங்கள் கழித்து சாப்பிடலாம் என்று டாக்டர் வேணி பரிந்துரைக்கிறார். இப்படி சாப்பிடுவதோடு உடற்பயிற்சியையும் செய்தால் உடல் எடை சர்ருனு வேகமாகக் குறைக்கலாம், தினமும் இப்படி 2 வேளை அல்லது 1 வேளை சாப்பிட முடியாவிட்டாலும் வாரத்திற்கு 3 நாள் அல்லது 2 நாள் இந்த முறையில் சாப்பிடலாம் என்று டாக்டர் வேணி ஆலோசனை வழங்குகிறார்.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.