கருப்பான கேஸ் பர்னர் புதுசாக மாறும்… தண்ணீரில் எலுமிச்சை சாறு சேர்த்து இப்படி டிரை பண்ணுங்க!

உங்கள் கேஸ் அடுப்பின் பர்னர்கள் கறை படிந்து பார்க்கவே அசிங்கமாக இருக்கிறதா? கவலைப்பட வேண்டாம் வெறும் எலுமிச்சை, வினிகர் மற்றும் பேக்கிங் சோடா இருந்தாலே போதும், உங்கள் பர்னர்கள் பளிச்சிடும் புதியது போல் மாறிவிடும். இந்த எளிய மற்றும் அதிவேக சுத்தம் செய்யும் முறையை பற்றி காவ்யாயுவாவிலாக்ஸ் யூடியூப் பக்கத்தில் கூறியிருப்பது பற்றி பார்ப்போம். 

தேவையான பொருட்கள்:

எலுமிச்சை பழம் - 1
வினிகர் - 2 மூடி
தண்ணீர் 
பேக்கிங் சோடா - ஒவ்வொரு பர்னருக்கும் ½ டீஸ்பூன்
எலுமிச்சை சோடா - 1 டீஸ்பூன்  
விம் சோப்பு - சிறிதளவு
ஸ்க்ரப்பர் - 1

செய்முறை:

முதலில், எலுமிச்சை பழத்தை இரண்டாக வெட்டி, சாற்றை அழுக்கான பர்னர்கள் மீது நன்றாகப் பிழியவும். இரண்டு பர்னர்களும் சாற்றில் நன்கு நனைய வேண்டும். பிறகு, ஒவ்வொரு பர்னருக்கும் ஒரு மூடி வீதம் வினிகரை ஊற்றவும். எலுமிச்சை சாறு மற்றும் வினிகரை பர்னர்களில் நன்றாகக் கலக்கி விடுங்கள்.

இப்போது, பர்னர்கள் முழுமையாக மூழ்கும் அளவுக்கு சாதாரண தண்ணீர் ஊற்றவும். ஒவ்வொரு பர்னரின் மீதும் அரை டீஸ்பூன் பேக்கிங் சோடாவைத் தூவவும். விரும்பினால், ஒரு டீஸ்பூன் எலுமிச்சை சோடாவையும் சேர்த்துக்கொள்ளலாம். இந்த கலவையை அப்படியே 15 நிமிடங்களுக்கு ஊற விடவும். இந்த நேரத்தில் அழுக்குகள் தளர ஆரம்பிக்கும்.

15 நிமிடம் கழித்த பிறகு, உங்கள் கைகளால் பர்னர்களைத் தேய்த்துப் பார்க்கவும். பெரும்பாலான அழுக்குகள் எளிதாக வந்துவிடும். பர்னர்களைத் தண்ணீரில் நன்றாகக் கழுவவும். இறுதியாக, விம் சோப்பு மற்றும் ஸ்க்ரப்பர் பயன்படுத்தி பர்னர்களை முழுமையாகத் தேய்த்து சுத்தம் செய்யவும். விடாப்பிடியான கறைகள் இருந்தால், லேசாக அழுத்தம் கொடுத்துத் தேய்க்கவும். பர்னர்கள் சுத்தமாக மின்னும் வரை மீண்டும் தண்ணீரில் கழுவவும். 

இந்த முறையின் மூலம் எவ்வளவு அழுக்கு படிந்திருந்தாலும் உங்கள் பர்னர்கள் புத்தம் புதியது போல் மாறிவிடும். இது ஒரு விரைவான முறை. ஊறவைக்க 15 நிமிடங்களும், சுத்தம் செய்ய வெறும் 5 நிமிடங்களும் மட்டுமே ஆகும். வினிகர், எலுமிச்சை மற்றும் பேக்கிங் சோடா ஆகியவை கறைகளை அகற்ற உதவுகின்றன.

இந்த சுத்தம் செய்யும் முறை மிகவும் பயனுள்ளதாகவும், புதுமையானதாகவும் இருக்கிறது. சிறந்த பலன் பெற, ஒவ்வொரு முறை கேஸ் பர்னர்களை சுத்தம் செய்யும்போதும் இந்த முறையைப் பின்பற்றலாம்.