வீட்டில் இருக்கும் இந்த 2 பொருள் போதும்; பல வருட மெத்தை புதுசாக மாறும்!

நம் வீட்டில் இருக்கும் விலை உயர்ந்த பொருட்கள் குறித்து பட்டியல் போட்டால், நிச்சயம் முதல் 5 இடங்களுக்குள் மெத்தை வந்து விடும். ஒரு நல்ல மெத்தை வாங்க வேண்டுமென்றால் குறைந்தது ரூ. 5 ஆயிரத்திற்கு மேல் இருக்கும்.

அதிலும், பல்வேறு வகையான மெத்தைகள் இருப்பதால் இவற்றின் விலையும் ஒன்றுக்கொன்று மாறுபடும். இவ்வளவு செலவு செய்து வாங்கிய மெத்தையை நாம் அடிக்கடி சுத்தம் செய்து பராமரிக்க மாட்டோம். ஏனெனில், முழு மெத்தையையும் சுத்தப்படுத்துவது என்பது சிரமமான காரியம்.

ஆனால், இந்த வேலையை நம் வீட்டில் இருக்கும் சில பொருட்கள் மூலமாக நம்மால் ஈசியாக செய்ய முடியும். மெத்தையை அழகிற்காக சுத்தப்படுத்துவது என்று இல்லாமல், ஆரோக்கியத்திற்காக சுத்தப்படுத்துவது அவசியம் ஆகும். அதன்படி, மெத்தையை எவ்வாறு சுத்தப்படுத்துவது என்று இதில் காணலாம்.

இதற்காக, இரண்டு காலாவதியான மாத்திரைகளை எடுத்துக் கொள்ள வேண்டும். இந்த மாத்திரைகளை இடித்து பொடியாக்க வேண்டும். பின்னர், பாதியளவு மாத்திரை பொடி, முகத்திற்கு பயன்படுத்தும் பௌடர் சிறிதளவு, ஒரு ஸ்பூன் பேக்கிங் சோடா ஆகிய அனைத்தையும் ஒன்றாக சேர்த்து கலக்க வேண்டும்.

இந்தப் பொடியை நேரடியாக மெத்தையில் தூவாமல், ஒரு வடிகட்டியின் மூலம் மெத்தை முழுவதும் தூவி விட வேண்டும். இந்தப் பொடியை தூவிய பின்னர், சுமார் 10 நிமிடங்களுக்கு அப்படியே விட்டுவிட வேண்டும். இவை மெத்தையில் உள்ள துர்நாற்றத்தை போக்கி விடும். 

இதையடுத்து, ஒரு பாத்திரத்தில் தண்ணீர் எடுத்து அதில் மீதமிருக்கும் மாத்திரை பொடி, ஒரு ஸ்பூன் கம்ஃபோர்ட் சேர்த்து கலக்க வேண்டும். இந்த தண்ணீரில் ஒரு சாக்ஸை நனைத்து, அதனை க்ளவுஸ் போன்று கையில் மாட்டிக் கொண்டு, மெத்தையை சுத்தம் செய்யலாம். இப்படி செய்வதால் மெத்தையில் முதலில் தூவி இருந்த பொடியுடன் சேர்த்து அனைத்து கறைகளும் நீங்கி விடும். 

நன்றி: Nalini Manick Cooking Youtube Channel