பச்சை பசேல் மலைகள், கொட்டும் அருவிகள்: மான்சூன் பயணத்திற்கு ஏற்ற தமிழகத்தின் டாப் 5 மலை வாழிடங்கள்!

மழைக்காலம் என்பது இயற்கையின் அழகை முழுமையாக ரசிக்க ஏற்ற பருவம். தமிழ்நாட்டில், மழைக்காலத்தில் மலைவாசஸ்தலங்களுக்குச் செல்வது தனித்துவமான அனுபவத்தைத் தரும். பனிமூட்டம் சூழ்ந்த மலைகள், ஆர்ப்பரிக்கும் அருவி, பசுமை நிறைந்த தேயிலைத் தோட்டங்கள் என இந்தச் சீசனில் காணும் காட்சிகள் மனதுக்கு புத்துணர்ச்சி அளிக்கும்.

மேகமலை:  உயரமான அலை அலையான மலைகள் என்றழைக்கப்படும் மேகமலை, பருவமழைக் காலத்தில் சொர்க்கமாக மாறும். மேகங்கள் மலையைத் தழுவிச் செல்லும் அந்தக் காட்சி, பயணிகளுக்குக் கண்கொள்ளாக் காட்சியாக அமையும். அமைதியான தேயிலைத் தோட்டங்கள், வனவிலங்குகள், மற்றும் பறவை ஆர்வலர்களுக்கு உகந்த சூழல் என இங்கு பல சிறப்புகள் உள்ளன. மாசற்ற காற்றை சுவாசித்து, இயற்கையின் அமைதியில் லயிக்க மேகமலை சிறந்த தேர்வாகும்.

வால்பாறை: கோவைக்கு அருகில் உள்ள வால்பாறை, தேயிலை மற்றும் காபி தோட்டங்களால் சூழப்பட்ட அமைதியான மலைவாசஸ்தலம். மழைக்காலத்தில் இங்குள்ள ஒவ்வொரு வளைவிலும் பசுமை காட்சியளிக்கும். அடர்ந்த காடுகளும், குளிர்ந்த காலநிலையும் வால்பாறையின் சிறப்பு. இங்கு மலையேற்றம் செய்வது சிறந்த அனுபவத்தைத் தரும்.

கொல்லிமலை: 70 கொண்டையூசி வளைவுகளைக் கொண்ட கொல்லிமலைக்கு மழைக்காலத்தில் பயணம் செய்வது சாகசமாகும். நாமக்கலில் அமைந்துள்ள இந்த மலை, பல மூலிகைச் செடி, அடர்ந்த காடுகள் மற்றும் அருவிகளைக் கொண்டது. இங்குள்ள ஆகாய கங்கை நீர்வீழ்ச்சியில் குளிப்பது ஒரு மறக்க முடியாத அனுபவமாக இருக்கும்.

ஏற்காடு: சேலத்தில் உள்ள ஏற்காடு, அமைதியான சூழ்நிலைக்கும், மிதமான காலநிலைக்கும் பெயர் பெற்றது. மழைக்காலத்தில் பனிமூட்டத்தால் சூழப்பட்ட ஏரியில் படகு சவாரி செய்வது அலாதியான அனுபவத்தைத் தரும். பூங்காக்கள் மற்றும் மலைகளை இந்த சீசனில் சுற்றிப் பார்ப்பது மனதுக்கு மகிழ்ச்சியளிக்கும்.

குற்றாலம்: குற்றாலம் அதன் ஆர்ப்பரிக்கும் அருவிகளுக்காகப் பிரபலமானது. குறிப்பாக, மழைக்காலத்தின்போது அருவிகளில் நீர் நிறைந்து கொட்டுவதைக் காண உலகம் முழுவதிலும் இருந்து மக்கள் வருவார்கள். இங்குள்ள அருவிகளில் குளிப்பது உடலுக்கும் மனதுக்கும் புத்துணர்ச்சி அளிக்கும். குற்றாலம் ஒரு சுற்றுலாத் தலமாக மட்டுமின்றி, அதன் மருத்துவ குணங்களுக்காகவும் அறியப்படுகிறது.

பருவமழைக் காலத்தில் இந்த மலைவாசஸ்தலங்களுக்குப் பயணிக்கும்போது, மழையிலிருந்து பாதுகாக்கும் ஆடைகளையும், சரியான காலணிகளையும் எடுத்துச் செல்வது அவசியம். பயணத்திற்குப் புறப்படுவதற்கு முன், சாலை மற்றும் வானிலை நிலவரங்களைச் சரிபார்த்துக் கொள்வது பாதுகாப்பான பயணத்திற்கு உதவும்.