பூண்டு சாறு தேய்த்து குளிங்க… பேன் ஈறு தொல்லை நீங்கும்; டாக்டர் கார்த்திகேயன்

சிறுவயதில் தலையில் பேன் தொல்லை இல்லாதவர்களே இருக்க முடியாது. ஒருவரையொருவர் சீண்டிக்கொள்ளும் போதும், படுக்கைகளைப் பகிர்ந்து கொள்ளும் போதும், ஏன் ஒரு பொதுவான சீப்பைப் பயன்படுத்தும் போதும் கூட பேன்கள் மிக எளிதாகப் பரவிவிடும். இந்தச் சிறிய பூச்சிகள் ஏற்படுத்தும் அரிப்பும், அசௌகரியமும் பெரிய தலைவலியை ஏற்படுத்தும். ஆனால், இந்த பேன்கள் எங்கிருந்து வருகின்றன, எப்படி பரவுகின்றன, முக்கியமாக அவற்றை எப்படி நிரந்தரமாக விரட்டுவது என்பதைப் பற்றி இந்த வீடியோவில் விரிவாக பேசுகிறார் டாக்டர் கார்த்திகேயன். 

பேன்கள் பரவுவது என்பது நாம் நினைப்பதைவிட மிக எளிது. பள்ளிக்குச் செல்லும் குழந்தைகள் தங்கள் நண்பர்களுடன் சீப்புகள், ஹேர்பேண்ட்கள், தொப்பிகள் போன்ற பொருட்களைப் பகிர்ந்து கொள்ளும்போது பேன்கள் எளிதில் பரவுகின்றன.

வீட்டில், தலையணை உறைகள், படுக்கை விரிப்புகள், துண்டுகள் போன்றவற்றை மற்றவர்களுடன் பகிர்ந்து கொள்வதன் மூலமும் பேன்கள் பரவலாம்.

பேன் முட்டையுடன் கூடிய ஒரு சிறிய முடி கூட நாற்காலியிலோ, சோபாவிலோ விழுந்து, அது வேறொரு குழந்தையின் தலையில் ஒட்டிக்கொண்டால், அதிலிருந்தும் பேன்கள் பரவ வாய்ப்புள்ளது.

பேன் தொல்லையிலிருந்து விடுபட என்ன செய்யலாம்?

பேன் தொல்லை உள்ளவர்கள் பயன்படுத்திய தலையணை உறைகள், படுக்கை விரிப்புகள், துணிகள், பள்ளிப் பைகள் போன்றவற்றைச் சூடான நீரில் துவைக்க வேண்டும். பயன்படுத்தும் சீப்புகளை அடிக்கடி சூடான நீரில் கழுவிச் சுத்தப்படுத்த வேண்டும்.

ஒவ்வொருவருக்கும் தனித்தனி சீப்புகள், தலையணை உறைகள் மற்றும் பிற தலை முடிப் பொருட்களைப் பயன்படுத்த வேண்டும். எதையும் மற்றவர்களுடன் பகிர வேண்டாம்.

குழந்தைகளுக்குப் பேன்கள் எப்படிப் பரவுகின்றன என்பதைக் கற்றுக்கொடுத்து, பள்ளியில் தங்கள் பொருட்களைப் பிறருடன் பகிர்ந்து கொள்ளக் கூடாது என்று அறிவுறுத்த வேண்டும்.

இயற்கை வைத்திய முறைகள்:

பூண்டிலிருந்து சாறு எடுத்து, அதைத் தலையிலும், பேன் முட்டைகள் உள்ள பகுதிகளிலும் தடவி, இரண்டு மணி நேரம் கழித்து ஷாம்பு போட்டு அலசலாம். பூண்டின் காரத்தன்மை பேன்களை அழிக்கும்.

தேங்காய் எண்ணெயில் கற்றாழை மற்றும் வேப்ப இலைகளைச் சேர்த்து சூடாக்கி, அந்த எண்ணெயைத் தலையில் தடவலாம்.

மேற்கண்ட முறைகள் பேன்களைக் கொல்ல உதவலாம், ஆனால் சில சமயங்களில் இவை முழுமையாகச் செயல்படாமல் போகலாம்.

கடைகளில் பேன்களுக்காகவே பிரத்யேகமாக விற்கப்படும் ஷாம்பூக்களைப் பயன்படுத்தலாம். ஆனால், இந்த ஷாம்பூக்களை ஒரே ஒரு முறை மட்டும் பயன்படுத்தினால் போதாது. பேன் முட்டைகள் பொரித்து புதிய பேன்கள் உருவாகாமல் தடுக்க, ஒரு மாதத்திற்கு வாரத்திற்கு ஒருமுறை அல்லது பத்து நாட்களுக்கு ஒருமுறை எனத் தொடர்ந்து 4 முறை பயன்படுத்த வேண்டும். இதன் மூலம் பேன் மற்றும் அதன் முட்டைகளை முழுமையாக நீக்கலாம்.

பேன் தொல்லையிலிருந்து விடுபட மிகவும் சிறந்தது மற்றும் எளிமையான வழி, பேன் சீப்பு பயன்படுத்துவதுதான். இவை நெருக்கமான, கூர்மையற்ற உலோகப் பற்களைக் கொண்டவையாக இருக்கும்.

பயன்படுத்தும் முறை: தலையில் தேங்காய் எண்ணெய் தடவியோ அல்லது தலைமுடியை லேசாக ஈரமாக்கியோ பேன் சீப்பைப் பயன்படுத்தலாம். இதனால் பேன் மற்றும் முட்டைகள் எளிதாக வெளியே வரும்.

நீக்கும் முறை: 

பேன் மற்றும் முட்டைகளைச் சீவி எடுத்த பிறகு, அவற்றை ஒரு டிஷ்யூ பேப்பரில் சேகரித்து, காற்றுப் புகாத பையில் போட்டு அப்புறப்படுத்தலாம். இதனால் பேன்கள் மீண்டும் பரவுவது தடுக்கப்படும். கெமிக்கல் ஷாம்பூக்களைப் பயன்படுத்த விரும்பாதவர்களுக்கு இது சிறந்த வழியாகும். பேன்கள் அதிக நாட்கள் வாழாததால் (30 நாட்கள்), தொடர்ந்து சீப்புவதன் மூலம் அவற்றின் இனப்பெருக்கச் சுழற்சியை உடைக்க முடியும்.

இந்த வழிமுறைகளைப் பின்பற்றுவதன் மூலம், பேன் தொல்லையிலிருந்து நிரந்தரமாக விடுபடலாம்.