குடல் ஆரோக்கியத்திற்கு சிறந்த எண்ணெய்கள் இதுதான்: நிபுணர்கள் பரிந்துரைக்கும் டாப் 3

குடல் ஆரோக்கியம் என்பது நமது ஒட்டுமொத்த உடல் ஆரோக்கியத்தின் அஸ்திவாரம். நாம் அன்றாடம் சமையலுக்குப் பயன்படுத்தும் எண்ணெய்கள் நமது குடல் ஆரோக்கியத்தில் நேரடி தாக்கத்தை ஏற்படுத்துகின்றன. சரியான எண்ணெய்களைத் தேர்ந்தெடுப்பது குடலில் உள்ள நுண்ணுயிர்களின் சமநிலையை மேம்படுத்தி, செரிமான மண்டலத்தை வலுப்படுத்த உதவும். ஹார்வர்ட் பல்கலைக்கழகத்தில் பயிற்சி பெற்ற புகழ்பெற்ற இரைப்பை குடல் நிபுணர் டாக்டர் சவுரப் சேத்தி, குடல் ஆரோக்கியத்திற்கு மிகவும் உகந்த மூன்று சிறந்த எண்ணெய்களைப் பரிந்துரைத்துள்ளார். 

டெல்லி, CK பிர்லா மருத்துவமனையின் இரைப்பை குடல் துறை ஆலோசகர் டாக்டர் விகாஸ் ஜிண்டால், இந்த பரிந்துரைகளை விஞ்ஞான ஆதாரங்களுடன் உறுதிப்படுத்தியுள்ளார்.

1. எக்ஸ்ட்ரா வெர்ஜின் ஆலிவ் ஆயில் (EVOO):

டாக்டர் சவுரப் சேத்தி பரிந்துரைக்கும் முதல் மற்றும் மிக முக்கியமான எண்ணெய் எக்ஸ்ட்ரா வெர்ஜின் ஆலிவ் ஆயில் (EVOO). இது மோனோசாச்சுரேட்டட் கொழுப்புகளின் (monounsaturated fats) ஒரு சிறந்த ஆதாரமாக உள்ளது. இந்தக் கொழுப்புகள் கொலஸ்ட்ரால் அளவை மேம்படுத்துவதன் மூலம் இதய நோய் அபாயத்தைக் குறைக்க உதவுகின்றன.

இது குறைந்த ஸ்மோக் பாயிண்ட் (low smoke point) கொண்டிருப்பதால், லேசானது முதல் மிதமான வெப்பத்தில் சமைப்பதற்கு ஏற்றது," என்கிறார் டாக்டர் சேத்தி.

டாக்டர் விகாஸ் ஜிண்டாலும் இந்த கருத்தை உறுதிப்படுத்துகிறார். "எக்ஸ்ட்ரா வெர்ஜின் ஆலிவ் ஆயில் அதிக அளவில் மோனோசாச்சுரேட்டட் கொழுப்புகளையும், குறிப்பாக ஒலிக் அமிலத்தையும், அழற்சியைக் குறைத்து ஆக்ஸிஜனேற்ற அழுத்தத்தைப் போக்க உதவும் பாலிஃபீனால்களையும் (polyphenols) கொண்டுள்ளது. இந்தக் கலவைகள் குடல் உட்புற அடுக்கைப் பாதுகாக்கவும், நன்மை பயக்கும் குடல் பாக்டீரியாக்களின் வளர்ச்சியை ஊக்குவிக்கவும், குடல் அழற்சி நோய் (IBD) போன்ற நாள்பட்ட செரிமானக் கோளாறுகளின் அபாயத்தைக் குறைக்கவும் உதவுகின்றன," என்கிறார் டாக்டர் ஜிண்டால்.

மேலும், மத்தியதரைக் கடல் உணவைப் பற்றிய பல ஆய்வுகள், ஆலிவ் எண்ணெயின் வழக்கமான நுகர்வு செரிமான ஆரோக்கியத்தை மேம்படுத்துவதாகவும், குடல் ஊடுருவக்கூடிய தன்மையைக் குறைப்பதாகவும் (leaky gut), மற்றும் நுண்ணுயிர்ப் பன்முகத்தன்மையை (microbial diversity) மேம்படுத்துவதாகவும் நிரூபித்துள்ளன.

2. அவகடோ ஆயில்:

டாக்டர் சேத்தி பரிந்துரைக்கும் இரண்டாவது சிறந்த எண்ணெய் அவகடோ ஆயில் ஆகும். இது அதிக ஸ்மோக் பாயிண்ட் (high smoke point) கொண்டிருப்பதால், டீப் ஃப்ரை (deep frying) அல்லது ஏர் ஃப்ரைங் (air frying) போன்ற அதிக வெப்ப சமையல் முறைகளுக்கு ஏற்றது. 

டாக்டர் ஜிண்டால் கூறுகையில், "அவகேடோ ஆயில், அதன் அதிக மோனோசாச்சுரேட்டட் கொழுப்பு உள்ளடக்கம் காரணமாக சமைக்காத மற்றும் சமைத்த உணவுகள் இரண்டிற்கும் ஏற்றது. இது ஆலிவ் ஆயிலுக்கு இணையான குடல் ஆரோக்கிய நன்மைகளை வழங்குகிறது.

3. ஃபிளாக்ஸ் சீட் ஆயில் (ஆளி விதை எண்ணெய்):

ஒமேகா-3 கொழுப்பு அமிலங்கள் (omega-3 fatty acids) நிறைந்திருப்பதால், ஃபிளாக்ஸ் சீட் ஆயில் ஒரு சிறந்த தேர்வாகக் கருதப்படுகிறது. "ஒமேகா-3கள் இதய ஆரோக்கியம் மற்றும் அழற்சி எதிர்ப்பு பண்புகளைக் கொண்டுள்ளன. நீங்கள் கொழுப்பு நிறைந்த மீன்களை உட்கொள்ளாதவராக இருந்தால், இது ஒரு சிறந்த மாற்று," என்று டாக்டர் சேத்தி விளக்குகிறார்.

டாக்டர் ஜிண்டால், ஃபிளாக்ஸ் சீட் ஆயில் தாவர அடிப்படையிலான ஒமேகா-3 கொழுப்பு அமிலங்களான ALA (Alpha-Linolenic Acid) நிறைந்துள்ளதை உறுதிப்படுத்துகிறார். இவை அழற்சியைக் குறைப்பதிலும், குடல் இயக்கத்தை மேம்படுத்துவதிலும் அறியப்படுகின்றன. இருப்பினும், ஃபிளாக்ஸ் சீட் ஆயிலை சூடுபடுத்தக் கூடாது என்றும், பச்சையாக உட்கொள்வதே சிறந்தது என்றும் அவர் அறிவுறுத்துகிறார்.

மாற்று எண்ணெய்கள்:

மேற்கண்ட எண்ணெய்கள் எளிதில் கிடைக்காத பட்சத்தில், தேங்காய் எண்ணெய் மற்றும் நெய்  ஆகியவற்றை சிறந்த மாற்றுத் தேர்வுகளாக டாக்டர் சேத்தி பரிந்துரைக்கிறார். இவை நிறைவுற்ற கொழுப்புகள் (saturated fats) என்றாலும், மிதமான அளவில் உட்கொள்ளும்போது உடல்நல நன்மைகளையும், ஆன்டிஆக்ஸிடன்ட்களையும் வழங்குகின்றன, மேலும் நீண்ட நேரம் வயிறு நிறைந்த உணர்வையும் தருகின்றன.

டாக்டர் ஜிண்டால், தேங்காய் எண்ணெய் மற்றும் நெய் அதிக வெப்பநிலையில் நிலையானவை என்பதையும், மிதமான அளவில் இவை செரிமானத்திற்கு உதவலாம் என்பதையும் ஒப்புக்கொள்கிறார். குறிப்பாக நெய், குடல் செல்களுக்கு ஊட்டமளிக்கும் ஷார்ட்-செயின் கொழுப்பு அமிலமான பியூட்ரேட் (butyrate) கொண்டிருப்பதால், மிதமாக உட்கொள்ளும்போது செரிமானத்தை ஆதரிக்கலாம் என்றும் அவர் கூறுகிறார்.

குடல் ஆரோக்கியம் என்பது ஒரு தொடர்ச்சியான பயணம். சரியான எண்ணெய்களைத் தேர்ந்தெடுப்பதன் மூலமும், சீரான உணவு முறையைப் பின்பற்றுவதன் மூலமும் நாம் ஆரோக்கியமான குடலைப் பேணி, ஒட்டுமொத்த உடல்நலத்தையும் மேம்படுத்தலாம்.

Read in English: Gastroenterologist recommends the ‘best oils’ for gut health; check out his top 3 picks