முடி உடையாமல் தலை சீவ இதுதான் பெஸ்ட்… எந்த வகை சீப்பு யாருக்கு கரெக்ட்டா இருக்கும்? சூப்பர் டிப்ஸ் இதோ…

கூந்தல் பராமரிப்பு என்பது வெறும் ஷாம்பு மற்றும் கண்டிஷனருடன் முடிந்துவிடுவதில்லை. உங்கள் கூந்தலின் ஆரோக்கியத்திற்கும், சரியான சிகை அலங்காரத்திற்கும் ஏற்ற சீப்பைத் தேர்ந்தெடுப்பது மிகவும் முக்கியம். ஒவ்வொரு சீப்பிற்கும் ஒரு தனிப்பயன்பாடு உண்டு. அவற்றை சரியாகப் புரிந்துகொண்டு பயன்படுத்தினால், உங்கள் கூந்தல் பட்டுப்போல் பளபளப்பதுடன், உதிர்வும் குறையும். உங்கள் கூந்தல் அழகை மெருகூட்ட உதவும் சில முக்கிய சீப்புகள் இங்கே:

வைட் டூத் சீப்பு (Wide Tooth Comb)

ஈரமான கூந்தலை சீவுவது எப்போதும் ஒரு சவால்தான். ஈரமான கூந்தல் மிகவும் மென்மையாகவும், உடைவதற்கு எளிதாகவும் இருக்கும். இங்குதான் வைட் டூத் சீப்பு கைகொடுக்கிறது. அகலமான பற்களைக் கொண்ட இந்த சீப்பு, கூந்தலை மெதுவாகப் பிரித்து, சிக்கல் இல்லாமல் சீவ உதவுகிறது. இது கூந்தல் உடைவதைத் தடுத்து, முடி உதிர்வையும் குறைக்கிறது. ஹேர் கிரீம்கள் மற்றும் கண்டிஷனர்களை தலை முழுவதும் பரப்பவும் இது சிறந்த தேர்வு. ப்ளோ-ட்ரை செய்வதற்கு முன் கூந்தலை தயார் செய்யவும் இது உதவும்.

பேடில் பிரஷ் (Paddle Brush)

நீளமான கூந்தல் உள்ளவர்களுக்கு பேடில் பிரஷ் ஒரு வரப்பிரசாதம். இதன் அகலமான, தட்டையான வடிவமைப்பு நீண்ட கூந்தலை எளிதாகச் சீவவும், சிக்கல் எடுக்கவும் உதவுகிறது. சிகை அலங்கார நிபுணர்கள் ப்ளோ-ட்ரை செய்யும்போதும் (குறிப்பாக திருமண மேக்கப் செய்யும் போது) மற்றும் கூந்தலை நேராக்கும் போதும் இந்த பிரஷை அதிகம் பயன்படுத்துகிறார்கள். இது கூந்தலுக்கு மென்மையையும், பளபளப்பையும் சேர்க்கிறது.

டீஸிங் பிரஷ் (Teasing Brush)

கூந்தலுக்கு கூடுதல் வால்யூம் வேண்டுமா? அப்படியானால், டீஸிங் பிரஷ் உங்களுக்குத் தேவை. இதன் நெருக்கமான மற்றும் குறுகிய பற்கள், கூந்தலை பின்னோக்கி சீவி, வேர் பகுதிகளில் அதிக கனத்தை உருவாக்க உதவுகிறது. குறிப்பாக புதுமணப் பெண்களுக்கு "பஃப்" சிகை அலங்காரம் செய்ய அல்லது மற்ற வால்யூம் ஸ்டைல்களை உருவாக்க இந்த பிரஷ் பயன்படுத்தப்படுகிறது. பின்னப்பட்டு முடித்த பின்னரும், பஃப் செய்த பகுதிகளை மெதுவாக விடுவிக்கவும் இது பயன்படுகிறது.

ரவுண்ட் பிரஷ் (Round Brush) - பன்றி முடி பிரஷ் (Boar Bristle Brush)

ஸ்டைலிங் மற்றும் வால்யூம் சேர்ப்பதில் ரவுண்ட் பிரஷ் ஒரு அத்தியாவசிய கருவி. இது மூன்று அளவுகளில் கிடைக்கிறது. இதன் சுற்று வடிவம் கூந்தலுக்கு சுருள் சேர்க்கவும், ப்ளோ-ட்ரை செய்யும் போது வால்யூம் அதிகரிக்கவும், கூந்தலை குறிப்பிட்ட வடிவத்தில் செட் செய்யவும் உதவுகிறது. தற்போது டிரெண்டில் இருக்கும் "பேங்க்ஸ்" ஸ்டைல் செய்யவும் இது மிகவும் பயனுள்ளதாக இருக்கும். சிகை அலங்கார நிபுணர்கள் தங்கள் ஸ்டைலிங் வேலைகளில் இதை அதிகம் பயன்படுத்துகிறார்கள்.

வூடன் பிரிஸ்டில் பிரஷ் (Wooden Bristle Brush)

உங்கள் உச்சந்தலைக்கு ஒரு மசாஜ் வேண்டுமா? அப்படியானால், வூடன் பிரிஸ்டில் பிரஷ் சிறந்த தேர்வு. மரத்தாலான முட்களைக் கொண்ட இந்த பிரஷ், உச்சந்தலையில் இரத்த ஓட்டத்தை மேம்படுத்தி, முடி வளர்ச்சியைத் தூண்டுகிறது. எண்ணெய் தேய்க்கும் போதும் இதை பயன்படுத்தலாம். இது கூந்தலுக்கு இயற்கையான பளபளப்பை அளிப்பதுடன், அனைவருக்கும் பயன்படுத்த ஏற்றது.

மெட்டல் ரவுண்ட் பிரஷ் (Metal Round Brush)

மெட்டல் ரவுண்ட் பிரஷ் ரவுண்ட் பிரஷைப் போலவே செயல்படுகிறது, ஆனால் இது சற்று வித்தியாசமானது. இது பல்வேறு அளவுகளில் கிடைக்கிறது. இதன் மெட்டல் பாடி வெப்பத்தை சிறப்பாக கடத்துவதால், ப்ளோ-ட்ரை செய்யும் போது கூந்தலுக்கு நல்ல வால்யூம் மற்றும் சுருள்களை உருவாக்க உதவுகிறது. இதுவும் சிகை அலங்கார நிபுணர்களால் கூந்தலை செட் செய்யப் பயன்படுத்தப்படும் ஒரு பிரதான சீப்பு.

டெயில் சீப்பு (Tail Comb)

சிகை அலங்காரத்தின் நுணுக்கமான வேலைகளுக்கு டெயில் சீப்பு (வால் சீப்பு) மிகவும் அவசியம். இதன் கூர்மையான மெல்லிய வால் பகுதி, கூந்தலை துல்லியமாகப் பிரிக்கவும், குறிப்பிட்ட பிரிவுகளாகப் பிரிக்கவும் உதவுகிறது. திருமண சிகை அலங்காரங்கள், முன் பக்கக் கூந்தல் பிரித்தல், ஹேர் கலரிங் மற்றும் ஸ்பா சிகிச்சைகள் போன்றவற்றுக்கு சிகை அலங்கார நிபுணர்கள் இதை அதிகம் பயன்படுத்துகிறார்கள். இது ஒரு சிகை அலங்காரத்தின் துல்லியத்தை மேம்படுத்துகிறது.

உங்கள் கூந்தலின் வகைக்கு ஏற்பவும், நீங்கள் செய்ய விரும்பும் சிகை அலங்காரத்திற்கு ஏற்பவும் சரியான சீப்பைத் தேர்ந்தெடுப்பது, ஆரோக்கியமான மற்றும் அழகான கூந்தலைப் பெற முதல் படியாகும். உங்கள் கூந்தல் பராமரிப்பு வழக்கத்தில் இந்த சீப்புகளையும் சேர்த்து, அதன் பலன்களை அனுபவியுங்கள்