வீடு முழுக்க முடி கொட்டிக் கிடக்குதா? 5 சின்ன வெங்காயம் போதும்- டாக்டர் ஆஷா சொல்லும் மேஜிக் ஹேக் பேக் டிரை பண்ணுங்க

வீடு முழுக்க முடி கொட்டிக் கிடக்கிறது, தலை பயங்கரமாக வியர்க்கிறது, வியர்வையால் பொடுகு வருகிறது, தலையை சொறிந்து கொண்டே இருக்கிறீர்களா? வேறு எந்த பிரச்சனையாக இருந்தாலும் தாங்கிக் கொள்ளலாம், ஆனால் தலையிலிருந்து முடி கொட்டினால் தாங்கவே முடியாது. நிறைய ஊட்டச்சத்துக்களை எடுத்துக்கொள்ள வேண்டும் என்பது உண்மைதான், ஆனால் இந்தக் கோடைக்காலத்தில், அதிக வியர்வை மற்றும் வெப்பம் காரணமாக முடி வேரோடு கொட்டுவது ஒரு பொதுவான பிரச்சனையாகும். 
 
டாக்டர் ஆஷா ஒரு அற்புதமான வீட்டு வைத்தியத்தைப் பரிந்துரைக்கிறார், இது முடி உதிர்வைத் தடுத்து, அடர்த்தியாக முடி வளர உதவும். 

இந்த ஹேர் பேக்கின் முக்கிய ஹீரோ சின்ன வெங்காயம். சின்ன வெங்காயத்தில் சல்பர் அதிக அளவில் உள்ளது. இந்த சல்பர், தலைப்பகுதிக்கு இரத்த ஓட்டத்தை அதிகரித்து, புதிய மயிர்க்கால்கள் (hair follicles) உருவாக பெரிதும் உதவுகிறது. இதனால் முடி வளர்ச்சி தூண்டப்பட்டு, அடர்த்தியான கூந்தலை பெறலாம்.

டாக்டர் ஆஷாவின் ரகசிய செய்முறை

டாக்டர் ஆஷா தனது மகளுக்கு மொட்டை போடும் முன் பயன்படுத்திய ஒரு ரகசிய ஹேர் பேக் இது. இது மிகவும் எளிமையானது மற்றும் வீட்டிலேயே தயாரிக்கக்கூடியது.

தேவையான பொருட்கள்:

சின்ன வெங்காயம் - 5
வெற்றிலை - 2
தேங்காய் எண்ணெய் - தேவையான அளவு

செய்முறை:

ஐந்து சின்ன வெங்காயம் மற்றும் இரண்டு வெற்றிலையை நன்கு அரைத்துக் கொள்ளவும். இந்த விழுதை தேங்காய் எண்ணெயுடன் கலந்து சூடுபடுத்தவும். மிதமான சூட்டில் காய்ச்ச வேண்டும். சூடுபடுத்திய இந்த எண்ணெயை ஒரு டப்பாவில் சேகரித்து வைத்துக்கொள்ளலாம். இந்த எண்ணெயை தலைமுடியில் தடவி, 5 முதல் 10 நிமிடங்கள் வரை வைத்திருக்கவும். பின்னர் வெதுவெதுப்பான நீரில் அலசவும்.

முக்கிய குறிப்பு: எண்ணெயை சூடுபடுத்தி தடவுவது மிகவும் முக்கியம். இல்லையென்றால் சளி பிடிக்க வாய்ப்புள்ளது. வெதுவெதுப்பான சூட்டில் தடவுவது சிறந்த பலனைத் தரும். இந்த முறையை பின்பற்றுவதன் மூலம் முடி உதிர்வை கட்டுப்படுத்தி, அடர்த்தியான மற்றும் ஆரோக்கியமான கூந்தலை பெறலாம் என்று டாக்டர் ஆஷா உறுதிபட கூறுகிறார்.

இந்த கோடை காலத்தில் முடி உதிர்வால் அவதிப்படுபவர்கள் டாக்டர் ஆஷாவின் இந்த ஹேர் பேக்கை முயற்சி செய்து பலன் பெறலாம்!