/indian-express-tamil/media/media_files/2025/07/17/news-paper-2025-07-17-16-06-27.jpg)
மின்னும் சுவர்கள் முதல் காலணிகள் வரை... பழைய செய்தித் தாள்கள் செய்யும் அதிசயங்கள்!
நாம் குப்பையில் வீசும் பழைய செய்தித் தாட்கள், உண்மையில் வீட்டைச் சுத்தப்படுத்துவதிலும், பராமரிப்பதிலும் பல அற்புதங்களைச் செய்யக் கூடிய பொக்கிஷம்! சுற்றுச்சூழலுக்கு உகந்ததாகவும், பணத்தை மிச்சப்படுத்தும் வகையிலும் வீட்டு வேலைகளை எப்படி எளிதாக்கலாம் என்று பார்ப்போம்.
பளபளக்கும் கண்ணாடிகளுக்கு: கண்ணாடி ஜன்னல்கள் அல்லது கண்ணாடிகளைத் துடைக்கும்போது, துணிகள் விட்டுச்செல்லும் இழைகள் எரிச்சலூட்டும். இனி கவலை வேண்டாம்! ஸ்ப்ரே பாட்டிலில் தண்ணீர் மற்றும் வினிகர் கலவையை நிரப்பி, கண்ணாடியில் தெளிக்கவும். பிறகு, ஒரு சுருட்டிய செய்தித்தாள் கொண்டு துடைக்கலாம். எந்தவித கறைகளும், கோடுகளும் இல்லாமல் கண்ணாடி பளபளக்கும்.
காலணிகளில் துர்நாற்றமா? உங்கள் காலணிகளுக்குள் விரும்பத்தகாத துர்நாற்றம் வீசினால், சுருட்டிய செய்தித்தாள்களை இரவு முழுவதும் காலணிகளுக்குள் போட்டு வைக்கவும். செய்தித் தாள்கள் காலணிகளுக்குள் இருக்கும் ஈரப்பதத்தையும், துர்நாற்றத்தையும் உறிஞ்சிவிடும். காலணிகள் புத்துணர்ச்சியுடன் இருக்கும்.
ஈரப்பதத்தை உறிஞ்சும் மேஜிக்: ஃபிரிட்ஜில் உள்ள காய்கறி அல்லது பழ டிராயர்களின் அடியில் செய்தித்தாள்களை விரித்து வைத்தால், அவை காய்கறிகள்/பழங்களில் இருந்து வெளியாகும் அதிகப்படியான ஈரப்பதத்தை உறிஞ்சி, அவற்றை நீண்ட நாட்கள் ஃப்ரெஷ்ஷாக வைத்திருக்க உதவும். மழைக்காலத்தில் ஈரமான காலணிகள் அல்லது குடைகளை வீட்டிற்குள் கொண்டு வரும்போது, செய்தித்தாள் விரிப்பின் மேல் வைத்தால், அது தரையில் ஈரப்பதம் பரவாமல் உறிஞ்சிவிடும்.
குப்பைத் தொட்டி பராமரிப்பு: குப்பைத் தொட்டிகளில் குப்பை பைகளை போடுவதற்கு முன், அடியில் சில செய்தித்தாள்களை விரித்து வைத்தால், குப்பை பையில் ஏதேனும் கசிவு ஏற்பட்டால் அதை உறிஞ்சி, தொட்டி சுத்தமாக இருக்க உதவும். மேலும், துர்நாற்றத்தையும் ஓரளவு கட்டுப்படுத்தும்.
பயணத்தின்போது பாதுகாப்பு: பயணத்தின்போது கண்ணாடி பாட்டில்கள், கோப்பைகள் போன்ற உடைந்து போகக்கூடிய பொருட்களை பேக் செய்யும்போது, செய்தித்தாள்களைச் சுற்றி வைத்தால் அவை சேதமடையாமல் பாதுகாப்பாக இருக்கும்.
எனவே, அடுத்த முறை பழைய செய்தித் தாள்களை குப்பையில் போடுவதற்கு முன் ஒருமுறை யோசியுங்கள். அவை உங்கள் வீட்டைச் சுத்தமாகவும், நேர்த்தியாகவும் வைத்திருக்க உதவும் சுற்றுச்சூழலுக்கு உகந்த, செலவில்லாத பொக்கிஷம் என்பதை நினைவில் கொள்ளுங்கள்.
Stay updated with the latest news headlines and all the latest Lifestyle news. Download Indian Express Tamil App - Android or iOS.