வீட்டிலேயே செய்யலாம் கேரட் ஆயில்; முகத்தை பளபளப்பாக்க இதை ட்ரை பண்ணுங்க மக்களே!

நம் முகத்தை எப்போதுமே பொலிவாகவும், பளபளப்பாகவும் வைத்திருக்க வேண்டும் என்ற விருப்பம் பலருக்கும் இருக்கும். அதிலும், தற்போது கோடை காலம் என்பதால் நம் சருமம் மிகவும் வறண்டு போய் கருமையாக காட்சியளிக்கும்.

முகத்தை பொலிவாக்க இன்ஸ்டன்ட் ஃபேஸ்பேக் நிறைய பார்த்திருப்போம். ஆனால், இவை குறிப்பிட்ட நேரத்திற்கு மட்டுமே நம்மை பொலிவாக காட்சிப்படுத்தும். ஆனால், நீண்ட நாள் நம் சருமத்தை ஆரோக்கியமாக வைத்திருக்க வேண்டுமென்றால் சில ஸ்கின் கேர் டிப்ஸை பின்பற்ற வேண்டும்.

இதற்காக கடைகளில் இருந்து விலை உயர்ந்த ஃபேஸ் க்ரீம், சீரம் போன்றவற்றை பயன்படுத்த வேண்டும் என்ற அவசியம் இல்லை. இவற்றில் சேர்க்கப்பட்டிருக்கும் இரசாயனங்கள் ஒவ்வாமை அல்லது பக்க விளைவுகளை ஏற்படுத்தக் கூடும்.

அந்த வகையில் வீட்டிலேயே ஒரு ஆயில் தயாரித்து அதனை தினசரி பயன்படுத்தலாம். இதற்காக அடுப்பில் ஒரு பாத்திரம் வைத்து அதில் தேங்காய் எண்ணெய்யை ஊற்றி சூடு படுத்த வேண்டும். இந்த எண்ணெய் சூடானதும் அதில், துருவி வைத்திருக்கும் கேரட்டை போட்டு கொதிக்க வைக்க வேண்டும்.

இதன் பின்னர், சுமார் 3 நிமிடங்கள் கழித்து கேரட்டை மட்டும் தனியாக வடிகட்டி எடுத்து விடலாம். இப்போது கேரட்டில் இருக்கும் அனைத்து சத்துகளும் தேங்காய் எண்ணெய்யில் சேர்ந்திருக்கும். இந்த எண்ணெய்யை தினசரி இரவு தூங்குவதற்கு முன்பாக நம் முகத்தில் தேய்த்து சுமார் 5 நிமிடங்கள் மசாஜ் செய்ய வேண்டும். இதையடுத்து, முகத்தை கழுவி விடலாம்.

இவ்வாறு தொடர்ந்து 30 நாட்களுக்கு செய்யும் போது நம் சருமம் பார்ப்பதற்கு பொலிவாக மாறி விடும். கேரட்டில் வைட்டமின் சி நிறைந்திருக்கிறது. இது நம் முகத்தில் இருக்கும் சுருக்கங்களை அகற்ற உதவி செய்கிறது. முகத்தில் ஈரப்பதத்தை தக்கவைத்து வறட்சியாவதையும் இது தடுக்கிறது. அதன் காரணத்தால் நம் முகம் பார்ப்பதற்கு பளபளப்பாக இருக்கும்.

நன்றி - Sethu Youtube Channel

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.