மொபைல் போன் ஸ்கிரீன் அழுக்கா இருக்கா? இந்த சிம்பிள் டிப்ஸ் டிரை பண்ணுங்க… புதுசு போல் மாறும்!

நம்முடைய ஸ்மார்ட்போன்கள் அன்றாட வாழ்வில் பிரிக்க முடியாத அங்கம். அவை எப்போதும் நம் கைகளில் இருக்கின்றன, இதனால் அழுக்கு, எண்ணெய் மற்றும் கிருமிகள் திரையில் படிய வாய்ப்புள்ளது. உங்கள் போன் அழுக்காக இருந்தால், சுத்தம் செய்ய சிம்பிள் டிப்ஸ் கோமுஸ் லைஃப்ஸ்டைல் என்ற யூடியூப் சேனலில் கொடுக்கப்பட்டுள்ளது.

எப்படி சுத்தம் செய்வது?

தேவையானவை: சிறிதளவு பாண்ட்ஸ் பவுடர் (பேபி பவுடர் அல்லது முகப்பவுடர்), சுத்தமான டிஷ்யூ பேப்பர் அல்லது மென்மையான துணி.

பயன்படுத்தும் முறை: முதலில், உங்கள் போனின் திரை அல்லது அழுக்கான பகுதிகளில் சிறிதளவு பவுடரைத் தூவுங்கள். பின்னர், சுத்தமான டிஷ்யூ பேப்பர் அல்லது மென்மையான துணியைக் கொண்டு, மெதுவாகவும் கவனமாகவும் துடைக்கவும். பவுடர், திரையில் படிந்துள்ள எண்ணெய் பிசுபிசுப்பு, கை ரேகைகள் மற்றும் அழுக்குகளை உறிஞ்சி சுத்தமாக்கும். போனின் பின்பகுதியிலும் அதிக அழுக்கு இருந்தால், இதே முறையில் பவுடரைத் தூவி துடைக்கலாம். கேமரா லென்ஸில் பவுடர் படாமல் பார்த்துக் கொள்ளுங்கள்.

பொதுவாக, போனை சுத்தம் செய்ய ஈரமான துணிகளைப் பயன்படுத்துவதைத் தவிர்க்க வேண்டும், ஏனெனில் அது போனின் உள் பாகங்களுக்குச் செல்ல வாய்ப்புள்ளது. பவுடரைப் பயன்படுத்துவதன் மூலம், ஈரப்பதம் இல்லாமல் அழுக்குகளை திறம்பட நீக்க முடியும். இந்த முறை உங்கள் போனை புதிது போல பளபளப்பாக மாற்றும்.